ໂຊເຟີໂດຍສານ ຕ້ອງມີຄວາມຮັບຜິດຊອບສູງ ເພາະເຮົາຄົນດຽວຮັບຜິດຊອບຫລາຍຊີວິດ
ອຸບັດຕິເຫດລົດເມໂດຍສານ (ຈກ 9929 ກຳແພງນະຄອນ) ທີ່ແລ່ນອອກຈາກຄິວລົດທ່າແຂກ ແຂວງຄຳມ່ວນ ມຸ່ງໜ້າສູ່ນະຄອນຫລວງວຽງຈັນ ຕຳຢ່າງຮຸນແຮງ ກັບລົດບັນທຸກ (ກກ 2359 ອຸດົມໄຊ) ທີ່ອອກຈາກນະຄອນຫລວງວຽງຈັນມຸ່ງໜ້າໄປທາງແຂວງບໍລິຄຳໄຊ ຢູ່ເສັ້ນທາງເລກທີ 13 ໃຕ້ ຈຸດບ້ານນາໄຊ ເມືອງທ່າພະບາດ ແຂວງບໍລິຄຳໄຊ, ໃນເວລາ 15:35 ໂມງ ຂອງວັນທີ 1ພຶດສະພາ 2023 ຜ່ານມາ, ເຮັດໃຫ້ມີຜູ້ເສຍຊີວິດເຖິງ 8 ຄົນ (ຍິງ 2 ຄົນ) ,ໃນນີ້ຢູ່ໃນລົດເມ 6 ຄົນ ອີກ 2 ຄົນ (ຍິງ1ຄົນ) ແມ່ນຢູ່ໃນລົດບັນທຸກ, ບາດເຈັບ19 ຄົນໃນຈຳນວນຜູ້ຄົນໂດຍສານ 51 ຄົນນັ້ນ ຖືໄດ້ວ່າເປັນກໍລະນີໃຫຍ່ ແລະມີຜົນເສຍຫາຍທາງດ້ານຊີວິດຫລາຍທີ່ສຸດໃນຮອບເກືອບ 5 ເດືອນຂອງປີນີ້.
ຈາກເຫດການທີ່ເກີດຂຶ້ນນີ້ໄດ້ສ້າງຄວາມສົນໃຈໃຫ້ຄົນໃນສັງຄົມທີ່ຮູ້ຂ່າວ ແລະ ພົບເຫັນ ພ້ອມທັງມີຄຳຖາມຕ່າງໆນາໆຕັ້ງຂຶ້ນມາ ແລະ ຄຳຖາມເຫລົ່ານີ້ອາດຈະມີ ຫລາຍໆຄຳຕອບແຕກຕ່າງກັນໄປ ໂດຍບໍ່ມີຄຳຕອບທີ່ແນ່ນອນ ຍ້ອນວ່າພວກເຮົາບໍ່ໄດ້ຢູ່ໃນເຫດການຕົວຈິງ, ແຕ່ມັນເກີດຂຶ້ນແລ້ວ ເສຍຫາຍໄປແລ້ວທັງໆທີ່ບໍ່ມີໃຜຢາກໃຫ້ເກີດຂຶ້ນດອກເນາະແມ່ນບໍ່, ແຕ່ເມື່ອເກີດຂຶ້ນແລ້ວຕ້ອງຮີບຮ້ອນຫາທາງປັບປຸງແກ່ໄຂໃຫ້ດີຂຶ້ນ.
ດັ່ງນັ້ນ, ໃນຕໍ່ໜ້ານີ້ເພື່ອກຳຈັດປັດເປົ່າ ແລະ ແກ້ໄຂບັນຫາອຸບັດຕິເຫດຕາມທ້ອງຖະໜົນຫລວງມັນພົວພັນເຖິງຫລາຍພາກສ່ວນຄວນເພີ່ມທະວີຄວາມຮັບຜິດຊອບໃຫ້ສູງຂຶ້ນ ລວມທັງເຈົ້າໜ້າທີ່ທີ່ມີສ່ວນກ່ຽວຂ້ອງ ສຳຄັນແມ່ນເລີ່ມຈາກບໍລິສັດຜູ້ເປັນເຈົ້າຂອງລົດ ບໍ່ວ່າຈະເປັນຜູ້ຂັບຂີ່ລົດບັນທຸກ ແລະ ລົດປະເພດໃດໆກໍ່ຕາມ ຜູ້ຂັບຂີ່ ຕ້ອງມີຄວາມຮັບຜິດຊອບສູງຕໍ່ກັບໂຕທ່ານເອງ, ຜູ້ຂີ່ມານຳ, ຜູ້ຄົນຂັບຂີ່ຮ່ວມຖະໜົນກັບທ່ານ ແລະ ທຸກຄົນທີ່ກ່ຽວຂ້ອງຕ້ອງຄຳນຶງເຖິງພ້ອມທັງປະຕິບັດກົດລະບຽບການສັນຈອນທາງບົກໃຫ້ເຂັ້ມງວດ. ໂດຍສະເພາະລົດໂດຍສານສາທະລະນະທີ່ຈະອອກແລ່ນແຕ່ລະຄັ້ງຕ້ອງກວດກາລະອຽດຮັບປະກັນຄວາມປອດໄພທາງເຕັກນິກທຸກຢ່າງ, ການບັນທຸກຜູ້ໂດຍສານໃຫ້ຖືກຕ້ອງຕາມກຳນົດຢ່າເຫັນແກ່ໄດ້ພຽງຢ່າງດຽວ, ການຈຳກັດຄວາມໄວ, ການຊ່ວງເສັງກັນແຊງຂຶ້ນໜ້າຍາດຜູ້ໂດຍສານ, ແລ່ນລົດທາງໄກເພື່ອຮັບປະກັນຄວາມປອດໄພຄວນມີຄົນຂັບລົດຢ່າງໜ້ອຍສອງຄົນເພື່ອສັບປ່ຽນກັນ ແລະ ອືື່ນໆອີກຫລາຍຢ່າງ ທີ່ພົວພັນເຖິງຄວາມປອດໄພຂອງຜູ້ໂດຍສານ, ຄວນຄຳນຶງຢູ່ສະເໝີວ່າ: ມີຫລາຍຊີວິດຝາກໄວ້ນຳເຮົາຄົນດຽວ ເຮົາຄົນດຽວຮັບຜິດຊອບຫລາຍຊີວິດ.
