ພາສີ ປະຈຳຈຸດປະສານງານນາເຕີຍ ຢຶດລົດບັກທຸກ 12 ລໍ້ ທີ່ລັກລອບ ນຳເຂົ້າໂດຍບໍ່ມີເອກະສານຖືກຕ້ອງ

ວັນທີ 4 ພຶດສະພາ 2023 ຜ່ານມານີ້, ເຈົ້າໜ້າທີ່ພາສີ ພະແນກສືບ-ສອບສວນ ແລະ ປາບປາມການລັກລອບໜີພາສີ (ພສປ) ປະຈຳຈຸດປະສານງານນາເຕີຍ, ໄດ້ສົມທົບກັບເຈົ້າໜ້າທີ່ພາສີ ປະຈຳດ່ານພາສີສາກົນບໍ່ເຕັນ,ໄດ້ຕິດຕາມ ແລະ ກວດກາຕາມແຫຼ່ງຂ່າວລາຍງານວ່າ: ມີລົດບັນທຸກ 12 ລໍ້ສີຂາວ, ຍີ່ຫໍ້ (ຂຽນເປັນພາສາຈີນ) ບໍ່ຕິດປ້າຍທະບຽນຈອດຢູ່ໃນບໍລິເວນເຂດເສດຖະກິດບໍ່ເຕັນແດນງາມ.

ເຈົ້າໜ້າພາສີ, ຈຶ່ງໄດ້ເຄື່ອນໄຫວຕິດຕາມພົບເຫັນເປົ້າໝາຍໃນເຂດດັ່ງກ່າວ, ຜ່ານການກວດກາເບື້ອງຕົ້ນ ເຫັນວ່າ:  ເປັນລົດມືສອງລັກລອບນຳເຂົ້າບໍ່ມີເອກະສານອະນຸຍາດນຳເຂົ້າເສຍພາສີ-ອາກອນ ແລະ ພັນທະອື່ນໆ. ດັ່ງນັ້ນ, ຈຶ່ງໄດ້ນຳລົດຄັນດັ່ງກ່າວມອບໃຫ້ພາສີ ປະຈຳແຂວງຫຼວງນໍ້າທາ, ດຳເນີນຂັ້ນຕອນຕາມກົດໝາຍ ແລະ ລະບຽບການ ຕໍ່ໄປ.