AFC ກຽມສອບສວນ ແລະ ມີບົດລົງໂທດ ກໍລະນີເຫດຕີກັນໃນເກມນັດຊີງຊະນະເລີດຊີເກມ
ຈາກເຫດການຄວາມວຸ້ນວາຍໃນນັດຊີງຊະນະເລີດຊີເກມ ທີ່ທີມຊາດໄທ ເສຍໃຫ້ ອິນໂດເນເຊຍ ໃນຊ່ວງຕໍ່ເວລາພິເສດ 2-5, ສົ່ງຜົນໃຫ້ເກີດການວິພາກວິຈານໄປທົ່ວອາຊຽນ ຈົນເຖິງສື່ລະດັບໂລກເຊັ່ນ BBC ແລະ Reuters ກໍ່ໄດ້ນຳສະເໜີຂ່າວນີ້ເຊັ່ນດຽວກັນ.
ປະເດັນທີ່ເກີດຂຶ້ນ ໂຄສົກຂອງ AFC ຖະແຫລງຕໍ່ Reuters ກ່ຽວກັບເລື່ອງລະຫວ່າງໄທ ແລະ ອິນໂດເນເຊຍ ວ່າ “AFC ຮູ້ສຶກຜິດຫວັງກັບເຫດການຄວາມວຸ້ນວາຍໃນນັດຊີງຊະນະເລີດຊີເກມຮອບສຸດທ້າຍ”.
“AFC ເນັ້ນຫນັກເຖິງຄວາມສໍາຄັນຂອງການຫລິ້ນຢ່າງຍຸຕິທໍາ ການເຄົາລົບເຊິ່ງກັນ ແລະ ກັນ ແລະ ນ້ຳໃຈກິລາ ແລະ ຈະບໍ່ຍອມຕໍ່ການກະທຳທີ່ຮຸນແຮງທັງໝົດ.”
ທັ້ງນີ້ກິລາຊີເກມ, ເຖິງວ່າບໍ່ໄດ້ຈັດໂດຍສະຫະພັນບານເຕະນາໆຊາດ ແຕ່ຍ້ອນມີການນຳໃຊ້ຄະນະກຳມະການຂອງສະຫະພັນ, ສະຫະພັນບານເຕະອາຊີຈຶ່ງສາມາດມີບົດບາດໃນການລົງໂທດ. ເພາະສົ່ງຜົນກະທົບຕໍ່ພາບພົດຂອງສະຫະພັນ, ບໍ່ວ່າຈະເປັນການປັບໃໝ, ການສັ່ງຫ້າມຜູ້ກະທຳຜິດເປັນຕົ້ນ.
