ລີເວີພູລ ພ້ອມມອບເສື້ອເບີ 10 ໃຫ້ ແມັກ ອັລລິສເຕີ ສານຕໍ່

ລີເວີພູລ ຕົກເປັນຂ່າວວ່າ ພ້ອມມອບເສື້ອເບີ 10 ໃຫ້ກັບ ອາເລັກຊິສ ແມັກ ອັລລິສເຕີ ກອງກາງ ໄບຣຕັນ ຫາກການຍ້າຍທີມສຳເລັດ ໂດຍຂະນະນີ້ນັກເຕະກຽມບັນລຸຂໍ້ຕົກລົງສ່ວນຕົວກັບ ລີເວີພູລ ແລ້ວ.

ໂດຍ ແມັກ ອັລລິສເຕີ ຄືເປົ້າຫມາຍຕົ້ນຕໍໃນການເສີມທີມຂອງລີເວີພູລ ຕະຫລາດນັກເຕະລະດູການນີ້ ຫລັງນັກເຕະສ້າງຜົນງານໃຫ້ກັບ ໄບຣຕັນ ລວມເຖິງທີມຊາດອາເຈນຕີນາ ໄດ້ຢ່າງໂດດເດັ່ນ.

ຜ່ານມາ ລີເວີພູລ ໄດ້ເປີດສາກເຈລະຈາກັບນັກເຕະແລ້ວວ່າຈະມອບສັນຍາໃຫ້ນັກເຕະເຖິງປີ 2028 ສ່ວນເລື່ອງຄ່າຕົວນັ້ນຄາດວ່າຢູ່ທີ່ 70 ລ້ານຢູໂຣ.

ຫລ້າສຸດ The Mirror ເປີດເຜີຍໂດຍອ້າງອີງຈາກສື່ອາເຈນຕີນາວ່າ ລີເວີພູລ ຈະມອບເສື້ອເບີ 10 ເຊິ່ງກ່ອນໜ້ານີ້ເປັນຂອງ ຊາດີໂອ ມາເນ ແລະ ປັດຈຸບັນຍັງຫວ່າງຢູ່ໃຫ້ກັບ ແມັກ ອັລລີສເຕີ ຫາກດາວເຕະອາຍຸ 24 ປີຍ້າຍມາຢູ່ໃນຖິ່ນ ແອນຟິລ ແລະ ເປັນເບີທີ່ລາວໃສ່ຕັ້ງແຕ່ຢູ່ກັບ ອາເຈນຕີນອສ ຈູເນຍ ແລະ ໄບຣຕັນ.

ຂະນະທີ່ ຟາບຣີຊີໂອ ໂຣມາໂນ ລາຍງານເພີ່ມວ່າ ດາວເຕະອາຍຸ 24 ປີຈະເຈລະຈາອະນາຄົດຂອງຕົນເອງພາຍໃນທ້າຍອາທິດນີ້ ເຊິ່ງການຍ້າຍທີມໜ້າຈະເກີດຂຶ້ນໃນໄວໆນີ້ ໂດຍລີເວີພູລ ພວມຊຸກຍູ້ເພື່ອປິດການຊື້ຂາຍໃຫ້ໄດ້ ຫລັງສັນຍາສ່ວນຕົວເກືອບຈະຕົກລົງກັນໄດ້ທັງຫມົດແລ້ວ ເຊິ່ງລາຍລະອຽດສຸດທ້າຍຈະຖືກສະສາງຢ່າງໄວວາທີ່ສຸດເພື່ອຫລີກລ່ຽງເຫດທີ່ອາດເກີດຂຶ້ນຕ່າງໆ.