ຈະສືບຕໍ່ປັບປຸງການສຶກສາຂັ້ນພື້ນຖານໃຫ້ມີຄຸນນະພາບສູງຂຶ້ນ ເພື່ອເຮັດໃຫ້ເດັກນ້ອຍຈົບຊັ້ນປະຖົມສຶກສາ ສາມາດອ່ານ ແລະ ເຂົ້າໃຈ

ກອງປະຊຸມສຸດຍອດ ວ່າດ້ວຍຊັບສິນດ້ານມະນຸດ ພາຍໃຕ້ ຫົວຂໍ້ພິເສດ “ການເລັ່ງການຟື້ນຟູການຮຽນຮູ້ໃນສະພາບການຂອງໂຄວິດ-19”, ທີ່ຈັດຂຶ້ນໃນວັນທີ 25 ພຶດສະພາ 2023ຢູ່ນະຄອນຫລວງວຽງຈັນ ໄດ້ມີຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ເຫັນໄດ້ຈາກບັນດາຜູ້ເຂົ້າຮ່ວມ ໄດ້ມີການແລກປ່ຽນ ຄຳເຫັນຢ່າງກົງໄປກົງມາ ແລະ ສ້າງສັນ ເຮັດໃຫ້ລັດຖະບານ ກໍຄື ຂະແໜງການທີ່ກ່ຽວຂ້ອງ ສາມາດຊອກຫາວິທີການແກ້ໄຂ ກ່ຽວກັບການສ້າງແລະ ພັດທະນາຊັບສິນດ້ານມະນຸດ ຮ່ວມກັນໃນຕໍ່ໜ້າ.

ເພື່ອເຮັດໃຫ້ການພັດທະນາຊັບສິນດ້ານມະນຸດ ຢູ່ ສປປ ລາວ ສືບຕໍ່ໄດ້ຮັບການປັບປຸງ ແລະ ພັດທະນາໃນຕໍ່ໜ້າ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳສະເໜີຮ່າງຖະແຫລງການແຫ່ງຊາດ ກ່ຽວກັບຜົນກອງປະຊຸມສຸດຍອດ ວ່າດ້ວຍຊັບສິນດ້ານມະນຸດ ເຊິ່ງມີເນື້ອໃນບາງຕອນວ່າ: ພື້ນຖານຂອງຊັບສິນດ້ານມະນຸດ ແມ່ນມີຢູ່ໃນມະນຸດເຮົາແຕ່ຍັງໄວເດັກ, ສັດສ່ວນຂອງເດັກນ້ອຍທີ່ຮຽນຈົບຊັ້ນປະຖົມສຶກສາ ແຕ່ບໍ່ສາມາດອ່ານ ແລະ ເຂົ້າໃຈບົດອ່ານຂອງເຂົາເຈົ້າໄດ້ ແມ່ນສັນຍານທີ່ບົ່ງບອກເຖິງຄຸນນະພາບຂອງການສຶກສາ ໂດຍລວມພາຍໃນປະ ເທດ. ດັ່ງນັ້ນ, ສິ່ງທີ່ສາມາດຊຸກຍູ້ທ່າແຮງບົ່ມຊ້ອນທີ່ ຈະໄດ້ຈາກກຸ່ມປະຊາກອນໃນໄວອອກແຮງງານ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງປະເທດ ກໍແມ່ນການຮຽນຮູ້ຂັ້ນພື້ນຖານ ເຊິ່ງເປັນປັດໄຈຕົ້ນຕໍສຳລັບການຮຽນຮູ້ອື່ນໆ ແລະ ທັກສະທີ່ສູງຂຶ້ນ ທີ່ເດັກນ້ອຍ ແລະ ໄວໝຸ່ມຕ້ອງມີ ໂດຍຜ່ານການສຶກສາ. ການຮຽນຮູ້ພື້ນຖານ ແມ່ນສຳຄັນ ເພື່ອເຮັດໃຫ້ເດັກນ້ອຍທຸກຄົນ ບັນລຸຄວາມສາມາດຂອງເຂົາເຈົ້າຢ່າງເຕັມທີ່ ແລະ ມີສ່ວນຮ່ວມໃນສັງຄົມ, ຮັບປະກັນໃຫ້ເດັກນ້ອຍໄດ້ມີການຮຽນຮູ້ພື້ນ ຖານ ໃຫ້ກາຍເປັນພົນລະເມືອງທີ່ດີຂອງຊາດ ເພື່ອເປັນເຈົ້າການພັດທະນາຕົນເອງ, ມີຄວາມສະເໝີພາບລະຫວ່າງຍິງ-ຊາຍ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດໃຫ້ມີຄວາມສົມດຸນ ແລະ ຍືນຍົງ. ພວກເຮົາໃຫ້ຄໍາໝັ້ນສັນຍາ ຈະສືບຕໍ່ປັບປຸງການສຶກສາຂັ້ນພື້ນຖານໃຫ້ມີຄຸນນະພາບສູງຂຶ້ນ ໂດຍສຸມໃສ່ປັບປຸງ ແລະ ພັດທະນາການຮຽນຮູ້ຂັ້ນພື້ນຖານ ເພື່ອເຮັດໃຫ້ສັດສ່ວນເດັກນ້ອຍທີ່ຮຽນຈົບຊັ້ນປະຖົມສຶກສາ ສາມາດອ່ານ ແລະ ເຂົ້າໃຈຂໍ້ຄວາມງ່າຍ ດາຍ ເພີ່ມຂຶ້ນ.

ນັບແຕ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນ, ການເຂົ້າຮຽນຂອງນັກຮຽນຫລຸດລົງ ແລະ ການປະລະການຮຽນໃນທຸກລະດັບ ແມ່ນເພີ່ມຂຶ້ນ, ເພື່ອຮັບປະກັນການຟື້ນຟູ ແລະ ເລັ່ງຟື້ນຟູການຮຽນຮູ້, ພວກເຮົາຈະຕ້ອງໄດ້ຮີບຮ້ອນສຸມໃສ່ສົ່ງເສີມໃຫ້ເດັກນ້ອຍທຸກຄົນໄດ້ກັບເຂົ້າມາຮຽນຄືນ ແລະ ໃຫ້ເຂົາເຈົ້າສືບຕໍ່ຮຽນຈົນຈົບ, ຮັບປະກັນໃຫ້ນັກຮຽນໃຫ້ໄດ້ຮຽນບຳລຸງ ແລະ ຮຽນຄືນໃຫ້ຫລາຍຂຶ້ນ ແລະ ດຳເນີນການສິດສອນໃຫ້ເດັກນ້ອຍຕາມລະດັບການຮຽນຮູ້ ຂອງເຂົາເຈົ້າໃນປັດຈຸບັນ, ສະໜັບສະໜູນ ແລະ ຊ່ວຍເຫລືອຄູອາຈານ ເພື່ອໃຫ້ຄູມີເຄື່ອງມືໃຊ້ສໍາລັບການສິດສອນ ແລະ ສະໜັບສະໜູນຊຸກຍູ້ຊ່ວຍເຫລືອດ້ານສຸຂະພາບ, ໂພຊະນາການ ແລະ ຈິດຕະສັງຄົມ, ຊີວິດການເປັນຢູ່ທີ່ດີຂອງຄູ ແລະ ເດັກທຸກຄົນ.

ລັດຖະບານ ຮັບຮູ້ວ່າ ການສະໜອງງົບປະມານ ໃຫ້ແກ່ຂະແໜງການສຶກສາຢ່າງເໝາະສົມ, ມີປະສິດທິພາບ ແລະ ມີຄວາມເທົ່າທຽມ ແມ່ນມີຄວາມສໍາຄັນຕໍ່ການເລັ່ງການຟື້ນຟູການຮຽນຮູ້ພາຍຫລັງສະພາບການລະບາດຂອງພະຍາດໂຄວິດ-19, ຄຽງຄູ່ກັບການຮັບປະກັນສິດທິຂອງເດັກທຸກຄົນໃນການສຶກສາທີ່ມີຄຸນນະພາບ ແລະ ມີຄວາມເທົ່າທຽມ ເພື່ອເສີມຂະຫຍາຍຊັບສິນດ້ານມະນຸດຂອງ ສປປ ລາວ ແລະ ບັນລຸໄດ້ວິໄສທັດຂອງປະເທດ ໃນການກ້າວໄປສູ່ການພັດທະນາເສດຖະກິດທີ່ທັນສະໄໝ ແລະ ເສດຖະກິດທີ່ມີການຂະຫຍາຍຕົວສູງຂຶ້ນ; ພວກເຮົາທຸກພາກສ່ວນ ທັງພາກລັດ, ຄູ່ຮ່ວມພັດທະນາ, ເອກະຊົນ ແລະ ທຸກພາກສ່ວນໃນສົງຄົມ ລວມທັງພໍ່ແມ່ຜູ້ປົກ ຄອງ ຈະຕ້ອງໄດ້ເຮັດວຽກຮ່ວມກັນ ເພື່ອປະກອບສ່ວນທາງດ້ານວິຊາການ ແລະ ທຶນຮອນ, ນຳໃຊ້ເຕັກໂນໂລຊີ ແລະ ຫັນປ່ຽນການສຶກສາ ໃຫ້ສອດຄ່ອງກັບສະພາບໃນປັດຈຸບັນ ແລະ ສາມາດຮັບມືໄດ້ກັບການປ່ຽນແປງທີ່ຈະເກີດຂຶ້ນໃນອະນາຄົດ ເພື່ອພັດທະນາຊັບສິນດ້ານມະນຸດ ໃຫ້ມີຄຸນນະ ພາບສູງຂຶ້ນ; ລັດຖະບານຢືນຢັນວ່າ ຈະພະຍາຍາມເພີ່ມສ່ວນແບ່ງງົບປະມານແຫ່ງຊາດ ໃຫ້ແກ່ຂະ ແໜງການສຶກສາ ໃຫ້ສອດຄ່ອງກັບຄາດໝາຍທີ່ໄດ້ກໍານົດໄວ້ໃນກົດໝາຍ ວ່າດ້ວຍການສຶກສາເທື່ອລະກ້າວ, ລວມທັງສ່ວນແບ່ງງົບປະມານບໍລິຫານທີ່ບໍ່ແມ່ນເງິນເດືອນ.

ເຖິງວ່າກອງປະຊຸມສຸດຍອດ ວ່າດ້ວຍ ຊັບສິນດ້ານມະນຸດ ໃນຄັ້ງນີ້, ໄດ້ສໍາເລັດຢ່າງຈົບງາມ ກໍຕາມ ແຕ່ພາລະກິດໃນການສ້າງຊັບສິນດ້ານມະນຸດເຮົາ ຍັງສືບຕໍ່ເປັນພາລະກິດຂອງຊາດ. ດັ່ງນັ້ນຮຽກຮ້ອງໃຫ້ທຸກພາກສ່ວນຈົ່ງສືບຕໍ່ຮ່ວມມືກັນໃນການພັດທະນາຄົນ ແລະ ພັດທະນາປະເທດຊາດໃຫ້ບັນລຸໄດ້ຕາມເປົ້າໝາຍທີ່ວາງໄວ້.