ປະຊາຊົນ ຟີລິບປິນ ເປັນພະຍາດແຂ້ວແມງ ຢ່າງໜ້ອຍ 73 ລ້ານຄົນ

ຂ່າວຕ່າງປະເທດລາຍງານ, ກະຊວງສາທາລະນະສຸກຂອງຟີລິບປິນໄດ້ເປີດເຜີຍບົດລາຍງານວ່າ: ປະຊາຊົນພາຍໃນປະເທດຢ່າງໜ້ອຍ 73 ລ້ານຄົນມີພະຍາດແຂ້ວແມງ ໂດຍຊີ້ໃຫ້ເຫັນວ່າ ພະຍາດດັ່ງກ່າວກຳລັງກາຍເປັນບັນຫາສຸຂະພາບຮ້າຍແຮງລະດັບປະເທດ.

ກະຊວງສາທາລະນະສຸກຂອງຟີລິບປິນລະບຸວ່າ: ພະຍາດແຂ້ວແມງກາຍເປັນພະຍາດລະບາດງຽບ ໂດຍຈຳນວນຜູ້ທີ່ເປັນພະຍາດແຂ້ວແມງໃນປັດຈຸບັນເພີ່ມສູງຂຶ້ນຫຼາຍ ເພາະການແຜ່ລະບາດຂອງພະຍາດໂຄວິດ-19 ຂັດຂວາງການເຂົ້າເຖິງການບໍລິການທັນຕະກຳຂອງຄົນຟີລິບປິນເປັນເວລາດົນກວ່າ 2 ປີ. ປັດຈຸບັນ, ເດັກນ້ອຍຟີລິບປິນ 8 ໃນ 10 ຄົນ ເປັນພະຍາດແຂ້ວແມງ ຫຼື ແຂ້ວນ້ຳນົມເປັນແມງ ເນື່ອງຈາກຖືກລ້ຽງດ້ວຍນົມຜົງທີ່ລົດຫວານ ເຮັດໃຫ້ພະຍາດໃນຊ່ອງປາກຍັງຄົງເປັນບັນຫາສາທາລະນະສຸກຮ້າຍແຮງໃນປະເທດ.

ອົງການອະນາໄມໂລກ (WHO) ກ່າວວ່າ ພະຍາດແຂ້ວແມງເປັນບັນຫາສາທາລະນະລະດັບໂລກທີ່ສຳຄັນ, ເປັນພະຍາດທີ່ບໍ່ສາມາດຕິດຕໍ່ໄດ້ ແລະ ແຜ່ກະຈາຍຫຼາຍທີ່ສຸດ.