ແຮງງານລາວ ຜະເຊີນຕໍ່ສິ່ງທ້າທາຍຫລາຍປະການ ທີ່ພາກລັດຕ້ອງຫາທາງອອກອັນເໝາະສົມເພື່ອໃຫ້ຜ່ານຜ່າໄປໄດ້

ໂດຍ: ທິດກໍ່າ

ມາຮອດປີ 2023 ການກໍາເນີດເກີດຂຶ້ນວັນກໍາມະກອນສາກົນ ແມ່ນມີອາຍຸຄົບຮອບ 137 ປີພໍດີ (1/5/1886-1/5/2023) ການໄດ້ມາເຊິ່ງກາຍມາເປັນວັນກໍາມະກອນສາກົນ ມັນກໍບໍ່ໄດ້ມາແບບງ່າຍດາຍຄືປອກກ້ວຍ ມັນຕ້ອງໄດ້ຜ່ານຂະບວນການຕໍ່ສູ້ຂອງຊົນຊັ້ນກໍາມະກອນຢູ່ໃນຫລາຍປະເທດທົ່ວໂລກ ໂດຍສະເພາະແມ່ນຢູ່ໃນບັນດາປະເທດເອີຣົບຕາເວັນຕົກ ເພາະເລີ່ມແຕ່ຍຸກຊຸມປີ 1800 ກວ່າໆ ລະບອບນາຍທຶນເລີ່ມກໍ່ຕົວ ແລະ ຂະຫຍາຍຕົວເຂັ້ມແຂງດ້ວຍການບັງຄັບໃຫ້ກໍາມະກອນໃນໂຮງຈັກໂຮງງານເຮັດວຽກມື້ໜຶ່ງ 10 ກວ່າຊົ່ວໂມງ ຍ້ອນຜົນພວງຂອງການກົດຂີ່ຂູດຮີດຄືດັ່ງກ່າວ ຈຶ່ງກໍ່ໃຫ້ເກີດມີຂະບວນການຕໍ່ສູ້ເພື່ອທວງເອົາສິດໃນການອອກແຮງງານ ໂດຍຮຽກຮ້ອງໃຫ້ເຮັດວຽກພຽງ 8 ຊົ່ວໂມງຕໍ່ມື້. ໃນຂະບວນການຕໍ່ສູ້ເພື່ອຮຽກຮ້ອງເອົາສິດເສລີພາບໃນການອອກແຮງງານນັ້ນ ບາງຄັ້ງມັນກໍເຕັມໄປດ້ວຍຄວາມຮຸນແຮງຈົນເຖິງຂັ້ນເອົາຊີວິດແລກ, ມີຜູ້ເຈັບຜູ້ເປັນ, ມີຜູ້ຕາຍຜູ້ຍັງ, ຈໍານວນກໍາມະກອນທີ່ຮ່ວມກັນເດີນຂະບວນປະທ້ວງເປັນແສນໆຄົນໄດ້ພາກັນອອກສູ່ຖະໜົນ ຖືກພວກເຈົ້າໜ້າທີ່ ແລະ ພວກນາຍທຶນປາບປາມຢ່າງປ່າເຖື່ອນທີ່ສຸດ, ແຕ່ສຸດທ້າຍ ພວກກໍາມະກອນກໍໄດ້ຮັບໄຊຊະນະ ອໍານາດລັດຕ້ອງຍອມຮັບຮູ້ ແລະ ປະຕິບັດຕາມ ແລ້ວກໍປະກາດສ້າງຕັ້ງອົງການແຮງງານສາກົນຂຶ້ນ ທັງກໍານົດເອົາວັນທີ 1 ພຶດສະພາ 1886 ເປັນວັນແຮງງານສາກົນ ຫລືເວົ້າອີກຢ່າງໜຶ່ງກໍແມ່ນວັນກໍາມະກອນສາກົນນັ້ນເອງ. ນີ້ຄືທີ່ມາທາງປະຫວັດສາດຂອງວັນດັ່ງກ່າວທີ່ພວກເຮົາຕ້ອງພາກັນຈົດຈໍາລໍາລຶກ ແລະ ຮູ້ບຸນຄຸນຂອງນັກຕໍ່ສູ້ເພື່ອສິດທິໃນຍຸກນັ້ນ.

ແຕ່ຢ່າງໃດກໍດີ, ພໍຕົກມາໃນຍຸກນີ້ ໂດຍສະເພາະໃນສະພາບປັດຈຸບັນ ຊາວຜູ້ອອກແຮງງານລາວ ກໍຄືກໍາມະກອນລາວພວມປະສົບບັນຫາຫລາຍຢ່າງທີ່ມາກະທົບ ໂດຍສະເພາະບັນຫາເສດຖະກິດພາຍໃນປະເທດ, ບັນຫາເລື່ອງປາກເລື່ອງທ້ອງ ເຊິ່ງມີຜົນກະທົບບໍ່ໜ້ອຍຕໍ່ຊີວິດການເປັນຢູ່ ບວກຄ່າແຮງງານຕໍ່າ, ຊໍ້າບໍ່ໜຳມາຖືກຜົນກະທົບຈາກໂຄວິດ-19 ເປັນເວລາສອງສາມປີ ຈຶ່ງເປັນເຫດໃຫ້ແຮງງານລາວຈໍານວນບໍ່ນ້ອຍພາກັນຫລັ່ງໄຫລອອກໄປເຮັດວຽກຢູ່ຕ່າງປະເທດ ໂດຍສະເພາະຢູ່ໄທ ແລະ ສ.ເກົາຫລີ. ອີກປະການໜຶ່ງ ສະພາບເງິນກີບລາວກໍເຟີ້ ລາຄາສິນຄ້າໃນທ້ອງຕະຫລາດນັບມື້ຖີບຕົວສູງຂຶ້ນເລື້ອຍໆ.

ຫາກຕັ້ງໂຈດກັນວ່າ, ຍັງອີກດົນປານໃດ ຊີວິດການເປັນຢູ່ຂອງກໍາມະກອນ ຫລື ຊາວຜູ້ອອກແຮງງານລາວຈຶ່ງຈະດີຂຶ້ນ. ຄໍາຕອບກໍຄື ເມື່ອໃດເສດຖະກິດລາວມີຄວາມເຂັ້ມແຂງໝັ້ນຄົງດ້ວຍການຜະລິດກຸ້ມຕົນເອງ ເພິ່ງຕົນເອງ, ພະຍາຍາມຫລີກລ່ຽງຄ່ານິຍົມໃຊ້ແຕ່ຂອງໝູ່ ຫາຍໃຈຮ່ວມຮູດັງໝູ່ ພາກັນເຫີ່ໄປອອກແຮງງານຢູ່ບ້ານເຂົາ ກໍຍິ່ງເຮັດໃຫ້ປະເທດເຂົາຈະເລີນ, ເງິນເຂົາກໍຍິ່ງແຂງຄ່າ ເພາະມັນຄືສົງຄາມທາງດ້ານເສດຖະກິດ ໃຜເກັ່ງຜູ້ນັ້ນໄດ້ປຽບ ແລະ ຜູ້ນັ້ນກໍຊະນະ  ນີ້ຄືສັດຈະທໍາຂອງຄໍາຕອບ.

ໄປຄຽງຄູ່ກັນນັ້ນ, ເບື້ອງລັດກໍຕ້ອງຊອກຫາທາງອອກຢ່າງເໝາະສົມ, ເລັ່ງສົ່ງເສີມການຜະລິດພາຍໃນໃຫ້ເຂັ້ມແຂງ, ການສົ່ງອອກຕ້ອງໃຫ້ຫລາຍກວ່າການນໍາເຂົ້າ, ບໍ່ສໍ້ລາດບັງຫລວງ, ພັດທະນາປະເທດຕ້ອງພັດທະນາຄົນ, ພັດທະນາຄົນເພື່ອມາສ້າງສາປະເທດຊາດ, ນໍາໃຊ້ຄົນຜູ້ມີຄວາມຮູ້ຄວາມສາມາດ ມີຄວາມຈົງຮັກພັກດີຕໍ່ຊາດ ແລະ ປະຊາຊົນ, ຮັບໃຊ້ປະຊາຊົນຢ່າງແທ້ຈິງ, ບໍ່ເຫັນແກ່ຕົວ, ແກ່ພັກພວກ, ກຸ່ມກ້ອນ, ເຊື້ອສາຍລາຍລ່ອງ, ເວົ້າແລ້ວຕ້ອງເຮັດໃຫ້ໄດ້, ເບິ່ງກວ້າງເຫັນໄກ ເພາະບ້ານເຮົາໃນຍຸກນີ້ກໍມີຄວາມຈະເລີນຂຶ້ນຫລາຍແລ້ວ ຂໍພຽງແຕ່ພວກເຮົາມີຄວາມສາມັກຄີຢູ່ອ້ອມຂ້າງພັກປຽບເໝືອນດາວລ້ອມເດືອນ ຈະເປັນວຽກນ້ອຍຫລືໃຫຍ່ກໍຈະຜ່ານຜ່າໄປດ້ວຍດີ.