ກະຊວງສຶກສາທິການ ແລະ ກິລາ ປະກາດແຕ່ງຕັ້ງພະນັກງານບໍລິຫານ ກົມກວດກາ 4 ຕຳແໜ່ງ

ກະຊວງສຶກສາທິການ ແລະ ກີລາ (ສສກ) ປະກາດແຕ່ງຕັ້ງພະນັກງານດຳລົງຕຳແໜ່ງບໍລິຫານ ກົມກວດກາ ຈຳນວນ 4 ຕຳແໜ່ງ ໃນວັນທີ 29 ພຶດສະພາ 2023 ຜ່ານມາ, ເຂົ້າຮ່ວມໂດຍ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງ ສສກ ແລະ ທ່ານ ອິນທະວົງ ມະນີທອງ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງ ສສກ.

ທ່ານ ອິນທະວົງ ມະນີທອງ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງ ສສກ ສະບັບເລກທີ 1766/ສສກ ລົງວັນທີ 11 ພຶດສະພາ 2023 ວ່າດ້ວຍການແຕ່ງຕັ້ງພະນັກງານດຳລົງຕຳແໜ່ງບໍລິຫານຂອງກົມກວດກາ ໂດຍອີງຕາມດຳລັດຂອງນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງ ສສກ ສະບັບເລກທີ 633/ນຍ ລົງວັນທີ 18 ພະຈິກ 2021 ອີງຕາມຂໍ້ຕົກລົງຂອງລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມກວດກາ ສະບັບເລກທີ 229/ສສກ ລົງວັນທີ 23 ມັງກອນ 2023 ອີງຕາມການສະເໜີຂອງກົວກວດກາ ສະບັບເລກທີ 114/ກກ ລົງວັນທີ 3 ເມສາ 2023 ແລະ ອີງຕາມມະຕິກອງປະຊຸມລັດຖະມົນຕີ ແລະ ຮອງລັດຖະມົນຕີ ຄັ້ງວັນທີ 27 ເມສາ 2023 ແລະ ການຄົ້ນຄວ້ານຳສະເໜີຂອງກົມຈັດຕັ້ງ ແລະ ພະນັກງານ ດັ່ງນັ້ນ ລັດຖະມົນຕີ ກະຊວງ ສສກ ຕົກລົງມາດຕາ 1 ແຕ່ງຕັ້ງ ທ່ານ ບົວພັນ ວົງວິໃນ ຮອງຫົວໜ້າພະແນກກວດກາລັດ ຂຶ້ນເປັນຫົວໜ້າພະແນກກວດກາລັດ ທ່ານ ນາງ ໄພວັນ ສີສົມບັດ ວິຊາການ ຂຶ້ນເປັນຮອງຫົວໜ້າພະແນກກວດກາລັດ ທ່ານ ນາງ ວັນແກ້ວ ໄຊຍະລາດ ວິຊາການ ຂຶ້ນເປັນຮອງຫົວໜ້າພະແນກຕິດຕາມ ປະເມີນຜົນ ແລະ ບໍລິຫານ ແລະ ທ່ານ ໂກ້ ເລືອງທຳມາ ວິຊາການ ຂຶ້ນເປັນຮອງຫົວໜ້າພະແນກກວດກາພັກ ແລະ ຄົ້ນຄວ້າຄຳຮ້ອງ-ຄຳສະເໜີ ເຊິ່ງພະນັກງານທີ່ຖືກແຕ່ງຕັ້ງຂ້າງເທິງມີສິດໄດ້ຮັບເງິນອຸດໜູນຕຳແໜ່ງບໍລິຫານ ປະເພດ 5 ຕາມດຳລັດຂອງນາຍົກລັດຖະມົນຕີ ແລະ ໃຫ້ຫ້ອງການກະຊວງ ສສກ ກົມຈັດຕັ້ງ ແລະ ພະນັກງານ ກົມກວດກາ ພະແນກການເງິນ ກໍຄື ຫ້ອງການ ກະຊວງ ສສກ ຜູ້ກ່ຽວ ແລະ ພາກສ່ວນທີ່ກ່ຽວຂ້ອງຈົ່ງພ້ອມກັນປະຕິບັດຂໍ້ຕົກລົງສະບັບນີ້.