ເຝົ້າລະວັງ ! ມັດຈຸລາດອາດມານໍາພາຍຸລະດູຮ້ອນ ຍ້ອນເຮົາມີບົດຮຽນມາຫລາຍປີແລ້ວ

ໂດຍ: ທິດກໍ່າ
ເຫັນຂ່າວຄາວນໍາສື່ອອນລາຍຫລາຍຊ່ອງໃນທົ່ວປະເທດ ເກີດມີລົມພາຍຸຝົນຕົກໜັກ ພ້ອມໝາກເຫັບຕົກຫລາຍແຫ່ງຢູ່ທາງພາກເໜືອ, ພາກກາງ ແລະ ພາກໃຕ້ຂອງປະເທດເຊັ່ນ: ທາງແຂວງຜົ້ງສາລີ ຫຍັບລົງມາແຖວໄຊຍະບູລີ ຕູດລົງມາຮອດວັງວຽງໃນອາທິດຫລັງໆທີ່ຜ່ານມາ. ສ່ວນທາງພາກໃຕ້ກໍແມ່ນທາງແຂວງສາລະວັນ ແລະ ສະຫວັນນະເຂດ ໄດ້ເກີດມີລົມພາຍຸຝົນຕົກໜັກໝາກເຫັບຕົກເໝືອນກັນ.

ສະເພາະຢູ່ນະຄອນຫລວງວຽງຈັນປີນີ້ ຟ້າຝົນຍັງມິດຈີ່ຫລີ່ ອາກາດຮ້ອນອົບເອົ້າເຜົາຜານມາແຕ່ເດືອນມີນາຮອດເມສາກ້າວສູ່ຕົ້ນເດືອນພຶດສະພາ ຄາດຄະເນມື້ໃດກໍວ່າມື້ນັ້ນ ໂດຍບໍ່ວ່າມື້ໃດຝົນຈະມາຕົກໂຮຍຮໍາພໍໃຫ້ຊາວນະຄອນຫລວງວຽງຈັນຈະໄດ້ຢູ່ສະບາຍຫາຍຮ້ອນ. ສະຫລຸບໄດ້ວ່າ: ສະພາບດິນຟ້າອາກາດຢູ່ນະຄອນຫລວງວຽງຈັນປີນີ້ລະດູໜາວໄດ້ແກ່ຍາວ, ລະດູຮ້ອນກໍແກ່ຍາວ ແລະ ອາດແກ່ຍາວໄປຮອດຕົ້ນເດືອນມິຖຸນາ 2023 ຫລື ອາດແຫ້ງແລ້ງໄປຮອດເດືອນກໍລະກົດກໍເປັນໄດ້.

ແນວໃດກໍຕາມ, ເວົ້າເຖິງສະພາບດິນຟ້າອາກາດ ໂດຍສະເພາະເລື່ອງຟ້າຝົນມັນກໍນັບມື້ມີການປ່ຽນແປງຍ້ອນມີຫລາຍປັດໄຈມາກະທົບ ເພາະຟ້າຝົນມັນກໍມານໍາຄວາມຊຸ່ມຊື່ນຈາກທໍາມະຊາດ ເຊັ່ນບ່ອນໃດມີພູຜາປ່າໄມ້ດົກໜາ, ມີແມ່ນໍ້າລໍາເຊທີ່ອຸດົມສົມບູນຝົນມັນກໍມັກຕົກເລື້ອຍໆ ເຊິ່ງໃນຫລັກທໍານາຍໂລາສາດເພິ່ນເອີ້ນວ່າ: ປ່າຫິມະພານນັ້ນເອງ. ສ່ວນວ່າບ່ອນໃດມີປ່າໄມ້, ມີແມ່ນໍ້າລໍາເຊໜ້ອຍ. ກົງກັນຂ້າມມີການທໍາລາຍທໍາມະຊາດ ຍ້ອນການສ້າງສາພັດທະນາໂດຍບໍ່ຄໍານຶງເຖິງສິ່ງແວດລ້ອມ ຫລືວ່າ ຂອດປົກປັກຮັກສາທໍາມະຊາດ ບໍ່ໄປຕາມທິດຍືນຍົງ ອາກາດຮ້ອນອົບເອົ້າກໍຈະນັບມື້ມາຢາມ ທັງເຜົາຜານດັ່ງທີ່ເຫັນຢູ່ໃນນະຄອນຫລວງວຽງຈັນໃນປັດຈຸບັນນັ້ນແລ.

ນອກຈາກສະພາບທີ່ກ່າວມານີ້ແລ້ວ, ເວລາມີການຜັນຜວນຂອງດິນຟ້າອາກາດກໍມັກຈະເກີດມີລົມພາຍຸຝົນຕົກຮຸນແຮງ ແຖມຍັງມີໝາກເຫັບເມັດໃຫຍ່ຕົກອາດທໍາລາຍຊີວິດ ແລະ ຊັບສິນຂອງຄົນເຮົາບໍ່ຫລາຍກໍໜ້ອຍ ເພາະເມັດໝາກເຫັບຕົກສະໄໝນີ້ມັນບໍ່ຄືສະໄໝກ່ອນ ມັນມີທັງກ້ອນນ້ອຍ-ກ້ອນໃຫຍ່ໂຍນລົງໃສ່ແຜ່ນກະເບື້ອງຫລັງຄາເຮືອນຈົນລຸຊອດລົງຮອດພື້ນເຮືອນ. ນອກນັ້ນ ກໍແຖມມີລົມພາຍຸກໍພັດຖະຫລົ່ມຕົ້ນໄມ້ຫັກ, ເສົາໄຟຟ້າລົ້ມເດຍລະດາດ, ຫລັງຄາບ້ານເຮືອນເພພັງ ລວມໄປຮອດຜົນຜະລິດຖືກທໍາລາຍຢ່າງໜ້າອະໜາດ. ນີ້ຄືມັດຈຸລາດທີ່ອາດມານໍາພາຍຸລະດູຮ້ອນຢ່າງບໍ່ຄາດຄິດ.

ເຖິງຢ່າງໃດກໍດີ, ໃນຍຸກສະໄໝທີ່ວິທະຍາສາດເຕັກໂນໂລຊີກ້າວໜ້າລໍ້າຍຸກຄືດັ່ງທຸກວັນນີ້ ພວກເຮົາສາມາດຫາທາງອອກດ້ວຍການຕິດຕາມສະພາບການປ່ຽນແປງຂອງດິນຟ້າອາກາດໃນແຕ່ລະວັນຈາກອຸຕຸນິຍົມອຸທົກກະສາດ. ນອກນັ້ນ ກໍມີສະຕິລະວັງຕົວໃນການໄປມາ, ຮັກສາຄວາມປອດໄພໃຫ້ຊີວິດ ແລະ ຊັບສິນດ້ວຍການບໍ່ປະໝາດ ນັບທັງສ້າງສິ່ງແວດລ້ອມ, ທີ່ພັກພາອາໄສໃຫ້ໄດ້ມາດຕະຖານ ຈຶ່ງສາມາດຕ້ານທານກັບມັດຈຸລາດທີ່ແອບແຝງມາໃນພາຍະລະດູຮ້ອນ.