ຫວຽດນາມປະສົບອາກາດຮ້ອນທີ່ສຸດເປັນປະຫວັດ 44,1 ອົງສາ
ຫວຽດນາມກໍາລັງປະສົບບັນຫາສະພາບອາກາດຮ້ອນທີ່ສຸດເຖິງ 44,1 ອົງສາ ເຊິ່ງເປັນລະດັບສູງສຸດນັບແຕ່ມີການບັນທຶກສະຖິຕິມາ. ຂະນະທີ່ຜູ້ຊ່ຽວຊານດ້ານສະພາບອາກາດເຕືອນວ່າ: ອຸນຫະພູມຈະເພີ່ມຂຶ້ນສູ່ລະດັບດັ່ງກ່າວໃນອີກບໍ່ດົນ ເນື່ອງຈາກຜົນກະທົບຈາກສະພາບໂລກປັ່ນປ່ວນ.
ລາຍງານລະບຸວ່າ: ໃນວັນທີ 6 ພຶດສະພາຜ່ານມາ, ແຂວງທັນຮວ້າ (Thanh Hoa) ທາງຕອນເໜືອຂອງຫວຽດນາມມີອຸນຫະພູມເຖິງ 44,1 ອົງສາ ສູງທໍາລາຍສະຖິຕິເກົ່າໃນປີ 2019 ອຸນຫະພູມ 43,4 ອົງສາ. ຂະນະທີ່ທາງການໄດ້ອອກປະກາດເຕືອນໃຫ້ປະຊາຊົນພະຍາຍາມຫລົບຢູ່ໃນອາຄານໃນໄລຍະເວລາກາງເວັນທີ່ມີອຸນຫະພູມຮ້ອນແຮງທີ່ສຸດ.
ໂດຍປົກກະຕິແລ້ວ ສະພາບອາກາດໃນພາກຕ່າງໆຂອງຫວຽດນາມແຕ່ເໜືອຮອດໃຕ້ຈະແຕກຕ່າງກັນໄປ, ແຕ່ຕອນນີ້ທົ່ວປະເທດກໍາລັງເຂົ້າສູ່ລະດູຮ້ອນທີ່ຮ້ອນແຮງເປັນເວລາຫລາຍເດືອນ ໂດຍທ່ານ Nguyen Ngoc Huy ຜູ້ຊ່ຽວຊານດ້ານການປ່ຽນແປງສະພາບອາກາດຈາກນະຄອນຫລວງຮ່າໂນ້ຍ ເປີດເຜີຍວ່າ: ອຸນຫະພູມທີ່ເພີ່ມຂຶ້ນເປັນປະຫວັດສາດນັ້ນມີສ່ວນເຊື່ອມໂຍງກັບບັນຫາໂລກປັ່ນປ່ວນ ແລະ ໂລກຮ້ອນ.
ປະເທດອື່ນໆໃນອາຊີກໍມີອຸນຫະພູມຮ້ອນແຮງຄືກັນ ໂດຍແຂວງຕາກຂອງໄທເຄີຍຜະເຊີນອຸນຫະພູມສູງເຖິງ 44,6 ອົງສາໃນເດືອນຜ່ານມາ. ຂະນະທີ່ມຽນມາປະສົບອຸນຫະພູມຮ້ອນແຮງເຖິງ 43,8 ອົງສາ ຫລື ສູງສຸດໃນຮອບ 10 ປີຜ່ານມາ, ສ່ວນນະຄອນຫລວງທາກາ ຂອງບັງກະລາເດັດ ຜະເຊີນອຸນຫະພູມຮ້ອນຫລາຍທີ່ສຸດນັບແຕ່ປີ 1960.
ອ້າງອີງ:
https://www.bbc.com/news/world-asia-65518528
https://www.theguardian.com/…/vietnam-records-highest…
