ນາຍົກລັດຖະມົນຕີ ຕ້ອນຮັບການຢ້ຽມຂໍ່ານັບຂອງລັດຖະມົນຕີຕ່າງປະເທດ ອົດສະຕຣາລີ ພ້ອມຕີລາຄາສູງຕໍ່ການພົບປະຮ່ວມມື
ໃນວັນທີ 16 ພຶດສະພາ 2023 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ເພັນນີ ວອງ ລັດຖະມົນຕີກະຊວງການຕ່າງປະເທດ ອົດສະຕຣາລີ ພ້ອມດ້ວຍຄະນະ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 15-16 ພຶດສະພາ 2023.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ອົດສະຕຣາລີ ທີ່ມີບາດກ້າວຂະຫຍາຍຕົວຢ່າງຕໍ່ເນື່ອງຕະລອດໄລຍະຜ່ານມາ, ພິເສດໃນປີ 2022 ສອງຝ່າຍໄດ້ຮ່ວມກັນຈັດຕັ້ງສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 70 ປີ ໄດ້ຮັບຜົນສໍາເລັດຢ່າງຈົບງາມ. ສອງຝ່າຍໄດ້ມີການແລກປ່ຽນຢ້ຽມຢາມເຊິ່ງກັນ ແລະ ກັນ ໃນລະດັບຕ່າງໆ ຢ່າງເປັນປົກກະຕິ ເຊິ່ງເປັນການຢ້ຽມຢາມທີ່ປະສົບຜົນສໍາເລັດຢ່າງຈົບງາມ, ເຕັມໄປດ້ວຍບັນຍາກາດແຫ່ງຄວາມສະໜິດສະໜົມ ແລະ ເຂົ້າອົກເຂົ້າໃຈ ເຊິ່ງກັນ ແລະ ກັນ ເປັນຢ່າງດີ. ສປປ ລາວ ມີຄວາມພ້ອມ ແລະ ຍິນດີ ຕໍ່ເຈດຈໍານົງການຍົກລະດັບການຮ່ວມມືຂອງສອງປະເທດເປັນ “ຄູ່ຮ່ວມມືຮອບດ້ານ”, ພ້ອມສະເໜີສອງກະຊວງການຕ່າງປະເທດລາວ ແລະ ອົດສະຕຣາລີ ສືບຕໍ່ເຮັດວຽກຮ່ວມກັນຢ່າງໃກ້ຊິດ ເພື່ອເຮັດໃຫ້ການຍົກລະດັບສາຍພົວພັນດັ່ງກ່າວ ປະກົດຜົນເປັນຈິງ ໃນອະນາຄົດອັນໃກ້ນີ້. ລັດຖະບານລາວ ສະແດງຄວາມຂອບໃຈ ຕໍ່ລັດຖະບານ ກໍຄືປະຊາຊົນ ອົດສະຕຣາລີ ທີ່ໄດ້ໃຫ້ການຊ່ວຍເຫລືອທາງການເພື່ອການພັດທະນາ(OD A) ແກ່ ສປປ ລາວ ຕະຫລອດໄລຍະຫລາຍປີຜ່ານມາ ເຊິ່ງຈັດເປັນອັນດັບທີ 3 ຂອງປະເທດທີ່ໃຫ້ການຊ່ວຍເຫລືອ ODA ແກ່ ສປປ ລາວ, ລວມເຖິງການຊ່ວຍເຫລືອ ໃນຂອບການຮ່ວມມືແມ່ນໍ້າຂອງ-ອົດສະຕຣາລີ, ການຮ່ວມມືໃນຂອບອາຊຽນ-ອົດສະຕຣາລີ ໂດຍສະເພາະໃນປີ 2024 ທີ່ ສປປ ລາວ ຈະເປັນປະທານອາຊຽນ ແລະ ອື່ນໆ.
ພ້ອມນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການຢ້ຽມຢາມ ສປປ ລາວ ຂອງທ່ານລັດຖະມົນຕີ ເພັນນີ ວອງ ພ້ອມດ້ວຍຄະນະ ໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການພົບປະສອງຝ່າຍກັບຄູ່ຮ່ວມຕໍາແໜ່ງຝ່າຍລາວ ໃນມື້ຜ່ານມາ ແລະ ໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ໄມຕີຈິດມິດຕະພາບ ໄປຍັງທ່ານ ນາຍົກລັດຖະມົນຕີ ແອນໂທນີ ແອວບານີຊີ ຂອງອົດສະຕຣາລີ ອີກດ້ວຍ.
ໂອກາດດຽວກັນ, ທ່ານລັດຖະມົນຕີ ເພັນນີ ວອງ ໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບ ພ້ອມທັງໄດ້ແຈ້ງໃຫ້ຊາບເຖິງຈຸດປສົງຂອງການຢ້ຽມຢາມ ສປປ ລາວ ໃນຄັ້ງນີ້ ພ້ອມທັງໄດ້ແຈ້ງໃຫ້ຊາບເຖິງຜົນສໍາເລັດຂອງການພົບປະກັບ ທ່ານ ຮອງນາຍົກລັດຖະມົນຕີ ສະເຫລີມໄຊ ກົມມະສິດ ເຊິ່ງສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ອົດສະຕຣາລີ ແລະ ສປປ ລາວ ຂອງທ່ານ ນາຍົກລັດຖະມົນຕີ ສອນໄຊ ສີພັນດອນ ແລະ ໄດ້ສະແດງຄວາມຂອບໃຈ ມາຍັງ ສປປ ລາວ ທີ່ໄດ້ໃຫ້ການສະໜັບສະໜູນຢ່າງຕັ້ງໜ້າ ແລະ ຫ້າວຫັນໃນຖານະເປັນປະເທດຜູ້ປະ ສານງານ ອາຊຽນ-ອົດສະຕຣາລີ ໄລຍະສົກປີ 2021-2024, ພ້ອມທັງໄດ້ຢືນຢັນຄືນເຖິງຄໍາໝາຍໝັ້ນຂອງ ອົດສະຕຣາລີ ທີ່ຈະໃຫ້ການສະໜັບສະໜູນແກ່ ສປປ ລາວ ໃນການກະກຽມເປັນປະທານອາຊຽນ ໃນປີ 2024 ແລະ ສະແດງຄວາມກຽມພ້ອມໃນການສະເຫລີມສະຫລອງ ຄົບຮອບ 50 ປີ ຂອງການເປັນປະເທດຄູ່ເຈລະຈາອາຊຽນ ຂອງອົດສະຕຣາລີ ໃນປີທີ່ ສປປ ລາວ ຈະເປັນປະທານອາຊຽນ.
