ເຂັ້ມງວດກວດກາການນໍາເຂົ້າພືດກະສິກໍາ ແລະ ສັດລ້ຽງ ເພື່ອສະກັດກັ້ນການແພ່ລະບາດຂອງເຊື້ອພະຍາດອະຫິວາໝູອາຟຣິກາ

ໃນສະພາບປັດຈຸບັນນີ້ ພວກເຮົາຕ້ອງຍອມຮັບວ່າ ການນໍາເຂົ້າສິນຄ້າກະສິກໍາຈະເປັນປະເພດສັດລ້ຽງ ຊິ້ນສ່ວນບາງປະເພດຂອງສັດລ້ຽງເຊັ່ນ: ເຄື່ອງໃນສັດ, ອາຫານທະເລ, ພືດຜັກ …. ຈາກປະເທດອ້ອມຂ້າງ ມັນຍັງແມ່ນສິ່ງທີ່ຈຳເປັນທີ່ບໍ່ສາມາດຫລີກລ່ຽງໄດ້ ເນື່ອງຈາກການຜະລິດສະບຽງອາຫານທາງດ້ານກະສິກຳນັບທັງສັດລ້ຽງ, ພືດຜັກ, ໝາກໄມ້ ເພື່ອສະໜອງຄວາມຕ້ອງການຂອງສັງຄົມພາຍໃນປະເທດບໍ່ທັນແຂງແຮງ ແລະພຽງພໍເທື່ອ ສິ່ງທີ່ມີແລ້ວກໍເປັນພຽງໜໍ່ແໜງທີ່ເກີດຂຶ້ນໃໝ່ບໍ່ທັນເຕີບໃຫຍ່ເຂັ້ມແຂງແທ້ ຊຶ່ງມັນຕ້ອງໄດ້ອາໄສເວລາດົນ ນຳເອົາປະສົບການແລະເຕັກນິກວິທະຍາສາດເຂົ້າມາຊ່ວຍ ຈຶ່ງຈະສະໜອງໄດ້ຕາມຄວາມຮຽກຮ້ອງຕ້ອງການຂອງສັງຄົມ.

ໃນເມື່ອຫາກມີການນຳເຂົ້າສິນຄ້າກະສິກຳຈາກຕ່າງປະເທດໃນສະພາວະທີ່ປະເທດເຮົາຍັງອ່ອນນ້ອຍບໍ່ທັນເຂັ້ມແຂງຄືແນວນີ້້ ແນ່ນອນວ່າມັນມີທັງດ້ານດີ ແລະ ດ້ານອ່ອນຄຽງຄູ່ກັນໄປ ນຳເຂົ້າມີທັງຖືກຕ້ອງ ແລະ ບໍ່ຖືກຕ້ອງ ບາງສິ່ງບາງຢ່າງກໍດີມີຄຸນນະພາບສູງ ແລະ ບາງຢ່າງຂາດຄຸນນະພາບ (ຄຸນນະພາບຕ່ຳ) ທັງມີຄວາມສ່ຽງດ້ານພະຍາດຕິດ, ສານປົນເປື້ອນຕ່າງໆຕໍ່ນຳອີກ  ເປັນຕົ້ນແມ່ນອາຫານທະເລແຊ່ແຂງ ເຄື່ອງໃນສັດ ພືດຜັກ, ໝາກໄມ້ ແລະ ອື່ນໆ.

ຊຶ່ງຜ່ານຜາພາກສ່ວນກ່ຽວຂ້ອງ ກໍໄດ້ອອກມາເຕືອນສະຕິຜູ້ບໍລິໂພກຢູ່ເປັນປະຈຳ ເຊິ່ງຫລ້າສຸດ ກົມລ້ຽງສັດ ແລະ ການປະມົງກໍໄດ້ອອກແຈ້ງການເລື່ອງຫ້າມນຳເຂົ້າໝູຈາກປະເທດເພື່ອນບ້ານຍ້ອນມີການລະບາດ ຂອງພະຍາດອະຫິວາໝູ ອາຟຣິກາ ແຕ່ກໍຍັງມີການລະເມີດຢູ່ ຄືດັ່ງ  ວັນທີ 23 ເມສາ 2023 ຜ່ານມານີ້ ເຈົ້າໜ້າທີ່ສັດຕະວະແພດ ຫ້ອງການກະສິກຳ ແລະ ປ່າໄມ້ ພ້ອມດ້ວຍ ປກສ ເມືອງໜອງແຮດ ແຂວງຊຽງຂວາງ ໄດ້ກວດຄົ້ນ ແລະ ຢຶດລູກໝູນ້ອຍ ຈຳນວນ 205 ໂຕ ທີ່ກຸ່ມແມ່ຄ້າຈາໍນວນໜຶ່ງ ໄດ້ນາໍເຂົ້າມາຈາກ ສສ ວຽດນາມ ແລ້ວເກັບຕົວຢ່າງໜູສົ່ງໄປກວດວິໄຈ ຢູ່ສູນວິໄຈພະຍາດຢູ່ກົມລ້ຽງສັດແລະການປະມົງ ກະຊວງ ກະສິກຳ ແລະ ປ່າໄມ້ ດ້ວຍເຕັກນິກ Real Time PCR  ຊຶ່ງຜົນຂອງການກວດວິໄຈຂອງສູນຢັ້ງຢືນວ່າ: ພົບເຊື້ອພະຍາດອະຫິວາໝູ ອອາຟຣິກກາ ຈຳນວນ 10 ຕົວຢ່າງ, ໃນທາງຕອບໂຕ້ເພື່ອບໍ່ໃຫ້ພະຍາດແຜ່ອອກໄປສູ່ວົງກວ້າງ ພາກສ່ວນທີ່ກ່ຽວຂ້ອງຂອງເມືອງໜອງແຮດໄດ້ຮີບຮ້ອນດຳເນີນມາດຕະການສະກັດກັ້ນການແພ່ລະບາດຂອງເຊື້ອພະຍາດຢ່າງວ່ອງໄວ ເດັດຂາດແລະເຂັ້ມງວດ ເບື້ອງຕົ້ນໄດ້ນຳເອົາໝູຈຳນວນດັ່ງກ່າວນັ້ນ ໄປທຳລາຍຖິ້ມ. ຕໍ່ເຫດການທີ່ເກີດຂຶ້ນຄັ້ງນີ້ ບໍ່ແມ່ນຄັ້ງທໍາອິດ ແລະ ກໍເຊື່ອວ່າຈະບໍ່ແມ່ນເທື່ອສຸດທ້າຍໃນນໍາເຂົ້າສິນຄ້າປະເພດກະສິກຳຢູ່ປະເທດເຮົາ.

ແຕ່ແນວໃດກໍຕາມເພື່ອຮັກສາຄວາມປອດໄພທາງດ້ານສູຂະພາບຂອງສັງຄົມຜູ້ບໍລິໂພກພາຍໃນປະເທດ, ທັງເປັນການສະກັດກັ້ນການແພ່ລະບາດຂອງເຊື້ອພະຍາດຕ່າງໆ ບໍ່ໃຫ້ເກີດຂຶ້ນໃນປະເທດເຮົາໃນຕໍ່ໜ້າ ທຸກຄົນໃນສັງຄົມໂດຍສະເພາະເຈົ້າໜ້າທີ່ທີ່ກ່ຽວຂ້ອງຈາກທຸກພາກສ່ວນຕ້ອງອອກແຮງຊ່ວຍກັນໃນການຕ້ານການລັກລອບນຳເຂົ້າສິນຄ້າທີ່ບໍ່ຖືກຕ້ອງຕາມລະບຽບກົດໝາຍ ເພີ່ມທະວີມາດຕະການກວດກາຄຸນນະພາບຂອງສິນຄ້າຢ່າງຈິງຈັງ ຜິດກໍວ່າໄປຕາມກົດໝາຍລະບຽບການທີ່ກຳນົດໄວ້, ບໍ່ອະນຸຍາດໃຫ້ນຳເຂົ້າສິນຄ້າທີ່ບໍ່ຖືກຕ້ອງຢ່າງເດັດຂາດ ເພື່ອເປັນການຄຸ້ມຄອງຜູ້ບໍລິໂພກໃຫ້ປອດໄພ ເຮັດໃຫ້ການດຳລົງຊີວິດຂອງປະຊາຊົນດີຂຶ້ນທັງເປັນການຮັກສາຕົ້ນທຶນຂອງຜູ້ປະກອບການບໍ່ໃຫ້ສູນຫາຍໄປໃນທາງທີ່ບໍ່ສົມເຫດສົມຜົນ.