ຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ສາມາດເຊັນອອກໃບຕາດິນ 21.000 ກວ່າຕອນ

ວັນທີ 4 ພຶດສະພາ 2023 ນີ້, ກອງປະຊຸມສະຫຼຸບວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ (ພຊສ ນວ) ປະຈໍາສົກປີ 2022 ແລະ ທິດທາງແຜນການປະຈໍາປີ 2023 ຕິດພັນກັບການມອບຫຼຽນໄຊແຮງງານ ຫຼຽນກາແຮງງານ ແລະ ໃບຍ້ອງຍໍຜົນງານ 5 ປີ (2016-2020) ໃຫ້ ພະນັກງານ-ລັດຖະກອນ ພະແນກ ພຊສ ນວ ໂດຍເປັນປະທານຂອງທ່ານ ບຸນຊົມ ຊົງວິໄລ ຫົວໜ້າພະແນກ ພຊສ ນວ ມີທ່ານ ພູຂົງ ບັນນາວົງ ຄະນະປະຈໍາພັກ ຮອງເຈົ້າຄອງ ນວ ພ້ອມດ້ວຍຄະນະພະແນກ ແລະ ພາກສ່ວນ ກ່ຽວຂ້ອງເຂົ້າຮ່ວມ.

ທ່ານ ບຸນຊົມ ຊົງວິໄລ ກ່າວວ່າ: ການຈັດຕັ້ງປະຕິບັດຫນ້າທີ່ວຽກງານວິຊາສະເພາະ ຂອງ ພຊສ ນວ ທີ່ພົ້ນເດັ່ນສົກປີ 2022 ຜ່ານມາ ເປັນຕົ້ນ ວຽກງານຂະແໜງທີ່ດິນ ສົກປີ 2022 ພະແນກ ພຊສ ນວ ສາມາດເຊັນໃບອອກຕາດິນໄດ້ 21.896 ຕອນ ມາຮອດຕົ້ນເດືອນມັງກອນ-ເມສາ 2023 ປະຕິບັດໄດ້ 8.579 ຕອນ ໂດຍລວມການເຊັນໃບຕາດິນໄດ້ແຕ່ປີ 2021-2023 ປະຕິບັດໄດ້ 53.611 ຕອນ ສາມາດຂຶ້ນທະບຽນອອກໃບຕາດິນໃນສົກປີ 2022 ຕາມທີ່ສະພາປະຊາຊົນ ນວ ມອບໃຫ້ 10.000 ຕອນ,ສາມາດຈັດຕັ້ງປະຕິບັດໄດ້ 12.307 ຕອນ ເທົ່າກັບ 123.07% ແລະ ໃນປີ 2023 ສະພາປະຊາຊົນ ນວ ແລະ ກະຊວງຊັບພະຍາກອນ ມອບໃຫ້ 23.498 ຕອນ ຮອດຕົ້ນເດືອນມັງກອນ-ເມສາ 2023 ປະຕິບັດ 3.887 ຕອນ ເທົ່າກັບ 17% ພ້ອມນີ້ຍັງໄດ້ສໍາເລັດການສະແກນສໍານວນຕອນດິນເຂົ້າໃນລະບົບເຊີເວີ ຕາມທີ່ສະພາປະຊາຊົນ ນວ ມອບໃຫ້ 20.000 ຕອນ ສາມາດປະຕິບັດໄດ້ 65.766 ຕອນ ເທົ່າກັບ 328,83% ກວດກາສູນໂມງເອກະສານຕົກຄ້າງແຕ່ປີ 2018 ມີ 6.181 ຕອນ ປະຕິບັດໄດ້ 5.705 ຕອນ ຍັງຄ້າງ 476 ຕອນ ສາມາດຈົດທະບຽນປ່ຽນແປງສິດນໍາໃຊ້ທີ່ດິນໄດ້ 31.859 ສະບັບ ລວມເປັນເງິນທັງຫມົດ 2,87 ຕື້ກວ່າກີບ ສໍາເລັດສໍາຫຼວດເກັບກໍາຂໍ້ມູນ ພ້ອມທັງດັດແກ້ ແລະ ມອບໃບຕາດິນໃຫ້ພາກສ່ວນທີ່ເຫຼືອຈາກຜົນກະທົບໂຄງການ ກໍ່ສ້າງ ທາງລົດໄຟລາວ-ຈີນ ໄລຍະ1-2 ແລະ ໂຄງການກໍ່ສ້າງທາງດ່ວນ ນວ ຫາວັງວຽງ ແຂວງວຽງຈັນ ໃນ 3 ເມືອງ ມື 27 ບ້ານ ປະຕິບັດໄດ້ 113 ຕອນ ແລະ ລົງຕິດຕາມກວດກາສະພາບສິ່ງແວດລ້ອມຢູ່ເຂດຕ່າງໆຂອງ ນວ ເປັນຕົ້ນ ການຄົ້ນຄວ້າຮັບຮອງບົດລາຍງານແຜນການຄຸ້ມຄອງ ສິ່ງແວດລ້ອມ ສໍາລັບໂຄງການພັດທະນາໄດ້ 138 ໂຄງການ ສໍາຫຼວດວັດແທກເກັບກໍາຂໍ້ມູນນໍ້າໄດ້ 12 ຈຸດ ໃນ 6 ເມືອງເປົ້າໝາຍ ແລະ ອື່ນໆ.