ທ່ານ ປະທານປະເທດ ເນັ້ນໃຫ້ສະຫະພັນກຳມະບານສືບຕໍ່ເປັນເຈົ້າການປົກປ້ອງສິດຜົນປະໂຫຍດຂອງຊາວຜູ້ອອກແຮງງານ ແລະ ສົ່ງເສີມໃຫ້ມີຄວາມຮູ້ຄວາມສາມາດ

ໃນໂອກາດສະເຫຼີມສະຫຼອງວັນກຳມະກອນສາກົນຄົບ ຮອບ 137 ປີ ທ່ານ ທອງລຸນ ສີສຸລິດ ປະທານປະເທດ ໄດ້ພົບປະໂອ້ລົມ ແລະ ໃຫ້ທິດຊີ້ນຳໃຫ້ແກ່ພະນັກງານ ສະມາຊິກກຳມະບານລາວ ໃນວັນທີ 9 ພຶດສະພາ 2023, ຕ້ອນຮັບໂດຍທ່ານນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສະຫະພັນກຳມະບານລາວ.

ທ່ານ ນາງ ອາລີ ວົງໜໍ່ບຸນທຳ ໄດ້ລາຍງານສະພາບການຂອງກຳມະກອນ ແລະ ຜູ້ອອກແຮງງານໃນພາກພື້ນ ສາກົນ ແລະ ໃນລາວການເຄື່ອນໄຫວວຽກງານກຳມະບານ  ແລະ ທິດທາງວຽກງານຈຸດສຸມໂດຍຍົກໃຫ້ເຫັນຫຼາຍບັນຫາສຳ ຄັນເຊັ່ນ ຄ່າແຮງງານ ຕະຫຼາດແຮງງານມີແນວໂນ້ມທີ່ຈະຫລຸດລົງ ການຈ້າງງານກໍຫລຸດລົງ ເກີດມີໄພຫວ່າງງານເພີ່ມຂຶ້ນຄາດວ່າຈະມີກຳມະກອນປະມານ 214 ລ້ານຄົນດຳລົງຊິວິດຢູ່ໃນຄວາມທຸກຍາກເພີ່ມຕື່ມອີກເພາະບໍ່ມີວຽກເຮັດງານທຳ ຈຸດພິເສດສໍາລັບຜູ້ອອກແຮງງານລາວໃນເກນອາຍຸອອກແຮງງານຢູ່ ສປປ ລາວກຳລັງແຮງງານສ່ວນໃຫ່ຍມີອາຍຸ 25-64 ປີ ກວມເອົາ 78,7 % ຜູ້ທີ່ມີວຽກເຮັດງານທໍາທັງໝົດ 2,4 ລ້ານກວ່າຄົນ  ກວມເອົາ 97,6% ຂອງກໍາລັງແຮງງານທັງໝົດ  ມີຜູ້ຫວ່າງງານທັງໝົດ 61 ພັນກວ່າຄົນ ໃນນັ້ນມີແມ່ຍິງ 21 ພັນກວ່າຄົນ ກວມເອົາ 34,4% ຂອງຜູ້ຫວ່າງງານທັງໝົດ ແຮງງານລາວທີ່ເຄື່ອນຍ້າຍໄປອອກແຮງງານທີ່ຖືກຕ້ອງຕາມກົດໝາຍຢູ່ຕ່າງປະເທດມີທັງໝົດ 38 ພັນກວ່າຄົນ ຍິງ 21 ພັນກວ່າຄົນ.

ໂອກາດນີ້ທ່ານ ທອງລຸນ ສີສຸລິດ ໄດ້ໂອ້ລົມຕໍ່ພິທີດັ່ງກ່າວເຊິ່ງທ່ານໄດ້ຍົກໃຫ້ເຫັນຄວາມໝາຍຄວາມສຳຄັນຂອງກຳມະກອນຊາວຜູ້ອອກແຮງງານ ແລະ ຍ້ອງຍໍ ຊົມເຊີຍຕໍ່ຜົນງານການເຄື່ອໄຫວຂອງວຽກງານກຳມະບານໃນໄລຍະຜ່ານມາ ເຊິ່ງ ກຳມະບານແມ່ນອົງການຈັດຕັ້ງທີ່ເປັນຕົວ ແທນປົກປ້ອງຜົນປະໂຫຍດ ສະນັ້ນຕ້ອງສົ່ງເສີມການມີວຽກເຮັດງານທໍາປ້ອງກັນຄວາມປອດໄພ ແລະ ຄວາມຍຸຕິທຳໃຫ້ແກ່ຜູ້ອອກແຮງງານຊຸກຍູ້ ສົ່ງເສີມ ສ້າງກຳມະ ກອນ ຜູ້ອອກແຮງງານໃຫ້ມີຄວາມຮູ້ຄວາມສາມາດສູງຂຶ້ນ ພັກເປັນຜູ້ສ້າງຕັ້ງກຳມະບານ ພັກຊີ້ນຳ ແລະ ອຳນວຍໃຫ້ກຳມະບານເຄື່ອນໄຫວໄປຕາມແນວທາງ ແຜນນະໂຍບາຍຂອງພັກ ຊ່ວຍພັກປົກປັກຮັກສາ ແລະ ປົກປ້ອງຜົນປະ ໂຫຍດຂອງຊົນຊັ້ນກຳມະກອນ ຊາວຜູ້ອອກແຮງງານ ພັກຂອງພວກເຮົາຮັບຮູ້ວ່າຊົນຊັ້ນກຳມະກອນ ຊາວຜູ້ອອກ ແຮງງານລາວແມ່ນຊັ້ນຄົນ ກຸ່ມຄົນທີ່ມີຄວາມຕື່ນຕົວການ ເມືອງ ແລະ ມານະຈິດປະຕິວັດສູງ ມີລະບຽບວິໃນສູງກວ່າຊົນຊັ້ນອື່ນ ມີສະຕິຕື່ນຕົວ ເຮັດທຸກສິ່ງທຸກຢ່າງ ເພື່ອຜົນ ປະໂຫຍດຂອງຊົນຊັ້ນ ຂອງປະຊາຊົນຜູ້ອອກແຮງງານສູງກວ່າໝູ່ ທັງເປັນຊົນຊັ້ນທີ່ມີຄວາມເສຍສະຫຼະຜົນປະ ໂຫຍດສ່ວນຕົວເພື່ອສ່ວນລວມ ເມື່ອອີງໃສ່ຄຸນລັກສະນະ ແລະ ຈຸດພິເສດສະເພາະຂອງຊົນຊັ້ນກຳມະກອນສະມາຊິກກຳ ມະບານ ຜູ້ເປັນການນຳແຕ່ລະທ່ານຕ້ອງຮັບປະກັນການ ຮັກສາລັກສະນະ ແລະ ທາດແທ້ປະຕິວັດຂອງຊົນຊັ້ນກຳ ມະກອນໄວ້ໃຫ້ໄດ້ຢ່າງແທ້ຈິງ ຖັນແຖວພະນັກງານ ລັດຖະ ກອນ ສະມາຊິກກຳມະບານໝົດທຸກຄົນຕ້ອງມີຄວາມພາກ ພູມໃຈ ແລະ ກະຕືລືລົ້ນໃນການເຮັດວຽກທີ່ຖືກມອບ ໝາຍໃຫ້ ເປັນເຈົ້າການຕໍ່ການຕອບຕ້ານ ແລະ ແກ້ໄຂປະ ກົດການຫຍໍ້ທໍ້ຕ່າງໆ ເປັນຕົ້ນການສໍ້ລາດບັງຫຼວງ ການເສື່ອມທາດຂາດຄຸນ ຄວາມບໍ່ເຂັ້ມງວດຕໍ່ລະບຽບວິໄນເປັນເຈົ້າການ ແລະ ເປັນໃຈກາງປະສານງານ ໃຫ້ສອດຄ່ອງຕາມຄວາມຮຽກຮ້ອງຕ້ອງການຂອງກຳມະກອນ ຜູ້ອອກແຮງງານໃຫ້ຜູ້ໃຊ້ແຮງງານ ແລະ ໃຫ້ລັດຖະບານເພື່ອຮັບປະກັນຜົນປະໂຫຍດຂອງທຸກຝ່າຍໃນສັງຄົມ ເອົາໃຈໃສ່ປົກປ້ອງ ຮັກສາສິດ ຜົນປະໂຫຍດອັນຊອບທຳ ຂອງກຳມະກອນ ຜູ້ອອກ ແຮງງານ ໄປຄຽງຄູ່ກັນນັ້ນກໍຕ້ອງຊຸກຍູ້ການສົ່ງເສີມ ເອົາ ໃຈໃສ່ກໍ່ສ້າງບຳລຸງຖັນແຖວກຳມະກອນ ແລະ ຜູ້ອອກ ແຮງໃຫ້ໜັກແໜ້ນ ເຂັ້ມແຂງທາງດ້ານກຳລັງກາຍ ສະຕິ ປັນຍາ ແລະ ສີມືແຮງງານທີ່ມີຄຸນນະພາບຢ່າງແທ້ຈິງເພື່ອເປັນກຳລັງແຮງໃຫ້ແກ່ການຜະລິດ.