ຢູນິເທວ ແລະ ສູນບໍລິຫານລັດດິຈິຕ໋ອນ ຮ່ວມມືກັນຫັນເປັນທັນສະໄໝໃນການພັດທະນາ-ສຶກສາຄົ້ນຄວ້າຫັນເປັນລັດຖະບານດິຈິຕ໋ອນ

ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສູນບໍລິຫານລັດດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ບໍລິສັດ ສະຕຣາ ໂທລະຄົມ ຈໍາກັດ (ຢູນີເທວ) ໄດ້ຈັດຂຶ້ນໃນວັນທີ 9 ພຶດສະພາ 2023 ທີ່ສໍານັກງານໃຫຍ່ບໍລິສັດ ສະຕຣາໂທລະຄົມ ຈໍາກັດ, ເພື່ອການຮ່ວມມືໃນການຈັດຕັ້ງຜັນຂະຫຍາຍນຳໃຊ້ລະບົບເຕັກໂນໂລຊີສື່ສານຂໍ້ມູນຂ່າວສານ ຫັນເປັນທັນສະໄໝ ຂອງສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ, ສປປ ລາວ ໃນຍຸກປະຕິວັດອຸດສາຫະກຳ 4.0 ຢູ່ ສປປ ລາວ ແນໃສ່ເພື່ອເຮັດໃຫ້ການພັດທະນາ, ການສຶກສາຄົ້ນຄວ້າຫັນເປັນລັດຖະບານດິຈິຕ໋ອນ ແລະ ປັບປຸງຟ້ອນພາສາລາວ.

ພິທີລົງນາມດັ່ງກ່າວ, ລະຫວ່າງ ທ່ານ ບຸນມີ ມາລາວົງ ຮອງຜູ້ອໍານວຍການໃຫຍ່ ບໍລິສັດ ສະຕຣາ ໂທລະຄົມ ຈໍາກັດ ແລະ ທ່ານ ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ, ໂດຍການເຂົ້າຮ່ວມຂອງທ່ານ ບໍ່ວຽງຄຳ ວົງດາລາ  ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ແລະ ທ່ານ ເຈີ່ນ ຈຸງ ຮືງ ຜູ້ອໍານວຍການໃຫຍ່ ບໍລິສັດ ສະຕາ ໂທລະຄົມຈໍາກັດ ພ້ອມດ້ວຍພາກສ່ວນກ່ຽວຂ້ອງ.

ໂອກາດນີ້, ທ່ານ ຮອງອໍານວຍການໃຫຍ່ ບໍລິສັດ ສະຕຣາ ໂທລະຄົມ ກ່າວວ່າ: ບໍລິສັດ ສະຕຣາ ໂທລະຄົມ ຈໍາກັດ, ເຊິ່ງມີເຄື່ອງໝາຍການຄ້າຢູນີເທວ, ພາຍຫລັງ 15 ປີໄດ້ສ້າງຕັ້ງຂຶ້ນ ແລະ ໄດ້ສືບຕໍ່ພັດທະນາພື້ນຖານໂຄງລ່າງລະບົບເຄືອຂ່າຍໂທລະຄົມມະນາຄົມ ທີ່ນຳໃຊ້ເຕັກໂນໂລຊີທີ່ທັນສະໄໝຂອງໂລກ ໃນຂອບເຂດທົ່ວປະເທດ. ໃນຍຸກປະຕິວັດອຸດສະຫະກໍາ 4.0 ພວກເຮົາໄດ້ຢືນຢັນວ່າ  ຢູນີເທວ ໄດ້ກ້າວເຂົ້າສູ່ໄລຍະໃໝ່ຢ່າງເປັນທາງການ ແລະ ມີຄວາມກຽມພ້ອມທີ່ຈະກາຍເປັນບໍລິສັດ ເຕັກໂນໂລຊີ ແລະ ການສື່ສານ, ທີ່ນໍາໜ້າໃນການປະຕິວັດ ຫັນເປັນດີຈີຕອ໋ນຂອງປະເທດ, ນໍາເອົາລະບົບດີຈີຕ໋ອນເຂົ້າສູ່ການດໍາລົງຊີວິດຂອງປະຊາຊົນ, ຄຽງຄູ່ກັນນັ້ນ ຢູນີເທວ ຈະພະຍາຍາມສູ້ຊົນຖືເອົາການພົວພັນຮ່ວມມືກັບລັດຖະບານ ໂດຍສະເພາະກະຊວງເຕັກໂນໂລຊີ ແລະ ການສື່ສານ ເປັນວຽກງານອັນດັບ 1 ໃນການຈັດຕັ້ງຜັນຂະຫຍາຍຫັນເປັນດີຈີຕ໋ອນ, ບໍລິຫານລັດແບບທັນສະໄໝ. ເພື່ອເຮັດໃຫ້ປະເທດລາວຂອງ ພວກເຮົາກ້າວໜ້າທັນສະໄໝທຽບເທົ່າກັບພາກພື້ນ ແລະ ສາກົນ, ຮັບປະກັນໃຫ້ສັງຄົມມີຄວາມສະຫງົບປອດໄພ, ປະເທດຊາດເຂັ້ມແຂງ, ປະຊາຊົນມີຄວາມສົມບູນພູນສຸກໂດຍອີງໃສ່ການຄົ້ນຄ້ວາປຶກສາຫາລືຂອງວິຊາການກ່ຽວຂ້ອງ 2 ຝ່າຍໄດ້ມີຄວາມເປັນເອກະພາບກັນຂອບເຂດການຮ່ວມມືທັງໝົດ 6 ເນື້ອໃນຄື:

1. ສຶກສາຄົ້ນຄວ້າ ຫລັກການ, ເກັບກຳຂໍ້ມູນ, ວິເຄາະ ຕົວຊີ້ວັດການພັດທະນາບໍລິຫານ ແລະ ບໍລິການຂອງລັດ ຫລື ເອີ້ນວ່າ (Digital Government Index) ເພື່ອຍົກປະສິດທິພາບຂອງລັດ ຫັນເປັນທັນສະໄໝ;
2. ສຶກສາຄົ້ນຄວ້າ ມາດຕະຖານການເກັບກຳຂໍ້ມູນຂອງລັດໃນລະບົບຄລາວພາຍໃນປະເທດ ພ້ອມທັງ ຄົ້ນຄ້ວານະໂຍບາຍ ແລະ ສະໜອງ ລະບົບຄລາວ ໃຫ້ບໍລິການ ພາກລັດ ຫລື ພາກເອກະຊົນ (Cloud Policy);
3. ສຶກສາຄົ້ນຄວ້າ ແລະ ສະໜອງ ລະບົບຕິດຕາມ, ຄຸ້ມຄອງເອກະສານ ແລະ ການນຳໃຊ້ລາຍເຊັນເອເລັກໂຕຣນິກ ໃນພາກລັດ (eOffice, e-Signature) ເພື່ອສົ່ງເສີມການ ບໍລິຫານ ແລະ ບໍລິການ ລັດ ໃຫ້ທັນສະໄໝ;
4. ພັດທະນາ ແລະ ປັບປຸງຟອນເພັດຊະລາດ ໃຫ້ໄດ້ມາດຕະຖານ ແລະ ສາມາດບັນຈຸເຂົ້າໃນທຸກລະບົບປະຕິບັດການ ແລະ ອຸປະກອນ ຄອມພີວເຕີ, ມືຖື ແລະ ເຄື່ອງເອເລັກໂຕຣນິກອື່ນ;
5. ພັດທະນາເນື້ອຫາ ແລະ ສົ່ງເສີມການນໍາໃຊ້ LMOOC ເພື່ອໃຫ້ ພະນັກງານລັດຖະກອນ, ສັງຄົມສາມາດນໍາໃຊ້ ເພື່ອການສຶກສາ ດິຈິຕ໋ອນ;
6. ເພີ່ມທະວີການຮ່ວມມື ເພື່ອຍົກລະດັບຄວາມຮູ້ຂອງພະນັກງານ ລັດຖະກອນ ທາງດ້ານເຕັກໂນໂລຊີດິຈິຕ໋ອນ ເປັນຕົ້ນ ການແລກປ່ຽນຂໍ້ມູນຂ່າວສານ, ປະສົບການ, ການພັດທະນາບຸກຄະລາກອນ, ການຈັດສຳມະນາ, ຝຶກອົບຮົມ ແລະ ກອງປະຊຸມປຶກສາຫາລື.