1 ມິຖຸນາ ຜ່ານໄປ ຂໍໃຫ້ເປັນວັນທີ່ມີຄວາມໝາຍຕໍ່ຄົນຮຸ່ນສືບທອດ ຢ່າງແທ້ຈິງ

ໂດຍ: ທິດກໍ່າ

ເຖິງວ່າວັນທີ 1 ມິຖຸນາ ໄດ້ຜ່ານພົ້ນໄປບໍ່ພໍເທົ່າໃດວັນແລ້ວກໍຕາມ, ແຕ່ມັນກໍຍັງມີຄວາມໝາຍຕໍ່ປະຫວັດສາດຂອງເດັກເຍົາວະຊົນ ຫລື ຕໍ່ຄົນຮຸ່ນສືບທອດຕະຫລອດໄປໃນທົ່ວໂລກ. ສໍາລັບ ສປປ ລາວເຮົາແລ້ວ ວັນທີ 1 ມິຖຸນາຂອງທຸກປີ ຍັງເປັນວັນປູກຕົ້ນໄມ້ແຫ່ງຊາດ. ກ່າວເຖິງບັນຍາກາດໃນວັນເດັກສາກົນປີນີ້ ກໍມີຄວາມຄຶກຄັກບໍ່ໜ້ອຍ ໂດຍສະເພາະແມ່ນຢູ່ກະໂຕນະຄອນຫລວງວຽງຈັນ ແລະ ໃນບັນດາຕົວເມືອງໃຫຍ່ໆຂອງປະເທດ. ຄິດວ່າຖ້າຫາກບໍ່ມີປັດໄຈອື່ນໆມາກະທົບ ກໍຍິ່ງມີຄວາມໝາຍ ທັງມີບັນຍາກາດຟົດຟື້ນ. ຕໍ່ບັນຫາປັດໄຈທີ່ມາກະທົບໃນໄລຍະນີ້ກໍແມ່ນສະພາບເງິນກີບລາວອ່ອນຄ່າ, ລາຄານໍ້ມັນ ນັບທັງສິນຄ້າປະເພດຕ່າງໆຖີບຕົວສູງຂຶ້ນຢ່າງບໍ່ຢຸດຢັ້ງ ອັນໄດ້ເຮັດໃຫ້ຊີວິດການເປັນຢູ່ຂອງພະນັກງານ, ທະຫານ, ຕໍາຫລວດ ແລະ ປະຊາຊົນບັນດາເຜົ່າມີຄວາມຫຍຸ້ງຍາກຝືດເຄືອງບໍ່ໜ້ອຍ. ເພາະສະນັ້ນ ຈະມີການໃຊ້ຈ່າຍອັນໃດກໍຕ້ອງໄດ້ຄໍານຶງເຖິງປາກທ້ອງ ແລະ ສິ່ງຈໍາເປັນໃນຄອບຄົວ ຍ້ອນວ່າໝົດເດືອນມາບໍ່ຈັກວ່າຄ່ານໍ້າ, ຄ່າໄຟຟ້າ, ຄ່ານໍ້າມັນ, ຄ່າໂຮງຮຽນລູກ ນັບທັງອາຫານການກິນສາລະພັດຢ່າງ ແຕ່ທຸກຄົນກໍຕ້ອງໄດ້ສູ້ເພື່ອເອົາຊີວິດຢູ່ລອດໃນຍຸກເຂົ້າຍາກໝາກແພງ.

ແຕ່ແນວໃດກໍຕາມ, ຜົນສໍາເລັດອັນຍິ່ງໃຫຍ່ຂອງລູກຫລານເຮົາໃນຊ່ວງນີ້ກໍແມ່ນໄດ້ຜ່ານພົ້ນບັ້ນຮົບສອບເສັງເລື່ອນຊັ້ນ, ເລື່ອນຂັ້ນຂອງນັກຮຽນຊັ້ນປະຖົມຢ່າງທົ່ວເຖິງໃນທົ່ວປະເທດ. ສ່ວນຜົນໄດ້ຮັບອັນເປັນການສະຫລຸບລາຍລະອຽດໃຜໄດ້ໃຜຕົກ ຫລື ສະເລ່ຍເປັນເປີເຊັນແຕ່ລະຊັ້ນແຕ່ລະຂັ້ນໃນຂອບເຂດທົ່ວປະເທດນັ້ນແມ່ນຍັງບໍ່ມີຂໍ້ມູນເທື່ອ, ແຕ່ກໍເຊື່ອໝັ້ນວ່າຕ້ອງຢູ່ໃນລະດັບດີ ອາດສະເລ່ຍ 90 ຫາ 95% ຂອງຈໍານວນຜູ້ທີ່ໄດ້ເຂົ້າສອບເສັງ ຫລື ອາດສູງກວ່ານັ້ນ ເພາະໃນສົກຮຽນແຕ່ລະປີຜ່ານມາ ຜົນການສອບແມ່ນໄດ້ດີໃນທຸກໆປີ.

ແນວໃດກໍຕາມ, ເຖິງຜົນມັນຈະອອກມາແບບໃດ ພວກເຮົາກໍຍັງຖືວ່າໃນພາລະກິດສ້າງຄົນຮຸ່ນສືບທອດຍຸກໃໝ່ທີ່ເປັນຊັບພະຍາກອນຂອງຊາດມັນສຸດທີ່ຍິ່ງໃຫຍ່ໄພສານປຽບເໝືອນບັ້ນຮົບໜຶ່ງທີ່ສໍາຄັນ ແລະ ຢືນຢູ່ແຖວໜ້າໃນພາລະກິດສ້າງສາພັດທະນາປະເທດຊາດ, ຢາກສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ ກ່ອນອື່ນໝົດກໍຕ້ອງສ້າງຄົນໃຫ້ກາຍເປັນຄົນດີ, ຄົນເກັ່ງ ເອີ້ນຢ່າງໜຶ່ງວ່າບັ້ນຮົບທາງດ້ານວັດທະນະທໍານັ້ນເອງ.

ໃນຄວາມເປັນຈິງແລ້ວ, ນັບແຕ່ພັກ ແລະ ລັດຖະບານເຮົາໄດ້ປັບປຸງລະບົບການສຶກສາໃຫ້ມີຄຸນນະພາບ ສາມາດທຽບຖານກັບສາກົນ ໂດຍສະເພາະແມ່ນປັບປຸງຕໍາລາຮຽນ, ຕໍາລາສອນ ນັບທັງວິທີການສົ່ງຄວາມຮູ້ ແລະ ທັງໄດ້ຮັບການຊ່ວຍເຫລືອຈາກເພື່ອນມິດສາກົນ ເຫັນວ່າຄຸນນະພາບຂອງນັກຮຽນໃນທຸກຊັ້ນທຸກຂັ້ນໄດ້ມີຄຸນນະພາບດີຂຶ້ນເລື້ອຍໆ ເຊິ່ງໜຶ່ງໃນບັນຫາທີ່ປາກົດເຫັນຕົວຈິງແມ່ນຜົນການສອບເສັງນັກຮຽນເກັ່ງທົ່ວປະເທດໃນແຕ່ລະປີ ແລະ ແຕ່ລະວິຊາໃນຊັ້ນປະຖົມ-ມັດທະຍົມແມ່ນເພີ່ມຂຶ້ນເລື້ອຍໆ. ດັ່ງຕົວເລກຈໍານວນນັກຮຽນເກັ່ງທີ່ໄດ້ເຂົ້າຮ່ວມສອບເສັງລະດັບຊາດສົກສຶກສາ 2022-2023 ໃນ 4 ວິຊາຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ ແມ່ນມີເຖິງ 144 ນ້ອງ, ຍິງ 64 ນ້ອງ.

ເຖິງຢ່າງໃດກໍດີ, ສິ່ງທີ່ຄວນປັບປຸງ ແລະ ແກ້ໄຂໃນລະບົບການສຶກສານັບແຕ່ຂັ້ນປະຖົມ ແລະ ມັດທະຍົມນັ້ນຄື ບັນຫາການໂຕນຫ້ອງຂອງນັກຮຽນ ຍ້ອນມີຫລາຍປັດໄຈມາກະທົບ ເປັນຕົ້ນສິ່ງແວດລ້ອມອ້ອມຂ້າງ, ການຫລິ້ນກິນເຮຮາ, ເຂົ້າເທັກເຂົ້າບາ, ຕິດເກມ, ຕິດຢາເສບຕິດ, ພໍ່ແມ່ບໍ່ຄ່ອຍມີໂອກາດສຶກສາອົບຮົມລູກເຕົ້າມົວເມົານໍາແຕ່ໄປຊອກຢູ່ຫາກິນ ເຮັດໃຫ້ລູກຂາດຄວາມອົບອຸ່ນຈາກພໍ່ແມ່ ມີຈໍານວນບໍ່ໜ້ອຍພາກັນອອກໂຮງຮຽນຍ້ອນຄວາມທຸກຍາກ, ໃຫ້ໄປອອກແຮງງານຢູ່ໄທ ແລະ ຈາກຜົນກະທົບອື່ນໆ.

ເຖິງຢ່າງໃດກໍດີ, ຖ້າທຽບໃສ່ຫລາຍສິບປີຄືນຫລັງເຫັນວ່າລູກຫລານນັກຮຽນ, ນັກສຶກສາຈໍານວນຫລວງຫລາຍຮຽນດີຮຽນເກັ່ງ, ມີຄວາມກ້າວໜ້າພັດທະນາຕົນເອງຈົນສ້າງຊື່ສຽງໃຫ້ການຈັດຕັ້ງ ແລະ ພໍ່ແມ່ພາກພູມໃຈໃນຜົນງານການສຶກສາຮໍ່າຮຽນໄດ້ເປັນຢ່າງດີ. ຂໍໃຫ້ວັນທີ 1 ມິຖຸນາ ຈົ່ງມີຄວາມໝາຍປະຫວັດສາດຕໍ່ຄົນຮຸ່ນສືບທອດຕະຫລອດໄປ.