UN ເຕືອນ ວິກິດສູ້ຮົບໃນຊູດັງທີ່ຍັງຮຸນແຮງ ອາດສົ່ງຜົນໃຫ້ມີຜູ້ອົບພະຍົບອອກຈາກປະເທດ 8 ແສນກວ່າຄົນ
ສໍານັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ເຕືອນຜົນກະທົບຈາກການສູ້ຮົບລະຫວ່າງກອງທັບຊູດັງ ແລະ ກອງກໍາລັງເຄິ່ງທະຫານ Rapid Support Forces (RSF) ທີ່ຍັງເຄັ່ງຕຶງ ອາດສົ່ງຜົນໃຫ້ມີຜູ້ອົບພະຍົບໜີຄວາມຂັດແຍ່ງອອກຈາກຊູດັງຫລາຍກວ່າ 8 ແສນຄົນ.
ທ່ານ ຣາອຸຟ ມາໂຊ ຜູ້ຊ່ວຍຂ້າຫລວງໃຫຍ່ UNHCR ເປີດເຜີຍຕໍ່ກອງປະຊຸມລັດສະມາຊິກໃນນະຄອນຫລວງເຈນີວາ ປະເທດສະວິດວ່າ: ມີປຶກສາຫາລືເລື່ອງນີ້ນໍາລັດຖະບານ ແລະ ພັນທະມິດໃນປະເທດຕ່າງໆ ໂດຍປະເມີນຕົວເລກຜູ້ອົບພະຍົບທີ່ອາດໜີໄພການສູ້ຮົບໄປ 7 ປະເທດໃກ້ຄຽງຂອງຊູດັງປະມານ 8,15 ແສນຄົນ ເຊິ່ງໃນຈໍານວນນີ້ຄາດວ່າເປັນຊາວຊູດັງປະມານ 5,8 ແສນຄົນ, ສ່ວນທີ່ເຫລືອເປັນກຸ່ມຜູ້ລີ້ໄພທີ່ອົບພະຍົບເຂົ້າໄປຕັ້ງຖິ່ນຖານໃນປະເທດ. ຂະນະທີ່ເບື້ອງຕົ້ນຄາດວ່າມີຊາວຊູດັງ 7,3 ໝື່ນກວ່າຄົນທີ່ອົບພະຍົບອອກຈາກຊູດັງແລ້ວ.
ສ່ວນທ່ານ ຟິລລິບໂປ ກຣັນດີ ຂ້າຫລວງໃຫຍ່ UNHCR ຊີ້ວ່າ: ຕົວເລກທີ່ມີການປະເມີນດັ່ງກ່າວເປັນພຽງການບົ່ງຊີ້ເທົ່ານັ້ນ ໂດຍທ່ານກ່າວສະແດງຄວາມກັງວົນວ່າ: ຖ້າສະຖານະການຮຸນແຮງບໍ່ຢຸດຕິ ອາດເປັນໄປໄດ້ຈະມີປະຊາຊົນຖືກບັງຄັບໃຫ້ໜີອອກຈາກຊູດັງເພີ່ມຂຶ້ນ.
ທັງນີ້, ອົງການສາກົນຊີ້ວ່າ: ສະຖານະການດ້ານມະນຸດສະທໍາທີ່ຮ້າຍແຮງໃນຊູດັງເລີ່ມຕົ້ນຂຶ້ນນັບແຕ່ການສູ້ຮົບເລີ່ມຂຶ້ນໃນວັນທີ 15 ເມສາຜ່ານມາ ໂດຍຄາດວ່າຜົນການສູ້ຮົບຈົນຮອດຕອນນີ້ ເຮັດໃຫ້ມີຜູ້ເສຍຊີວິດແລ້ວຫລາຍຮ້ອຍຄົນ ແລະ ບາດເຈັບຫລາຍພັນຄົນ.
ອ້າງອີງ:
https://www.aljazeera.com/…/un-refugee-agency-warns…
