ກອງຄຸ້ມຄອງພາຫະນະ ແລະ ການຂັບຂີ່ ນວ ພົບຄວາມຫຍຸ້ງໃນການຈັດຕັ້ງປະຕິບັດວຽກງານ ເນື່ອງຈາກນຳເຂົ້າວັດຖຸດິບຈາກຕ່າງປະເທດ

ທ່ານ ນາງ ພິດສະໄໝ ຕົ້ນສະຫວັນ, ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນະຄອນຫລວງວຽງຈັນ (ນວ) ພ້ອມດ້ວຍຄະນະ ສືບຕໍ່ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 6 ເດືອນຕົ້ນປີ 2023 ຢູ່ກອງຄຸ້ມຄອງພາຫະນະ ແລະ ການຂັບຂີ່ ໃນ ວັນທີ 19 ພຶດສະພາ 2023, ຕ້ອນຮັບໂດຍ ທ່ານ ບຸນປອນ ບຸນສົມຫວັງ, ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນວ ແລະ ມີພະນັກງານຫລັກແຫລ່ງຈຳນວນໜຶ່ງເຂົ້າຮ່ວມ.

ການຈັດຕັ້ງປະຕິບັດບັນດາຄາດໝາຍຂອງແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2023 ໃນໄລຍະຜ່ານມາ ການເກັບລາຍຮັບຄ່າບໍລິການວິຊາການສາມາດເກັບລາຍຮັບ ປະຕິບັດໄດ້ 45% ຂອງແຜນການປີ, ການປະຕິບັດແຜນລາຍຈ່າຍວິຊາການ ປະຕິບັດໄດ້ 35% ຂອງແຜນການປີ ແລະ ໄດ້ຈັດເກັບຄ່າທຳນຽມຄ່າທາງໃຫ້ກົມຊ່ວຍສາອາກອນ ຂອງກະຊວງການເງິນໄດ້ 76% ຂອງແຜນການປີ. ຄຽງຄູ່ກັບຜົນສໍາເລັດໃນບາງດ້ານນັ້ນ ທາງກອງຄຸ້ມຄອງພາຫະນະ ແລະ ການຂັບຂີ່ ນວ ກໍພົບຄວາມຫຍຸ້ງໃນການຈັດຕັ້ງປະຕິບັດວຽກງານໃນໄລຍະຜ່ານມາ ເປັນຕົ້ນແມ່ນ ຕົ້ນທຶນໃນການຜະລິດໃບທະບຽນໃບຂັບຂີ່ຖາວອນເພີ່ມຂຶ້ນ, ເນື່ອງຈາກນຳເຂົ້າວັດຖຸດິບຈາກຕ່າງປະເທດ, ການຊຳລະສະສາງມີຄວາມຫຍຸ້ງຍາກ ຍ້ອນອັດຕາແລກປ່ຽນສູງ, ຂາດແຄນເງິນຕາງຕ່າງປະເທດ ເຮັດໃຫ້ຕົວເລກແຜນງົບປະມານລາຍຈ່າຍບໍ່ພຽງພໍກັບລາຍຈ່າຍທີ່ເກີດຂື້ນໃນປີບໍ່ໄປຕາມແຜນການປີ. ນອກຈາກໄດ້ຮັບຟັງການລາຍງານ ແລະ ຄວາມຫຍຸ້ງຍາກໃນການປະຕິບັດວຽກງານບາງດ້ານແລ້ວ ຍັງໄດ້ຮັບຟັງການສະເໜີບັນຫາ ຈຳນວນໜຶ່ງ.

ໂອກາດດັ່ງກ່າວ, ຄະນະລົງເຮັດວຽກ ກໍໄດ້ມີຄຳເຫັນຊີ້ນຳຕໍ່ກອງປະຊຸມ ພ້ອມທັງມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງຍາກທີ່ຄະນະຮັບຜິດຊອບໃນຂະແໜງການຕ່າງໆໄດ້ພົບພໍ້ ເພື່ອນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ສະແດງຄວາມຍ້ອງຍໍຊົມເຊີຍຕໍ່ທຸກຂະແໜງການທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນ ຈົນໄດ້ຮັບຜົນສຳເລັດຫລາຍດ້ານໃນໄລຍະຜ່ານມາ ແລະ ໃຫ້ທຸກຂະແໜງການສືບຕໍ່ເອົາໃຈໃສ່ປະຕິບັດບັນດາຄາດໝາຍທີ່ກຳນົດໄວ້ໃນແຜນປີ ໃຫ້ສຳເລັດບັນລຸຕາມຄາດໝາຍທີ່ວາງໄວ້ຢ່າງມີປະສິດທິພາບ, ໄດ້ປະສິດທິຜົນ.