ອິນເດຍເຕືອນໄພອາກາດຮ້ອນຫລາຍພື້ນທີ່ ລະດູຝົນປີນີ້ມາຊ້າກວ່າປົກກະຕິ
ຫລາຍພື້ນທີ່ໃນອິນເດຍ ລວມທັງນະຄອນຫລວງນິວເດລີ ຜະເຊີນອິດທິພົນຂອງຄື້ນຄວາມຮ້ອນຮຸນແຮງ, ຂະນະທີ່ກົມອຸຕຸນິຍົມວິທະຍາກ່າວວ່າ: ລະດູຝົນປີນີ້ເລີ່ມຊ້າກວ່າປົກກະຕິ.
ວັນທີ 23 ພຶດສະພາ, ສໍານັກຂ່າວຕ່າງປະເທດລາຍງານວ່າ: ກົມອຸຕຸນິຍົມວິທະຍາແຫ່ງຊາດຂອງອິນເດຍປະກາດເຕືອນໄພສະພາບອາກາດຮ້ອນອົບເອົ້າຄວບຄຸມ 7 ລັດທາງເໜືອ ແລະ ກາງຂອງປະເທດ ໃນທ້າຍອາທິດຜ່ານມາ ກ່ອນຂະຫຍາຍຄໍາເຕືອນໄປນະຄອນຫລວງນິວເດລີ ແລະ ລັດບາງແຫ່ງທີ່ຢູ່ທາງເໜືອ.
ຍິ່ງໄປກວ່ານັ້ນ, ລະດູຝົນປີນີ້ເລີ່ມຊ້າກວ່າປົກກະຕິ ຈາກທ້າຍເດືອນພຶດສະພາໄປເປັນອາທິດທໍາອິດຂອງເດືອນມິຖຸນາ ໝາຍຄວາມວ່າ: ພື້ນທີ່ສ່ວນຫລາຍຂອງອິນເດຍຈະຜະເຊີນສະພາບອາກາດຮ້ອນຍາວນານ ແລະ ຮຸນແຮງກວ່າປົກກະຕິ ໂດຍອຸນຫະພູມຢູ່ລັດອຸດຕໍປະເທດ ເຊິ່ງຢູ່ທາງເໜືອ ເພີ່ມສູງເຖິງ 45 ອົງສາ ໃນວັນທີ 22 ພຶດສະພາຜ່ານມາ ສົ່ງຜົນເຮັດໃຫ້ເກີດໄຟຟ້າມອດເປັນວົງກວ້າງກວ່າ 12 ຊົ່ວໂມງ ແລະ ການຂາດເຂີນນໍ້າປະປາໃນຫລາຍພື້ນທີ່.
ໃນເດືອນເມສາຜ່ານມາ, ມີລາຍງານປະຊາຊົນຢ່າງໜ້ອຍ 13 ຄົນ ເສຍຊີວິດເພາະອິດທິພົນຈາກຄື້ນຄວາມຮ້ອນ ຢູ່ເມືອງມຸມໄບ ແລະ ທາງການສັ່ງປິດໂຮງຮຽນໃນພື້ນທີ່ເປັນເວລາ 1 ອາທິດ.
ທັງນີ້, ນິຍາມຂອງປາກົດການ “ຄື້ນຄວາມຮ້ອນ” ຕາມລະບຸໂດຍອົງການອຸຕຸນິຍົມວິທະຍາໂລກ (WMO) ຄື: ສະພາບອຸນຫະພູມສູງສຸດປະຈໍາວັນ ເກີນຄ່າອຸນຫະພູມສູງສຸດໂດຍສະເລ່ຍ 5 ອົງສາ ດົນນານຕໍ່ເນື່ອງເປັນເວລາຢ່າງໜ້ອຍ 5 ວັນ.
