UN ຂໍລະດົມທຶນມະຫາສານ ຊ່ວຍເຫລືອມຽນມາ-ບັງກະລາເດັດ ຈາກພາຍຸໂມຄາ

ສະຫະປະຊາຊາດປະກາດຂໍການສະໜັບສະໜູນຈໍານວນມະຫາສານ ເພື່ອຊ່ວຍເຫລືອປະຊາຊົນໃນມຽນມາ ແລະ ບັງກະລາເດັດ ເຊິ່ງໄດ້ຮັບຄວາມເດືອດຮ້ອນຈາກອິດທິພົນຂອງພາຍຸໂມຄາ.

ວັນທີ 24 ພຶດສະພາ, ສໍານັກຂ່າວຕ່າງປະເທດລາຍງານວ່າ: ສະຫະປະຊາຊາດ (UN) ອອກຖະແຫລງການວ່າ: ເນື່ອງຈາກອິດທິພົນຂອງພາຍຸໂມຄາ ເຊິ່ງສ້າງຄວາມເສຍຫາຍຢ່າງໜັກໃຫ້ລັດຍະໄຂ່ ຢູ່ທາງຕາເວັນຕົກຂອງມຽນມາ ໃນເດືອນນີ້ UN ມີຄວາມຈໍາເປັນຕ້ອງຂໍລະດົມທຶນອີກ 122 ລ້ານໂດລາສະຫະລັດ ເພື່ອເປັນຄ່າໃຊ້ຈ່າຍເພີ່ມຕື່ມສໍາລັບການຊ່ວຍເຫລືອຜູ້ປະສົບໄພ ແລະ ອີກ 211 ລ້ານໂດລາສະຫະລັດ ຈາກກອງທຶນທີ່ມີຢູ່ໃນປັດຈຸບັນ.

ນອກຈາກນັ້ນ, UN ຂໍການສະໜັບສະໜູນອີກ 42 ລ້ານໂດລາສະຫະລັດ ເພື່ອຊ່ວຍເຫລືອບັງກະລາເດັດ ເຊິ່ງໄດ້ຮັບຄວາມເສຍຫາຍຈາກພາຍຸຫົວນີ້ເຊັ່ນກັນ.

ທັງນີ້, ລັດຖະບານມຽນມາຢືນຢັນໃນອາທິດຜ່ານມາວ່າ: ຈໍານວນຜູ້ເສຍຊີວິດຈາກອິດທິພົນຂອງພາຍຸໂມຄາ ເຊິ່ງພັດເຂົ້າລັດຍະໄຂ່ທີ່ຢູ່ແຄມຝັ່ງທາງຕາເວັນຕົກຂອງປະເທດໃນວັນທີ 14 ພຶດສະພາຜ່ານມາ ມີຢ່າງໜ້ອຍ 145 ຄົນ ແຕ່ຫລັງຈາກນັ້ນຍັງບໍ່ມີການໃຫ້ຂໍ້ມູນເພີ່ມອີກ.