ລາວ-ຈີນ ເພີ່ມທະວີການພົວພັນຮ່ວມມືສອງຝ່າຍຫລາຍຂຶ້ນ
ໃນໂອກາດເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງທີ 14 ຢູ່ທີ່ນະຄອນໜານນິງ, ແຂວງກວາງຊີ, ສປຈີນ ໃນຕອນຄໍ່າຂອງວັນທີ 11 ກັນຍາ ຜ່ານມານີ້, ທີ່ສູນປະຊຸມສາກົນລີສອດລີ້ຢວນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ໄດ້ພົບປະຢ່າງເປັນທາງການກັບທ່ານ ຈ່າງ ກ່າວລີ້ ຮອງນາຍົກລັດຖະມົນຕີແຫ່ງ ສປຈີນ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີແຫ່ງ ສປຈີນ ກໍໄດ້ສະແດງຄວາມຍິນດີຕ້ອນຮັບທ່ານຮອງນາຍົກລັດຖະມົນຕີແຫ່ງ ສປປ ລາວ ທີ່ໄດ້ເດີນທາງມາຢ້ຽມຢາມ ແລະ ເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງນີ້ ສະແດງໃຫ້ເຫັນເຖິງສາຍພົວພັນຮ່ວມມືຂອງສອງປະເທດນັບມື້ນັບກ້າວເຂົ້າສູ່ທັງລວງກວ້າງ ແລະ ລວງເລິກ ແລະ ໃນໂອກາດນີ້, ທັງສອງຝ່າຍຕີລາຄາສູງຕໍ່ສາຍພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ທີ່ມີມາດົນນານແລ້ວໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ ແລະ ມີໝາກຜົນຕົວຈິງນັບມື້ຫຼາຍຂຶ້ນ, ພິເສດແມ່ນການໄປມາຫາສູ່ຂອງການນໍາຂັ້ນສູງຂອງສອງປະເທດນັບມື້ນັບຫຼາຍ, ໂດຍສະເພາະໃນທ້າຍປີ 2017 ນີ້, ທ່ານ ສີຈິນຜິງ ເລຂາທິການໃຫຍ່, ປະທານປະເທດແຫ່ງ ສປຈີນ ກໍຈະໄດ້ເດີນທາງມາເຄື່ອນໄຫວຢ້ຽມຢາມສັນຖະວະໄມຕີ ສປປ ລາວ ຕາມການເຊື້ອເຊີນຂອງທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສປປ ລາວ. ການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ, ສາທາລະນະສຸກ, ການສຶກສາ ແລະ ດ້ານອື່ນໆ ລ້ວນແຕ່ໄດ້ຮັບການຂະຫຍາຍຕົວເປັນຢ່າງດີ. ດ້ານການທ່ອງທ່ຽວກໍເພີ່ມຂຶ້ນທຸກໆປີ, ໄດ້ມີການໄປມາຫາສູ່ກັນຫຼາຍຂຶ້ນກວ່າເກົ່າ. ນອກຈາກນີ້, ທັງສອງຝ່າຍຍັງໄດ້ປຶກສາຫາລືກັນກ່ຽວກັບບັນຫາອື່ນໆ ທີ່ຕ່າງຝ່າຍຕ່າງໃຫ້ຄວາມສົນໃຈ. ໃນຕໍ່ໜ້າ ທັງສອງຝ່າຍຍັງຢືນຢັນຮ່ວມກັນວ່າ: ຈະສືບຕໍ່ພ້ອມກັນປະຕິບັດບັນດາເນື້ອໃນທີ່ການນໍາຂັ້ນສູງຂອງສອງປະເທດໄດ້ຕົກລົງເພື່ອຊຸກຍູ້ພາກສ່ວນກ່ຽວຂ້ອງເອົາໃຈໃສ່ຈັດຕັ້ງປະຕິບັດໃຫ້ເປັນຮູບປະທໍາ ແລະ ສໍາເລັດຕາມແຜນການ, ສືບຕໍ່ແລກປ່ຽນຄໍາຄິດຄໍາເຫັນ, ຂໍ້ມູນຂ່າວສານ ແລະ ປະສານສົມທົບກັນຢ່າງໃກ້ສິດ ລວມທັງການສືບຕໍ່ການຮ່ວມມືທາງດ້ານ ພະລັງງານ ແລະ ກະສິກໍາ ຢູ່ບັນດາແຂວງຂອງລາວທີ່ມີທ່າແຮງບົ່ມຊ້ອນຕື່ມອີກ.
ໂອກາດດຽວກັນ, ທ່ານຮອງນາຍົກລັດຖະມົນຕີແຫ່ງ ສປປ ລາວ ກໍໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ຂໍສະແດງຄວາມຂອບໃຈເປັນຢ່າງສູງ ມາຍັງລັດຖະບານຈີນ ທີ່ໄດ້ໃຫ້ການສະໜັບສະໜູນຢ່າງຕໍ່ເນື່ອງ ໃຫ້ລັດຖະບານລາວໃນການພັດທະນາພື້ນຖານໂຄງລ່າງ, ຊັບພະຍາກອນມະນຸດ ແລະ ວຽກງານດ້ານອື່ນໆ ໃນໄລຍະຜ່ານມາ ແລະ ຖືໂອກາດນີ້, ທ່ານ ສອນໄຊ ສີພັນດອນ ກໍໄດ້ກ່າວສະແດງຄວາມຂອບໃຈຕໍ່ທ່ານ ຈ່າງ ກ່າວລີ້ ທີ່ໄດ້ຕ້ອນຮັບຄະນະຢ່າງອົບອຸ່ນ ພ້ອມທັງຕີລາຄາສູງຕໍ່ການເປັນເຈົ້າພາບຈັດງານວາງສະແດງດັ່ງກ່າວນີ້, ໃນທຸກປີ ແລະ ເຫັນວ່າເປັນໂອກາດອັນດີໃນການຊຸກຍູ້ສົ່ງເສີມພົວພັນຮ່ວມມືລະຫວ່າງອາຊຽນ-ຈີນໂດຍສະເພາະວຽກງານສົ່ງເສີມການຄ້າ, ການລົງທຶນ, ການທ່ອງທ່ຽວ ແລະ ວຽກງານອື່ນໆ.
