ທຳລາຍ ແປ້ງນົວປອມແປງ-ລອກຮຽນແບບ ຫລາຍກວ່າ 170 ເປົາ ມູນຄ່າ 233.102.000 ກີບ

ວັນທີ 24 ພຶດສະພາ 2023 ຜ່ານມາ, ນະຄອນ ຫຼວງພະບາງ ທໍາລາຍສິນຄ້າໝົດອາຍຸການນໍາໃຊ້, ສິນຄ້າເສື່ອມຄຸນນະພາບ, ສິນຄ້ານໍາເຂົ້າບໍ່ຖືກຕ້ອງ ແລະ ສິນຄ້າປອມແປງຕ່າງ ໂດຍການເຂົ້າຮ່ວມຂອງ ທ່ານ ບຸນລຽງ ແກ້ວມະນີ ປະທານກວດກາພັກ-ລັດ ນະຄອນຫລວງພະບາງ.

ທ່ານ ສົມຫວັງ ພົມມະກອນ ຫົວໜ້າຫ້ອງການອຸດສາຫະກຳ ແລະ ການຄ້າ ນະຄອນ ຫຼວງພະບາງ  ໄດ້ລາຍງານວ່າ: ເຈົ້າໜ້າທີ່ກວດກາການຄ້າທີ່ໄດ້ຮັບການແຕ່ງຕັ້ງ ໄດ້ເອົາໃຈໃສ່ລົງກວດກາການລະເມີດລະບຽບຄຸ້ມຄອງທາງການຄ້າ, ການດຳເນີນທຸລະກິດທີ່ບໍ່ຖືກຕ້ອງ ແລະ ການຄ້າຂາຍສິນຄ້ານອກລະບົບ, ໄດ້ເຄື່ອນໄຫວລົງກວດກາຫົວໜ່ວຍທຸລະກິດ, ຫ້າງຮ້ານພາຍໃນນະຄອນຫຼວງພະບາງ ໄດ້ທັງໝົດ 12 ຄັ້ງ, ມີຫົວໜ່ວຍທຸລະກິດ 8 ຫົວໜ່ວຍ ສາມາດກວດຢຶດສິນຄ້າ, ວັດຖຸ-ອຸປະກອນ ໄດ້ທັງໝົດ 67 ລາຍການ ລວມມູນຄ່າ 412.042.000 ກີບ, ນອກຈາກນັ້ນຍັງໄດ້ຢຶດພາຫະນະ ປະເພດລົດ 6 ລໍ້ ຈໍານວນ 1 ຄັນ, ດຳເນີນມາດຕະການຈັດຕັ້ງປະຕິບັດແຍກດຳເນີນ ສິນຄ້າເສື່ອມຄຸນ, ໝົດອາຍຸ ມີທັງໝົດ 84 ຫົວໜ່ວຍ ມີສິນຄ້າ 49 ລາຍການ ລວມມູນຄ່າ 21.722.000 ກີບ, ກວດກາສິນຄ້າປອມແປງ-ລອກຮຽນແບບ ມີ 1 ຫົວໜ່ວຍ ມີ 18 ລາຍການ ມູນຄ່າ 390.320.000 ແລະພາຫະນະລົດຫົກລໍ້ 1 ຄັນ, ສິນຄ້າດັ່ງກ່າວແມ່ນ ມີເຈົ້າຂອງສິດທິບັດ ທີ່ໄດ້ຈົດສິດທິບັດສະຫຼາກ (ລິຂະສິດ) ຖືກຕ້ອງຕາມກົດໝາຍ ສ ປປ ລາວ ມາດຕະການຈັດຕັ້ງປະຕິບັດ ມີສອງຮູບແບບຄື: ເຈົ້າຂອງສິດທິບັດຮ້ອງຟ້ອງ ແລະ ເຈົ້າຂອງສິທິບັດບໍ່ຮ້ອງຟ້ອງ, ສິນຄ້າທີ່ມີເຈົ້າຂອງສິດທິບັດ ຮ້ອງຟ້ອງມີ 3 ຍີ່ຫໍ້ ລວມວັດຖຸອຸປະກອນທັງໝົດ 11 ລາຍການ ມູນຄ່າ 136.780.000 ກີບ, ສິນຄ້າພ້ອມວັດຖຸອຸປະກອນ ແມ່ນໄດ້ມອບໃຫ້ເຈົ້າໜ້າທີ່ຕໍາຫຼວດ ເພື່ອເປັນຂອງກາງດຳເນີນຄະດີຕາມລະບຽບກົດໝາຍ ປະຈຸບັນຄະດີດັ່ງກ່າວແມ່ນຢູ່ໃນຊັ້ນສານ, ສຳລັບສິນຄ້າທີ່ເຈົ້າຂອງສິດທິບັດບໍ່ຮ້ອງຟ້ອງ ມີ 4 ຍີ່ຫໍ້ ລວມ 8 ລາຍການ ມູນຄ່າ 253.540.000 ກີບ, ແມ່ນແຍກເປັນສອງປະເພດສິນຄ້າ ຄື: ສິນຄ້າທີ່ບໍ່ມີຜົນກະທົບຕໍ່ການນຳໃຊ້ (ຝອຍຜັດຖ້ວຍ) ແມ່ນຈັດໄປບໍລິຈາກເພື່ອເປັນສາທາລະນະປະໂຫຍດ ແລະ ສິນຄ້າທີ່ມີຜົນກະທົບຕໍ່ການຊົມໃຊ້ຂອງປະຊາຊົນ ລວມມີ ແປ້ງນົວ, ແຟບ ມີ 6 ລາຍການ ມູນຄ່າ 211.380.000 ກີບ ແມ່ນໄດ້ຈັດພິທີທຳລາຍຖິ້ມຕາມລະບຽບການ, ລວມມູນຄ່າ ສິນຄ້າເສື່ອມຄູນ,ເສຍຄູນ,ສິນຄ້າປອມແປງ ທີ່ລະເມີດ ທີ່ລະເມີດລະບຽບຄຸ້ມຄອງທາງການຄ້າທີ່ ທຳລາຍຖີ້ມ ມີທັງໝົດ 55 ລາຍການ ລວມມູນຄ່າ 233.102.000 ກີບ (ສອງຮ້ອຍສາມສີບສາມລ້ານໜື່ງແສນສອງພັນກີບ)

ສໍາລັບສິນຄ້າທີ່ທໍາລາຍຖິ້ມໃນຄັ້ງນີ້ປະກອບມີ:  ແປ້ງນົວຣາຊາຊຣົດ ກາຈອງ ຈໍານວນ 95 ເປົາ,  ແປ້ງນົວບໍ່ທັນຮ່າຍ 78 ເປົາ, ຖົງແປ້ງນົວເປົ່າ 3 ເປົາ, ແປ້ງນົວຢີໂນໂມທະກະລະ 3 ເປົາ, ຖົງແຟັບພາວເດີ ຈໍານວນ 24 ເປົາ, ສິນຄ້າໃຫ້ບໍລິຈາກ ຫລື ຂາຍ ມີ ແຟັບພາວເວີ ຈໍານວນ 157 ແກັດ, ຟອຍລ້າງຖ້ວຍສໍາເລັດຮູບ 239 ແກັດ, ຟອຍລ້າງຖ້ວຍສໍາບໍ່ທັນເລັດຮູບ 124 ເປົາ.

ທັງນີ້ ກໍເພື່ອເປັນການປົກປ້ອງຜູ້ຊົມໃຊ້ ແມ່ນການນຳໃຊ້ມາດຕະການເພື່ອຮັກສາຊີວິດ, ສຸຂະພາບ, ຊັບສິນ, ສິດ ແລະຜົນປະໂຫຍດອັນຊອບທຳຂອງປະຊາຊົນບັນດາເຜົ່າ, ປົກປ້ອງຜູ້ດຳເນີນທຸລະກິດທີ່ຖືກລະບຽບກົດໝາຍ ແລະຜົນປະໂຫຍດອັນຊອບທຳຂອງລັດ.