ຖອດຖອນບົດຮຽນການປູກໄມ້ຈາກປີຜ່ານມາ ບໍ່ຄວນແລ່ນນຳຂະບວນການ

ກ່ອນຈະຮອດວັນປູກຕົ້ນໄມ້ແຫ່ງຊາດເຮົາຈະເຫັນວ່າລັດຖະມົນຕີກະຊວງກະສິກຳ ແລະ ປ່າໄມ້ອອກແຈ້ງການເລື່ອງ: ການສ້າງຂະບວນການປູກຕົ້ນໄມ້ໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ເປັນປະຈຳທຸກໆປີ ແລະ ປີ 2023 ນີ້ ກໍເຊັ່ນດຽວກັນໂດຍໄດ້ອອກແຈ້ງການເຖິງຫົວໜ້າຫ້ອງການ, ກົມ ແລະ ສະຖາບັນ ອ້ອມຂ້າງກະຊວງກະສິກຳ ແລະ ປ່າໄມ້, ຫົວໜ້າພະແນກກະສິກຳແລະ ປ່າໄມ້ແຂວງ, ນະຄອນຫຼວງວຽງຈັນ ໃຫ້ເອົາໃຈໃສ່ສ້າງຂະບວນການປູກໄມ້ໃຫ້ກວ້າງຂວາງຕິດພັບກັບວັນເດັກນ້ອຍສາກົນ ຕາມຄຳຂວັນທີ່ວ່າ: ຊົມເຊີຍວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄົບຮອບ 53 ປີຢ່າງສຸດໃຈ, ປູກໄມ້ໃນວັນນີ້ເພື່ອລູກຫຼານໃນວັນໜ້າ ແລະ ຈົ່ງຊ່ວຍກັນປູກຕົ້ນໄມ້ໃຫ້ເປັນປ່າ ເພື່ອເປັນສິນຄ້າ ແລະ ປົກປັກຮັກສາສິ່ງແວດລ້ອມ ຫຼຸດຜ່ອນການປ່ຽນແປງດິນຟ້າອາກາດ.

ເນື້ອໃນແຈ້ງການນີ້ເຫັນວ່າດີແທ້ ເພາະໄດ້ແນະນຳໃຫ້ແຕ່ລະພາກສ່ວນເອົາໃຈໃສ່ສ້າງຂະບວນການປູກໄມ້ໃຫ້ຟົດຟຶ້ນ ແລະກວ້າງຂວາງ ແນໃສ່ ສ້າງພື້ນທີ່ສີຂຽວຕາມເງື່ອນໄຂ ແລະ ຄວາມສາມາດຕົວຈິງໃນແຕ່ລະທ້ອງຖິ່ນ, ທັງເປັນການສົ່ງເສີມປູກໄມ້ຟື້ນຟູປ່າທຳມະຊາດໃຫ້ເປັນຂະບວນກ້ວາງຂວາງ ແລະ ບັນລຸຕາມຄາດໝາຍທີ່ວາງໄວ້ຊຶ່ງແມ່ນໜ້າທີ່ຂອງພະແນກກະສິກຳ ແລະ ປ່າໄມ້ແຂວງ, ນະຄອນຫຼວງວຽງຈັນເປັນເຈົ້າການປະສານສົມທົບຫ້ອງການກະສິກຳ ແລະ ປ່າໄມ້ເມືອງ, ນະຄອນ, ພາກສ່ວນກ່ຽວຂ້ອງ, ທັງບໍລິສັດ ແລະ ຜູ້ປະກອບການເອົາໃຈໃສ່ກຳນົດເນື້ອທີ່ດິນປ່າໄມ້ຊຸດໂຊມ ແລະ ປອກໂລ້ນ ໃນເຂດປ່າປ້ອງກັນ, ປ່າສະຫງວນເພື່ອຈັດສັນການປູກໄມ້, ກຳນົດຟື້ນຟູປ່າທຳມະຊາດເພື່ອປົກປັກຮັກສາເຂດຍອດນ້ຳ, ແຫຼ່ງນ້ຳໃຫ້ແກ່ໂຄງການເຂື່ອນໄຟຟ້ານ້ຳຕົກເພື່ອປົກປັກຮັກສາສິ່ງແວດລ້ອມ.

ຫຼາຍປີຜ່ານມານັ້ນ ພາຍຫຼັງການຈັດພິທີປູກໄມ້ຢ່າງເປັນທາງການແລ້ວ ສ່ວນຫຼາຍມັກຈະປ່ອຍປະລະເລີຍບໍ່ເອົາຫົວໃສ່ໃຈຊານຳອີກ ຂາດການຕິດຕາມ ບົວລະບັດປົກປັກຮັກສາ ປູກແລ້ວກໍ່ປະໃຫ້ທຳມະຊາດບໍລິຫານກັນເອງຕາມມີຕາມເກີດ ເປັນເຫດເຮັດໃຫ້ຕົ້ນໄມ້ທີ່ປູກລົງໄປນັ້ນຈຳນວນບໍ່ໜ້ອຍ ຫ່ຽວແຫ້ງ ແລະ ຕາຍໄປໃນທີ່ສຸດໂດຍລວມແລ້ວອັດຕາການລອດເຫຼືອຂອງຕົ້ນໄມ້ບໍ່ທັນດີເທົ່າທີ່ຄວນ ມີບາງບ່ອນຕ້ອງໄດ້ຈັດສັນງົບປະມານຊື້ເບ້ຍໄມ້ມາປູກແຊມຄືນກໍ່ມີໃຫ້ເຫັນຢ່າງຫຼວງຫຼາຍ ຊຶ່ງສ່ວນຫຼາຍແລ້ວຈະເກີດຂື້ນນຳເບື້ອງພາກລັດ, ກົງກັນຂ້າມກັບສ່ວນພາກເອກະຊົນ, ບໍລິສັດ ຫຼື ນັກທຸລະກິດພັດເຫັນວ່າອັດຕາການລອດເຫຼືອ ແລະຈະເລີນເຕີບໂຕຂອງຕົ້ນໄມ້ຍັງກວມອັດຕາສ່ວນສູງ.

ພາຍຫຼັງປູກແລ້ວຕ້ອງມອບຄວາມຮັບຜິດຊອບຂາດຕົວໃຫ້ຂະແໜງປ່າໄມ້ ຫ້ອງການກະສິກຳ ແລະ ປ່າໄມ້ເມືອງ,ນະຄອນ ຈັດຕັ້ງວຽກງາານສົ່ງເສີມປູກໄມ້ ມີການແຕ່ງຕັ້ງພະນັກງານວິຊາການ ເພື່ອລົງຊຸກຍູ້ສົ່ງເສີມແນະນຳເຕັກນິກວິຊາການປູກ, ບົວລະບັດປົກປັກຮັກສາຕົ້ນໄມ້ທີ່ປູກໄປແລ້ວໃຫ້ຈະເລີນເຕີບໃຫຍ່ ຮັກສາອັດຕາການລອດຕາຍຂອງເບ້ຍໄມ້ ແລະ ດຳເນີນການປູກທົດແທນຕົ້ນໄມ້ທີ່ຕາຍ ໃຫ້ບັນດາອົງການປູກໄມ້ຂອງລັດ, ບໍລິສັດ, ຜູ້ປະກອບການ ແລະ ປະຊາຊົນ, ແນໃສ່ເຮັດໃຫ້ການປູກໄມ້ກາຍເປັນຮູບປະທຳ ແລະ ມີປະສິດທິຜົນກວ່າເກົ່າ, ປູກໄມ້ຕ້ອງຮັບປະກັນປະສິດທິພາບ ບໍ່ຄວນແລ່ນນຳຂະບວນການ,ບໍ່ຄວນແລ່ນນຳປະລິມານ, ບັນຫານີ້ມັນຍັງເປັນໂຈດໃຫຍ່ທີ່ທຸກພາກສ່ວນຕ້ອງໄດ້ແກ້ໄຂຮ່ວມກັນໃຫ້ສຳເລັດ ເພື່ອປົກປັກຮັກສາປ່າໄມ້ ໃຫ້ອຸດົມສົມບູນຕະຫຼອດໄປ.