ນັດພົບກັນຊື້-ຂາຍຢາເສບຕິດຢູ່ຖຽງນາ ສຸດທ້າຍຖືກເຈົ້າໜ້າທີ່ຈັບໄດ້ ພ້ອມຢຶດຂອງກາງຢາບ້າ 1.844 ເມັດ ແລະ ເຄື່ອງມືຫາປາຈຳນວນໜຶ່ງ
ຕາມການລາຍງານຂອງເຈົ້າໜ້າທີ່ວິຊາສະເພາະ ປກສ ເມືອງວຽງທອງ ແຂວງບໍລິຄຳໄຊ ຮູ້ວ່າ: ວັນທີ 15 ພຶດສະພາ 2023 ໄດ້ຮັບແຈ້ງຂ່າວຈາກພົນລະເມືອງດີວ່າ ຢູ່ຖຽງນາຂອງ ທ້າວໄມຕານ(ພໍ່ຕົງ) ມີການຊື້-ຂາຍ ແລະ ມົ້ວສຸມຢາເສບຕິດ (ຢາບ້າ), ຈາກນັ້ນເຈົ້າໜ້າວິຊາສະເພາະຈຶ່ງໄດ້ລົງຕິດຕາມ ແລະ ພິສຸດຕາມແຫລ່ງຂ່າວ ຈຶ່ງຮູ້ວ່າຢູ່ຖຽງນາຂອງທ້າວໄມຕານ ມີການຄ້າຂາຍ ແລະ ມົ້ວສຸມຢາເສບຕິດແທ້, ດັ່ງນັ້ນໜ່ວຍງານວິຊາສະເພາະຈຶ່ງສະເໜີຫາອົງການໄອຍະການເຂດII ແຂວງບໍລິຄຳໄຊ ປະຈຳເມືອງເພື່ອຂໍຄຳສັ່ງກວດຄົ້ນເຄຫາສະຖານ, ເມື່ອໄດ້ຄຳສັ່ງແລ້ວເຈົ້າໜ້າທີ່ວິຊາສະເພາະໄດ້ລົງໄປວາງກຳລັງເຂົ້າປິດລ້ອມຖຽງນາແລ້ວເຂົ້າຈັບກຸມໄດ້1 ຄົນຊື່ ທ້າວ ໄມຕານ(ພໍ່ຕົງ) ອາຊີບ ປະຊາຊົນ ຢູ່ບ້ານນຳ້ຢ້າງ ເມືອງວຽງທອງ ແຂວງບໍລິຄຳໄຊ ເຊີ່ງເປັນເຈົ້າຂອງຖຽງນາ, ກວດຄົ້ນຖຽງນາພົບເຫັນຢາບ້າຈຳນວນ 1.844 ເມັດ, ເງີນກີບ 7.850.000 ກີບ, ປືນແກ໊ບ 4 ກະບອກ, ໝໍ້ຊອດ 1 ໜ່ວຍ, ຈັກດູດນຳ້ 2 ເຄື່ອງ, ໝໍ້ໄຟ 6 ໜ່ວຍ,ໂມງ 1 ໜ່ວຍ, ໂທລະສັບ 1 ໜ່ວຍ, ລູກດອກຕະປູ 30 ລູກ, ຈາກນັ້ນເຈົ້າໜ້າທີ່ຈື່ງໄດ້ກັກຕົວຜູ້ກ່ຽວຂື້ນມາຫ້ອງການ ປກສ ເມືອງ ເພື່ອທຳການສືບສວນ-ສອບສວນພ້ອມທັງດຳເນີນຄະດີຕາມລະບຽບກົດໝາຍ.
