ສະຫະລັດ-ແມັກຊິໂກ ຮຽກຮ້ອງອະນາໄມໂລກປະກາດພາວະສຸກເສີນ ພະຍາດເຍື່ອຫຸ້ມສະໝອງອັກເສບ ເນື່ອງຈາກການສັນຍະກຳ

ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນສະຫະລັດອາເມຣິກາ ໃນວັນທີ 26 ພຶດສະພາ 2023 ຜ່ານມາວ່າ: ສູນຄວບຄຸມ ແລະ ປ້ອງກັນພະຍາດ ລະບຸວ່າ: ມີຜູ້ເສຍຊີວິດຢ່າງໜ້ອຍ 2 ຄົນ ຈາກພະຍາດເຍື່ອຫຸ້ມສະໝອງອັກເສບ ຫລັງເຂົ້າຮັບການຜ່າຕັດເຊິ່ງມີການສັກຢາບໍລິເວນ ເຍື່ອໄຂສັນຫລັງ ,ເຮັດໃຫ້ມີການເຝົ້າສັງເກດປະຊາຊົນເກືອບ 400 ຄົນ ໃນສະຫະລັດ ແລະ ແມັກສິໂກ ແລະ ສັ່ງປິດຄລີນິກ 2 ແຫ່ງ ໃນເມືອງມາຕາໂມໂຣສ.

ທາງການສະຫະລັດ ແລະ ແມັກຊິໂກ ຮຽກຮ້ອງໃຫ້ຜູ້ທີ່ເຂົ້າຮັບການຜ່າຕັດ ທີ່ກ່ຽວຂ້ອງກັບການສັກຢາຊາໃນລັກສະນະດັ່ງກ່າວ ບໍ່ວ່າຈະເປັນສູນສັນຍະກຳ ຕັ້ງແຕ່ເດືອນມັງກອນທີ່ຜ່ານມາ, ເຂົ້າຮັບການປະເມີນ ເຖິງຈະບໍ່ມີການສະແດງອາການໃດໆກໍຕາມ  ນອກນັ້ນ, ໜ່ວຍງານຍັງພົບຜູ້ຕ້ອງສົງໄສຫລາຍກວ່າ 25 ຄົນໃນສະຫະລັດ.

ເນື່ອງຈາກການບໍລິການທາງການແພດທີ່ມີລາຄາຖືກ ພົນລະເມືອງສະຫະລັດຈຳນວນຫລາຍມັກເດີນທາງໄປແມັກຊິໂກເພື່ອສັນຍະກຳຕ່າງໆ ເປັນຕົ້ນ: ການດູດໄຂມັນ, ເສີມນົມ ແລະ ການສັກໄຂມັນເສີມສະໂພກ ເຊິ່ງທັງໝົດນີ້ຈຳເປັນຕ້ອງສັກຢາຊາເຂົ້າບໍລິເວນກະດູກສັນຫລັງ.

ທາງສູນຄວບຄຸມ ແລະ ປ້ອງກັນພະຍາດກ່າວວ່າ: ການລະບາດທີ່ເກີດຂຶ້ນໃນປັດຈຸບັນຄາດວ່າມີສາເຫດມາຈາກການປົນເປື້ອນໃນຕົວຢາທີ່ໃຊ້ໃນລະຫວ່າງການສັກຢາຊາ ຫລື ຢາອື່ນໆ ທີ່ຖືກໃຊ້ເພີ່ມໃນລະຫວ່າງການຜ່າຕັດ ເຊັ່ນ: ມໍຟິນ ເນື່ອງຈາກແມັກຊິໂກປະສົບບັນຫາຂາດແຄນຢາໃນຂະນະນີ້ ແລະ ມີຄວາມເປັນໄປໄດ້ວ່າ ຕະຫລາດອາດມີການຈຳໜ່າຍຢາທີ່ປົນເປື້ອນ.