ສ.ເກົາຫລີ ມອບທຶນ 2,1 ລ້ານກວ່າ ໂດລາສະຫະລັດ ໃຫ້ຄະນະກະເສດສາດ ມະຫາວິທະຍາໄລແຫ່ງຊາດລາວ ເພື່ອຈັດຕັ້ງຫລັກສູດລ້ຽງນົມງົວ

ວັນທີ 26 ພຶດສະພາ 2023 ຜ່ານມາ, ເຊັນສັນຍາໂຄງການຈັດຕັ້ງຫຼັກສຸດລ້ຽງງົວນົມ ເພື່ອປັບປຸງຫຼັກສູດໃນການລ້ຽງສັດ ໃນພາກລ້ຽງສັດ ແລະ ການປະມົງ ໂດຍມີ ທ່ານ ກິ່ງມະໂນ ພົມມະໄຊ, ຮອງລັດຖະມົນຕີ ກະຊວງ ສຶກສາທິການ ແລະ ກິລາ, ທ່ານ ຢອງຊູ ຈອງ ເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ, ທ່ານ ປອ ວັນນະທອນ ພຸດທະນາ ຮອງຄະນະບໍດີ ຄະນະກະເສດສາດ ມະຫາວິທະຍາໄລແຫ່ງຊາດ

ໂດຍໂຄງການດັ່ງກ່າວ ແມ່ນຈະໄດ້ຮັບທຶນການຊ່ວຍເຫຼືອຈາກ ກະຊວງສຶກສາ ຂອງ ເກົາຫຼີໃຕ້ ເປັນຈຳນວນເງີນ 1,785,714 ໂດລາ ແລະ ທຶນຈາກມະຫາວິທະຍາໄລແຫ່ງຊາດ ເຊອຸນ (Seoul National University) ເປັນເງິນ 333,361 ໂດລາ ລວມທັງໝົດເປັນເງີນຢູ່ 2,119,076 ໂດລາ ໂດຍມີໄລຍະດຳເນີນການຢູ່ 7 ປີ ແລະ ໄດ້ຮ່ວມມືທັງໝົດ 4 ພາກສ່ວນ ໄດ້ແກ່ ຄະນະກະເສດສາດ ມະຫາວິທະຍາໄລແຫ່ງຊາດ, ມະຫາວິທະຍາໄລ ເຊອຸນ (Seoul National University), ມະຫາວິທະຍາໄລ ຮານຄະຢອງ (Hankyung University) ແລະ ອົງການ Milk for lao.

ຕະຫລອດໄລຍະເວລາ 8 ປີ ທີ່ຜ່ານມາ ຄະນະກະເສດສາດ ມະຫາວິທະຍາໄລແຫ່ງຊາດ ກັບ ມະຫາວິທະຍາ ເຊອຸນ ຈາກ ສ.ເກົາຫຼີແມ່ນໄດ້ຮ່ວມມືການຢ່າງໃກ້ຊິດໃນການແລກປ່ຽນແນວທາງການພັດທະນາ ອຸດສາຫະກຳລ້ຽງງົວນົມໃນລາວ ແລະ ຫຼ້າສຸດຈະມີການຮ່ວມມືໃນ ໂຄງການຈັດຕັ້ງຫຼັກສູດລ້ຽງງົວນົມ ເພື່ອປັບປຸງຫຼັກສູດໃນການລ້ຽງສັດ ໃນພາກລ້ຽງສັດ ແລະ ການປະມົງ ມະຫາວິທະຍາໄລແຫ່ງຊາດ ທີ່ຈະເປັນຂີດໝາຍອີກບາດກ້າວຄວາມສຳຄັນໃນການຮ່ວມມືລະຫວ່າງສອງມະຫາວິທະຍາໄລທັງ 2 ປະເທດ.