ເປີດນໍາໃຊ້ຫ້ອງຝຶກອົບຮົມອອນລາຍທັນສະໄໝ ສະຖາບັນ ຍທຂ ທີ່ໄດ້ຮັບການຊ່ວຍເຫລືອຈາກ ສ ເກົາຫລີ ມູນຄ່າປະມານ 1,31 ຕື້ກີບ

ວັນທີ 17 ພຶດສະພາ 2023, ໄດ້ມີພິທີມອບ-ຮັບ ໂຄງການປັບປຸງສ້ອມແປງອາຄານຫ້ອງການ, ຫ້ອງຝຶກອົບຮົມ ແລະ ເປີດນໍາໃຊ້ຫ້ອງຝຶກອົບຮົມອອນລາຍ ທີ່ທັນສະໄໝ ຢູ່ສະຖາບັນ ໂຍທາທິການ ແລະ ຂົນສົ່ງ (ຍທຂ), ໂດຍມີ ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ Jung Youngsoo ເອກອັກຄະລັດຖະທູດແຫ່ງ ສ ເກົາຫລີ, ພ້ອມພາກສ່ວນກ່ຽວຂ້ອງສອງຝ່າຍເຂົ້າຮ່ວມ.

ໂອກາດນີ້, ທ່ານ ສີລິພອນ ອິນທິລາດ ຫົວໜ້າສະຖາບັນ ຍທຂ ກ່າວວ່າ: ເພື່ອເປັນການຊ່ວຍເຮັດໃຫ້ວຽກງານຂອງພະນັກງານ ແລະ ການສະໜອງການຝຶກອົບຮົມທີ່ສະຖາບັນໃນຕໍ່ໜ້າມີຄວາມສະດວກ, ມີປະສິດທິພາບ, ສາມາດຕອບສະໜອງຄວາມຮຽກຮ້ອງຕ້ອງການໄດ້ຫລາຍຍິ່ງຂຶ້ນ, ເຊິ່ງສະຖາບັນ ຍທຂ  ຈະນໍາໃຊ້ສິ່ງອໍານວຍຄວາມສະດວກທີ່ລັດຖະບານ ສ ເກົາຫລີ ໄດ້ມອບໃຫ້ນີ້ ດ້ວຍຄວາມຮັບຜິດຊອບສູງ ແລະ ເພື່ອໃຫ້ໄດ້ຮັບຜົນປະໂຫຍດສູງສຸດ, ໂດຍ ໂຄງການດັ່ງກ່າວໄດ້ເລີ່ມຈັດຕັ້ງປະຕິບັດນັບແຕ່ເດືອນທັນວາ 2022 ຫາ ເດືອນເມສາ 2023 ລວມເວລາ 4 ເດືອນຈຶ່ງສໍາເລັດ. ໂດຍແມ່ນບໍລິສັດ BLP ກໍ່ສ້າງ ແລະ ຕິດຕັ້ງໄຟຟ້າ ຈໍາກັດຜູ້ດຽວ ເປັນຜູ້ຮັບເໝົາປັບປຸງ ແລະ ສ້ອມແປງອາຄານ, ພ້ອມທັງປະກອບເຟີນີເຈີ ແລະ ອຸປະກອນຮັບໃຊ້ການຝຶກອົບຮົມຄົບຊຸດ ມີມູນຄ່າລວມທັງໝົດ 100 ລ້ານວອນ ຫລື ປະມານ 1,31 ຕື້ກີບ.

ນອກນີ້, ກໍໄດ້ຄາດຄະເນຜົນທີ່ຈະໄດ້ຮັບຄື:

1      ສ້າງມາດຕະຖານການອອກແບບ ແລະ ການຄວບຄຸມຄຸນນະພາບສໍາລັບການອອກແບບ, ກໍ່ສ້າງ ແລະ ຄຸ້ມຄອງເສັ້ນທາງ-ຂົວ ຢ່າງມີຄວາມທົນທານ ແລະ ກຸ້ມຕົນເອງໃນ ສປປ ລາວ;

2     ມີນະວັດຕະກໍາ ແລະ ອຸປະກອນເພື່ອອໍານວຍຄວາມສະດວກ ໃຫ້ແກ່ການທົດລອງ,ອອກແບບ ແລະ ສ້າງອຸປະກອນວັດແທກທາງປູຢາງ;

3     ພະນັກງານ ຂະແໜງ ຍທຂ  ແລະ ພະນັກງານວິຊາການທີ່ກ່ຽວຂ້ອງ ມີຂີດຄວາມສາມາດເພີ່ມຂຶ້ນຈາກການຝຶກອົບຮົມ.