ປະທານສະພາແຫ່ງຊາດ ຊຸກຍູ້ໂຄງການພັດທະນາເຂດຈຸດສຸມຕິດພັນກັບການທ່ອງທ່ຽວ ເມືອງຫີນເຫີບ ແຂວງວຽງຈັນ

ໃນໂອກາດເຂົ້າຮ່ວມ ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຂວງວຽງຈັນ ສະໄໝທີ VI, ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ລົງເຄື່ອນໄຫວຢ້ຽມຢາມ-ຊຸກຍູ້ ໂຄງການພັດທະນາ ເຂດຈຸດສຸມ ການຜະລິດກະສິກຳ, ປູກຝັງ, ລ້ຽງສັດຕິດພັນກັບການທ່ອງທ່ຽວ ຢູ່ບ້ານນ້ຳໂທ່ມ ເມືອງຫີນເຫີບ ແຂວງວຽງຈັນ, ມີທ່ານ ດາວເຮືອງ ນັນທະວົງ ຄະນະປະຈຳພັກແຂວງ, ຮອງເຈົ້າແຂວງວຽງຈັນ ພ້ອມຄະນະຮ່ວມຕິດຕາມ.

ໂດຍອີງໃສ່ແນວທາງນະໂຍບາຍຂອງພັກ ແລະ ລັດ ກ່ຽວກັບການສົ່ງເສີມວຽກງານການຜະລິດກະສິກໍາ ຕິດພັນກັບການທ່ອງທ່ຽວ ແບບອານຸລັກທຳມະຊາດ. ດັ່ງນັ້ນ, ບໍລິສັດ ສົມສະຫ່ວາງຟາມ ຈຳກັດຜູ້ດຽວ  ຈຶ່ງຕັດສິນໃຈ ລົງສຳຫລວດພື້ນທີ່ຕົວຈິງໃນຂອບເຂດເມືອງສັງທອງ ແລະ ເມືອງຫີນເຫີບ, ຜ່ານການສໍາຫລວດຕົວຈິງເຫັນວ່າເຂດດັ່ງກ່າວມີຄວາມເໝາະສົມ ແລະ ເອື້ອອຳນວຍຄວາມສະດວກຫລາຍດ້ານ ເປັນຕົ້ນສະພາບດິນຟ້າອາກາດ, ມີແຫລ່ງນໍ້າທໍາມະຊາດໄຫລຕະຫລອດປີ, ພື້ນທີ່ດິນມີຄວາມອຸດົມສົມບູນໄປດ້ວຍພູຜາປ່າໄມ້, ພູເຂົາເກາະກາຍ ສະລັບສັບຊ້ອນ, ມີຄວາມສວຍງາມ ເໝາະສົມແກ່ການພັດທະນາເປັນແຫລ່ງທ່ອງທ່ຽວ ແບບອະນຸລັກທໍາມະຊາດ, ໃນເນື້ອທີ່ດິນທີ່ສຳຫລວດໄດ້ 1.100 ເຮັກຕາ, ບໍລິສັດໄດ້ຊົດເຊີຍກໍາມະສິດນໍາໃຊ້ທີ່ດິນໃຫ້ແກ່ປະຊາຊົນສຳເລັດ ເຊິ່ງຈຸດປະສົງຂອງໂຄງການ ເພື່ອພັດທະນາທາງດ້ານການຜະລິດກະສິກຳ, ປູກຝັງ, ລ້ຽງສັດ ຕິດພັນການທ່ອງທ່ຽວ ແບບອານຸລັກທຳມະຊາດ, ເພື່ອສ້າງວຽກເຮັດງານທໍາໃຫ້ແກ່ປະຊາຊົນຜູ້ທີ່ວ່າງງານ, ຮັບປະກັນສະບຽງອາຫານ ແລະ ຫລຸດຜ່ອນການນຳເຂົ້າສິນຄ້າກະສິກຳຈາກຕ່າງປະເທດ, ຄາດຄະເນມູນຄ່າການລົງທຶນທັງໝົດ 1.000 ຕື້ກີບ, ໄລຍະການກໍ່ສ້າງໂຄງການໃຫ້ສຳເລັດ 7 ປີ, ນັບແຕ່ທ້າຍປີ 2019 ຮອດປັດຈຸບັນ ສາມາດປະຕິບັດໄດ້ 40% ມີມູນຄ່າເທົ່າກັບ 400 ຕື້ກີບ ໂດຍໄດ້ນຳໃຊ້ເຂົ້າໃນການບຸກເບີກ, ກໍ່ສ້າງເສັ້ນທາງ ເຂົ້າຫາໂຄງການ ແລະ ພາຍໃນໂຄງການສຳເລັດ, ບຸກເບີກຈັດສັນພື້ນທີ່ໄດ້ 1.100 ເຮັກຕາ, ກໍ່ສ້າງອ່າງເກັບນໍ້າ ຂະໜາດໃຫຍ່ ຮັບໃຊ້ການຜະລິດໄດ້ 4 ອ່າງ, ກໍ່ສ້າງ ລະບົບຊົນລະປະທານ (ເໝືອງຝາຍ), ກໍ່ສ້າງ ຄອກລ້ຽງສັດ ເຊັ່ນ: ຄອກງົວ, ແບ້, ໝູ ແລະ ຄອກສັດປີກ, ກໍ່ສ້າງອາຄານເຮືອນພັກ, ໂຮງແຮມ, ຈຸດຊົມວິວ ແລະ ຮ້ານອາຫານ, ເຮັດໜອງປາ 18 ໜອງ, ເຮັດນາປູກເຂົ້າ 2 ລະດູ ໃນເນື້ອທີ່ 200 ເຮັກຕາ, ຜົນຜະລິດສະເລ່ຍ 1.200 ໂຕນຕໍ່ປີ, ປູກຕົ້ນໄມ້ກິນໝາກ (ໝາກມ່ວງ, ໝາກພ້າວ) 1.000 ຕົ້ນ, ບຸກເບີກຄັງຫຍ້າ ເພື່ອລ້ຽງສັດ 60 ເຮັກຕາ, ລ້ຽງງົວ 500 ໂຕ, ລ້ຽງແບ້ 600 ໂຕ. ນອກນັ້ນ, ຍັງລ້ຽງສັດປີກ ແລະ ສັດນໍ້າ ຈໍານວນໜຶ່ງ ເພື່ອຮັບໃຊ້ໃຫ້ໂຄງການ. ໃນອະນາຄົດ ບໍລິສັດຍັງມີແຜນສືບຕໍ່ພັດທະນາໂຄງການຄື: ຈະຂະຫຍາຍເນື້ອທີ່ 500 ເຮັກ ຕາ, ສືບຕໍ່ສ້າງອາຄານ, ເຮືອນພັກ, ໂຮງແຮມ ແລະ ຮ້ານອາຫານ.

ໃນໂອກາດດຽວກັນ, ທ່ານ ໄຊສົມພອນ ພົມວິຫານ ກໍໄດ້ສະແດງຄວາມຍ້ອງຍໍຊົມຊົມມາຍັງບໍລິສັດ ທີ່ໄດ້ມີຄວາມຕັດສິນໃຈສູງ ລົງທຶນພັດທະນາເຂດໂຄງການດັ່ງກ່າວນີ້ ແລະ ໄດ້ແນະນຳໃຫ້ບໍລິສັດ ຕ້ອງໄດ້ມີແຜນການໃຫ້ລະອຽດ, ເອົາໃຈໃສ່ທາງດ້ານວິຊາການ ແລະ ການຕະຫລາດ, ພ້ອມທັງການຮັກສາສິ່ງແວດລ້ອມ ແລະ ໃຫ້ປະຊາຊົນໄດ້ມີສ່ວນຮ່ວມຫລາຍຂຶ້ນອີກ.