ຫລາຍພື້ນທີ່ໃນອາຊີ ຜະເຊີນ “ອາກາດຮ້ອນອົບເອົ້າ” ລະດັບອັນຕະລາຍ

ສະຫະພັນສະພາກາແດງ ແລະ ສະພາສ້ຽວວົງເດືອນສາກົນ (IFRC) ລາຍງານວ່າ: ຫລາຍພື້ນທີ່ຂອງພາກພື້ນອາຊີ-ປາຊີຟິກເຊັ່ນ: ມາເລເຊຍ, ເນປານ, ບັງກະລາເດັດ, ອິນເດຍ, ໄທ, ຫວຽດນາມ, ລາວ ແລະ ອື່ນໆ ພົບອຸນຫະພູມເພີ່ມສູງເຖິງລະດັບອັນຕະລາຍ.

ຖະແຫລງການຈາກ IFRC ລະບຸວ່າ: ອາກາດຮ້ອນອົບເອົ້າ ບວກກັບຄຸນນະພາບອາກາດຕໍ່າ ທໍາລາຍຊີວິດການເປັນຢູ່ ແລະ ສ້າງອັນຕະລາຍຕໍ່ສຸຂະພາບຂອງຄົນຫລາຍລ້ານ ໂດຍມີການກວດພົບຜູ້ຕິດເຊື້ອທາງຫົວໃຈ ແລະ ຫລອດເລືອດ ແລະ ລະບົບທາງເດີນຫາຍໃຈ ລວມທັງຜູ້ເສຍຊີວິດເພີ່ມຂຶ້ນຫລາຍ.

ເຖິງວ່າຈະມີຝົນຕົກໃນຫລາຍພາກພື້ນທີ່ຊ່ວຍຫລຸດອຸນຫະພູມ ແລະ ກໍາຈັດມົນລະພິດບາງສ່ວນ, ແຕ່ບໍ່ໄດ້ຫລຸດຄວາມເຂັ້ມຂອງຄວາມຮ້ອນ ແລະ ຄວາມຊຸ່ມໂດຍລວມລົງ ເຮັດໃຫ້ສະຖານະການອັນທ້າທາຍໃນໄລຍະຕໍ່ໜ້າອາດຍັງບໍ່ປ່ຽນແປງ.

ລາຍງານລະບຸວ່າ: ບັງກະລາເດັດຜະເຊີນຄື້ນຄວາມຮ້ອນທີ່ຜິດປົກກະຕິແຜ່ເຂົ້າປົກຄຸມຫລາຍພື້ນທີ່ ເຊິ່ງລວມທັງນະຄອນຫລວງທາກາ ຂະນະທີ່ເຂົ້າສູ່ໄລຍະສູງສຸດຂອງລະດູຮ້ອນ ໂດຍສໍານັກງານອຸຕຸນິຍົມວິທະຍາບັງກະລາເດັດລາຍງານອຸນຫະພູມສູງສຸດໃນປະເທດລະດັບ 37,6 ອົງສາ ຢູ່ເຂດຣາຊາຮີທາງຕາເວັນຕົກ ໃນວັນທີ 9 ພຶດສະພາຜ່ານມາ.