ປກສ ເມືອງໄຊເສດຖາສົ່ງກຳລັງລົງກວາດລ້າງແກ້ງຄ້າຂາຍຢາເສບຕິດ.
ເຈົ້າໜ້າທີ່ ປກສ ເມືອງໄຊເສດຖານະຄອນຫລວງວຽງຈັນ ໃຫ້ຮູ້ວ່າ: ນັບແຕ່ທ້າຍເດືອນສິງຫາມານີ້, ກຳລັງເຈົ້າໜ້າທີ່ຂອງຕົນລົງສົມທົບກັບ ປກສ ກຸ່ມບ້ານ ນາບົງ, ໄດ້ລົງແກ້ໄຂເປົ້າໝາຍຊື້ຂາຍຢາເສບຕິດຢູ່ບ້ານນາບົງເມືອງໄຊທານີ, ສາມາດຈັບຜູ້ຕ້ອງຫາຄື: ທ້າວ ປ໋ອກ ອາຍຸ 30 ປີຢູ່ບ້ານໄຮຄຳເມືອງໄຊເສດຖານະຄອນຫລວງວຽງຈັນ ແລະ ໃນວັນທີ 30 ສິງຫາຜ່ານມາ, ເຈົ້າໜ້າທີ່ລົງສົມທົບກັບ ປກສ ກຸ່ມບ້ານໄຮຄຳ ຈັບຕົວຜູ້ຮ່ວມຂະບວນການໄດ້ເພີ່ມອີກ 3 ຄົນຄື: ທ້າວ ກະແຕ ອາຍຸ 26 ປີຢູ່ບ້ານນາຄວາຍໃຕ້ເມືອງໄຊເສດຖາ, ທ້າວ ຈັນລາ ອາຍຸ 54 ປີຢູ່ບ້ານທົ່ງປົ່ງເມືອງສີໂຄດຕະບອງ ແລະ ນາງ ຕຽງ ອາຍຸ 33 ປີຢູ່ບ້ານໄຮຄຳເມືອງໄຊເສດຖານະຄອນຫລວງວຽງຈັນ, ພ້ອມຂອງກາງຢາບ້າ 600 ກວ່າເມັດມາດໍາເນີນຄະດີ.
ເຈົ້າໜ້າທີ່ ໃຫ້ຮູ້ວ່າ: ກຸ່ມແກ້ງຄ້າຍຂາຍຢາເສບຕິດດັ່ງກ່າວ, ໄດ້ມີການເຄື່ອນໄຫວມາເປັນເວລາດົນແລ້ວ, ໂດຍພວກກ່ຽວໄດ້ນຳຢາເສບຕິດມາຈຳໜ່າຍໃຫ້ຊາວໜຸ່ມຢູ່ເຂດເມືອງໄຊເສດຖາ ແລະ ເຮັດໃຫ້ສັງຄົມບໍ່ມີຄວາມສະຫງົບ.
ເຈົ້າໜ້າທີ່ ໃຫ້ຮູ້ອີກວ່າ: ໃນອາທິດຜ່ານມານີ້, ຢູ່ນະຄອນຫລວງວຽງຈັນມີສະພາບຫຍໍ້ທໍ້ເກີດຂຶ້ນ 70 ເລື່ອງ, ເພີ່ມຂຶ້ນຈາກອາທິດກ່ອນ 21 ເລື່ອງ, ສ່ວນໃຫຍ່ແມ່ນຄະດີລັກຊັບ, ປຸ້ນຈີ້-ຊີງຊັບພົນລະເມືອງ, ຊຶ່ງມີລົດຈັກເສຍ 23 ຄັນ ແລະ ຊັບສິນອື່ນໆເປັນຈຳນວນຫລາຍ.
