ຫລາຍເມືອງໃນຈີນປະສົບອາກາດຮ້ອນອົບເອົ້າ ຢ້ານກະທົບໄຟຟ້າ, ຜົນຜະລິດ ແລະ ເສດຖະກິດ

ສໍານັກຂ່າວ Reuters ລາຍງານວ່າ: ຫລາຍເມືອງໃຫຍ່ຂອງຈີນຜະເຊີນອາກາດຮ້ອນອົບເອົ້າຈົນທາງການຕ້ອງປະກາດເຕືອນໄພຄວາມຮ້ອນ, ຂະນະທີ່ນະຄອນຫລວງປັກກິ່ງຄາດວ່າຈະພົບກັບອຸນຫະພູມສູງກວ່າ 36 ອົງສາໃນວັນທີ 15 ພຶດສະພານີ້ ສົ່ງຜົນໃຫ້ເກີດຄວາມກັງວົນວ່າຄື້ນຄວາມຮ້ອນດັ່ງກ່າວຈະສົ່ງຜົນກະທົບຕໍ່ໄຟຟ້າ, ຜົນຜະລິດ ແລະ ເສດຖະກິດທີ່ບອບບາງຂອງປະເທດ.

ຈີນຜະເຊີນຄື້ນຄວາມຮ້ອນໃນຫລາຍພື້ນທີ່ຂອງປະເທດນັບແຕ່ເດືອນມີນາຜ່ານມາ ໂດຍເມື່ອມໍ່ໆມານີ້ ມົນທົນຢຸນນານມີອຸນຫະພູມສູງກວ່າ 40 ອົງສາ ເຮັດໃຫ້ປະຊາຊົນຫລາຍລ້ານຄອບຄົວຕ້ອງເປີດເຄື່ອງປັບອາກາດເພື່ອບັນເທົາຄວາມຮ້ອນ ຈົນສ້າງພາລະໜັກໃຫ້ໂຄງຂ່າຍໄຟຟ້າຂອງປະເທດ.

ໃນໄລຍະ 2-3 ວັນຜ່ານມາ ມົນທົນຊານຕົງ ແລະ ນະຄອນຫລວງປັກກິ່ງໄດ້ອອກຄໍາເຕືອນກ່ຽວກັບສະພາບອາກາດທີ່ຮ້ອນຈົນສົ່ງຜົນກະທົບຕໍ່ສຸຂະພາບຂອງປະຊາຊົນ. ຂະນະທີ່ເມືອງທີ່ມີປະຊາກອນໜາແໜ້ນເຊັ່ນ: ຈີ່ໜານ, ທຽນຈິນ ແລະ ເຈິ້ງໂຈ ຄາດວ່າຈະມີອຸນຫະພູມເພີ່ມສູງເຖິງ 37 ອົງສາໃນອີກບໍ່ດົນ.

ກົມອຸຕຸນິຍົມວິທະຍາຂອງຈີນເຕືອນພາກພື້ນຕ່າງໆໃຫ້ກຽມພ້ອມຮັບມືສະພາບອາກາດທີ່ຄາດວ່າຈະຮ້ອນໜັກກວ່າເກົ່າໃນປີີນີ້ ໂດຍຈີນຜະເຊີນຄື້ນຄວາມຮ້ອນກ່ອນເຂົ້າຊ່ວງລະດູຮ້ອນ ເຊິ່ງຖືເປັນສະຖານະການທີ່ໜ້າກັງວົນສໍາລັບຂະແໜງກະສິກໍາ. ນອກຈາກນີ້ ຜົນຜະລິດທີ່ເສຍຫາຍຈາກອາກາດຮ້ອນອົບເອົ້າຍັງອາດເຮັດໃຫ້ລາຄາອາຫານປັບເພີ່ມຂຶ້ນ ເຊິ່ງຈະຊໍ້າຕື່ມສະຖານະການເງິນເຟີ້ ແລະ ສ້າງແຮງກົດດັນຕໍ່ເສດຖະກິດຈີນທີ່ກໍາລັງພະຍາຍາມຟື້ນຕົວຈາກໄລຍະໂຄວິດ.