ກອງປະຊຸມ ສະຫລຸບຕີລາຄາການນໍາພາ-ຊີ້ນໍາວຽກງານຮອບ ດ້ານກາງສະໄໝ 2021-2023 ແລະ ທິດທາງແຜນການທ້າຍສະໄໝ 2023-2025 ຂອງ ຄະນະພັກຮາກຖານ ຄັງເງິນແຫ່ງຊາດ

ວັນທີ 25 ພຶດສະພາ 2023 ຜ່ານມາ, ຄະນະພັກຮາກຖານຄັງເງິນແຫ່ງຊາດ ຈັດກອງປະຊຸມໂດຍການເຂົ້າຮ່ວມໂອ້ລົມຂອງ ສະຫາຍ ພູທະນູເພັດ ໄຊສົມບັດ ກໍາມະການປະຈໍາພັກ ກະຊວງການເງິນ, ປະທານກວດກາພັກ, ຮອງລັດຖະມົນຕີກະຊວງການເງິນ, ມີສະຫາຍ ນາງ ວັນພອນ ພົມມະສອນ ກໍາມະການຄະນະປະຈໍາພັກກະຊວງ, ເລຂາຄະນະພັກຮາກຖານຄັງເງິນແຫ່ງຊາດ, ມີສະຫາຍ ກົງຄໍາ ສິດທິວໍລະດາ ກໍາມະ ການພັກກະຊວງ, ເລຂາໜ່ວຍພັກຮາກຖານກົມຈັດຕັ້ງ ແລະ ພະນັກງານ, ມີເລຂາໜ່ວຍພັກຮາກຖານກົມກວດກາ, ຄະນະພັກຮາກຖານຄັງເງິນແຫ່ງຊາດ, ເລຂາ-ຮອງເລຂາໜ່ວຍພັກ ແລະ ສະມາຊິກພັກທີ່ຂຶ້ນກັບຄະນະພັກຮາກ ຖານຄັງເງິນແຫ່ງຊາດ ເຂົ້າຮ່ວມ.

ກອງປະຊຸມຄັ້ງນີ້, ເປັນຂີດໝາຍຂອງການສືບຕໍ່ປັບປຸງ, ກໍ່ສ້າງອົງການຈັດຕັ້ງພັກໃຫ້ມີຄວາມໜັກແໜ້ນ, ເຂັ້ມແຂງ, ບັນດາຜູ້ເຂົ້າຮ່ວມໄດ້ພ້ອມກັນຮັບຟັງ ແລະ ຮັບຮອງເອົາບົດສະຫລຸບຕີລາຄາການນໍາພາ-ຊີ້ນໍາວຽກງານ ຮອບດ້ານ, ບົດສໍາຫລວດການນໍາພາ ລວມຂອງຄະນະພັກຮາກຖານຄັງເງິນແຫ່ງຊາດ ແລະ ບົດສະຫລຸບການຈັດຕັ້ງ ປະຕິບັດແຜນພັດທະນາຂະແໜງຄັງເງິນໄລຍະກາງສະໄໝ (2021-2023) ແລະ ທິດທາງແຜນການທ້າຍສະໄໝ (2023-2025) ພ້ອມໄດ້ຮັບຟັງການປະກອບຄໍາເຫັນຂອງບັນດາສະຫາຍສະມາຊິກພັກ ແລະ ໄດ້ລົງຄະແນນສຽງ ທາບທາມຄວາມໄວ້ວາງໃຈ ແລະ ບໍ່ໄວ້ວາງໃຈຕໍ່ການນໍາພາ-ຊີ້ນໍາຂອງຄະນະພັກຮາກຖານຄັງເງິນແຫ່ງຊາດ ໃນການ ຈັດຕັ້ງປະຕິບັດວຽກງານຮອບດ້ານໄລຍະຜ່ານມາ. ຄຽງຄູ່ກັນນີ້, ໄດ້ສຶກສາອົບຮົມກັບທີ່ເພື່ອເຮັດໃຫ້ສະມາຊິກພັກ, ພະນັກງານມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ, ມີຄວາມເຂົ້າໃຈຕໍ່ກັບສະພາບການຂອງໂລກ ແລະ ພາຍໃນປະເທດ, ເອົາໃຈໃສ່ນໍາພາ-ຊີ້ນໍາໃນການປັບປຸງກົງຈັກການຈັດຕັ້ງຂອງພັກ ໃຫ້ສອດຄ່ອງກັບການຈັດຕັ້ງ ຂອງລັດ, ປັບປຸງບັນດານິຕິກໍາທີ່ຕິດພັນກັບວຽກງານຄຸ້ມຄອງພະນັກງານ, ສັບຊ້ອນ-ຈັດວາງພະນັກງານນໍາພາ-ຄຸ້ມ ຄອງ, ເພື່ອຮັບຜິດຊອບແຕ່ລະຕໍາແໜ່ງໃນຂະແໜງຄັງເງິນ ໃຫ້ສອດຄ່ອງກັບການນໍາພາວຽກງານຕົວຈິງ, ສາມາດສະ ຫລຸບຕີລາຄາຄືນການນໍາພາ-ຊີ້ນໍາວຽກງານຮອບດ້ານຂອງ ຄະນະພັກຮາກຖານຄັງເງິນແຫ່ງຊາດໃນເຄິ່ງສະໄໝ ມີທັງດ້ານດີ ທີ່ຕັ້ງໜ້າ, ບາງບັນຫາທີ່ພົ້ນເດັ່ນ, ວຽກງານທີ່ຈັດຕັ້ງປະຕິບັດສໍາເລັດ, ດ້ານຄົງຄ້າງ ແລະ ທິດທາງແຜນການທ້າຍສະໄໝ (2023-2025).

ໂອກາດນີ້, ສະຫາຍ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ໄດ້ໃຫ້ທິດຊີ້ນຳຕໍ່ກອງປະຊຸມ ໂດຍສະຫາຍໄດ້ຊົມເຊີຍຕໍ່ຄະນະພັກຮາກຖານ, ບັນດາສະຫາຍໃນຄະນະໜ່ວຍພັກ, ຕະຫລອດຮອດສະມາຊິກພັກ-ພະນັກງານທີ່ໄດ້ຕັ້ງໜ້າປະ ກອບສ່ວນເຂົ້າໃນໜ້າທີ່ການເມືອງທີ່ໄດ້ຮັບມອບໝາຍ ເປັນຕົ້ນ ໄດ້ສຸມໃສ່ການຄົ້ນຄວ້າ, ສ້າງນິຕິກໍາຕ່າງໆ ເພື່ອເປັນ ເຄື່ອງມືໃນການເຄື່ອນໄຫວນໍາພາ-ຊີ້ນໍາວຽກງານວິຊາສະເພາະ ນັບແຕ່ສູນກາງຮອດທ້ອງຖິ່ນໃຫ້ບັນລຸຜົນສໍາເລັດ ຕາມແຜນການທີ່ວາງ. ພ້ອມນີ້, ສະຫາຍຍັງໄດ້ເນັ້ນຄະນະພັກຮາກຖານຄັງເງິນແຫ່ງຊາດ ເພີ່ມທະວີການສຶກສາອົບ ຮົມການເມືອງ-ແນວຄິດໃຫ້ແກ່ສະມາຊິກພັກ-ພະນັກງານ, ເຊື່ອມຊຶມ ແລະ ກໍາແໜ້ນແນວທາງປ່ຽນແປງໃໝ່ຂອງພັກ, ເຊີດຊູນໍ້າໃຈຮັບຜິດຊອບໃນໜ້າທີ່ການເມືອງທີ່ໄດ້ຮັບມອບໝາຍ. ພ້ອມກັນນັ້ນກໍຕ້ອງມີມາດຕະການເດັດຂາດຕໍ່ ສະມາຊິກພັກ-ພະນັກງານທີ່ເສຍທາດຂາດຄຸນ, ລະເມີດກົດລະບຽບຂອງພັກຮັບສິນບົນ, ໃຫ້ສິນບົນ, ບໍ່ມີຄວາມ ໂປ່ງໄສຕ້ອງແກ້ໄຂທັນເວລາ ແລະ ເດັດຂາດຕໍ່ຜູ້ລະເມີດຕໍ່ກົດລະບຽບຂອງພັກຢ່າງເຂັ້ມງວດ ແລະ ມີຄວາມເປັນ ເອກະພາບ ພ້ອມກັນປະຕິບັດໜ້າທີ່ການເມືອງຂອງຕົນໃຫ້ມີຜົນສຳເລັດຕາມຄາດໜາຍທີ່ວາງໄວ້ ເພື່ອຮັກສານາມ ມະຍົດສ້າງບັນດາໜ່ວຍພັກທີ່ຂຶ້ນກັບໃຫ້ກາຍ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕະຫລອດໄປ.