ກຳມະກອນລາວ ປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດ

(ວັນກຳມະກອນສາກົນຄົບຮອບ 137 ປີ 1 ພຶດສະພາ 1886-1 ພຶດສະພາ 2023)

ວັນກຳມະກອນສາກົນ ເປັນວັນທີຊົນຊັ້ນກຳມະກອນໄດ້ຕໍ່ສູ້ຕ້ານພວກນາຍທຶນເພື່ອປົກປ້ອງສິດ ແລະ ຜົນ ປະໂຫຍດອັນຊອບທຳຂອງຕົນ. ສຳລັບຊົນຊັ້ນກຳມະກອນລາວເຮົາກໍໄດ້ສ້າງຜົນງານປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດຢ່າງຫລວງຫລາຍ.

ພາຍໃຕ້ການນຳພາໂດຍກົງຂອງພັກປະຊາຊົນປະຕິວັດລາວ, ອົງການການຈັດຕັ້ງກຳມະບານແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມການເມືອງແນວຄິດກຳມະກອນ ແລະ ຜູ້ອອກແຮງງານ ສືບຕໍ່ເສີມຂະຫຍາຍທາດແທ້, ລັກສະນະດີເລີດຂອງຊົນຊັ້ນກຳມະກອນສາກົນກໍຄືກຳມະກອນລາວ ແລະ ມູນເຊື້ອປະຕິວັດ ອັນດີງາມຂອງຊາດ, ປະຕິບັດສິດ ແລະ ພັນທະໃນພາລະກິດປະຕິວັດໃນໄລຍະໃໝ່ຢ່າງຖືກຕ້ອງ. ປັດຈຸບັນ ກຳມະກອນລາວຢູ່ບັນດາຫົວໜ່ວຍການຜະລິດ, ໂຮງຈັກໂຮງງານ, ຮາກຖານຕ່າງໆ ໄດ້ກາຍເປັນເຈົ້າຂອງການຜະລິດ, ພາຫະນະການຜະລິດ, ໄດ້ຍົກສູງສິດເປັນເຈົ້າຕົນເອງ, ເປັນເຈົ້າລວມໝູ່ ເປັນເຈົ້າຂອງປະເທດຊາດ, ປະກອບສ່ວນທັງສະຕິປັນຍາ ແລະ ກຳລັງເຫື່ອແຮງ ເຮັດສຳເລັດແຜນພັດທະນາເສດຖະ ກິດ-ສັງຄົມແຕ່ລະໄລຍະ ແລະ ເຕີບໃຫຍ່ເຂັ້ມແຂງຫລາຍດ້ານເປັນຕົ້ນກໍ່ສ້າງຖະໜົນຫົນທາງ, ຂົວ, ອາຄານ, ຂຸດຄົ້ນແຮ່ທາດ, ການບໍລິການ, ຜະລິດພະລັງງານໄຟຟ້າ, ນ້ຳປະປາ, ສ້ອມແປງ, ບໍລິການການປຸງແຕ່ງ, ການຂົນສົ່ງທາງນ້ຳ, ທາງບົກ, ທາງອາກາດ, ຜະລິດໃນໂຮງຈັກໂຮງງານຕ່າງໆ, ການປ້ອງກັນ ຊາດ, ປ້ອງກັນຄວາມສະຫງົບ ແລະ ອື່ນໆ. ທັງໝົດລ້ວນແຕ່ແມ່ນການປະກອບສ່ວນຢ່າງຕັ້ງໜ້າຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວ ເຮັດໃຫ້ພື້ນຖານໂຄງລ່າງ, ເສດຖະກິດ-ສັງຄົມເຂັ້ມແຂງ ແລະ ຂະຫຍາຍຕົວຕໍ່ເນື່ອງ, ປະກອບສ່ວນຢ່າງແຂງ ແຮງການຫັນເປັນອຸດສາຫະກຳ ແລະ ທັນສະໄໝຕາມທິດທີ່ພັກເຮົາກຳນົດໄວ້, ເຂົ້າຮ່ວມຢ່າງຕັ້ງໜ້າແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ.

ສູນກາງສະຫະພັນກຳມະບານລາວໃນຖານະເປັນອົງການຈັດຕັ້ງ ທີ່ເປັນຕົວແທນໃຫ້ແກ່ກຳມະກອນ ແລະ ຜູ້ອອກແຮງງານ ໄດ້ສຳເລັດພາລະບົດບາດ, ສິດໜ້າທີ່ຫລາຍດ້ານ, ສະຫະພັນກຳມະບານແຕ່ລະຂັ້ນ ໄດ້ເຂົ້າຮ່ວມປະກອບຄຳເຫັນຕໍ່ນິຕິກຳຕ່າງໆທີ່ພົວພັນເຖິງສິດ ແລະ ຜົນປະໂຫຍດອັນຊອບທຳຂອງກຳມະກອນ ແລະ ຜູ້ອອກແຮງງານ; ເອົາໃຈໃສ່ໂຄສະນາແນວທາງແຜນນະໂຍບາຍຂອງພັກ, ກົດໝາຍຂອງລັດ, ມູນເຊື້ອວັນສຳຄັນຕ່າງໆຂອງພັກ, ຊາດ, ກຳມະບານລາວ ແລະ ກຳມະກອນສາ ກົນເພື່ອກໍ່ສ້າງຖັນແຖວກຳມະກອນ ແລະ ຜູ້ອອກແຮງງານໃຫ້ມີນ້ຳໃຈຮັກຊາດ, ຮັກບ້ານເກີດເມືອງນອນ, ຮັກອາຊີບ, ມີລະບຽບວິໄນອອກແຮງງານ ແລະ ອື່ນໆ ເຮັດໃຫ້ໜັກແໜ້ນດ້ານການເມືອງ-ແນວຄິດ, ມີນ້ຳ ໃຈຮັກຊາດ, ຮັກລະບອບໃໝ່, ເຊື່ອໝັ້ນຕໍ່ການນຳພາຂອງພັກ, ມີຈັນຍາບັນໃນການອອກແຮງງານ, ບຸກບືນຫ້າວຫັນຍົກລະດັບສີມືແຮງງານ, ປະຕິບັດກົດໝາຍ ແລະ ກົດລະບຽບຕ່າງໆ, ມີຫົວຄິດປະດິດສ້າງ, ສຸຂະພາບແຂງແຮງ;

ຕາມຂໍ້ມູນສະຖິຕິຊີ້ວ່າ ທົ່ວປະເທດມີຫົວໜ່ວຍແຮງງານພາກວິສາຫະກິດ 124.987 ແຫ່ງ, ແຮງງານທີ່ມີວຽກເຮັດງານທຳ (ແຮງງານໃນລະບົບ) ມີ 777.825 ຄົນ; ໄດ້ຊຸກຍູ້ ແລະ ນຳພາສ້າງຄວາມເຂັ້ມແຂງໃຫ້ແກ່ຫົວໜ່ວຍແຮງງານ, ສາມາດປັບປຸງ, ສ້າງຕັ້ງກຳມະບານຮາກຖານເຂົ້າສູ່ຫົວໜ່ວຍແຮງງານເອກະຊົນ ແລະ ການລົງທຶນຂອງຕ່າງປະເທດໄດ້ 491 ຮາກຖານທຽບໃສ່ປີ 2015 ເພີ່ມຂຶ້ນ 1.462 ຮາກຖານບັນລຸ 38,5%, ສະຫະພັນກຳມະບານແຕ່ລະຂັ້ນໄດ້ເຄື່ອນໄຫວປົກປ້ອງສິດ, ຜົນປະໂຫຍດອັນຊອບທຳໃຫ້ ແກ່ສະມາຊິກກຳມະກອນ, ກຳມະກອນ ແລະ ຜູ້ອອກແຮງງານ. ສິ່ງພົ້ນເດັ່ນໄດ້ເຂົ້າຮ່ວມກັບອົງການຈັດຕັ້ງຂອງພັກ-ລັດ, ອົງການ ຈັດຕັ້ງມະຫາຊົນອື່ນໆ ຄົ້ນຄວ້າປະກອບຄຳຄິດຄຳເຫັນຕໍ່ການກຳນົດແນວທາງ ແຜນນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ, ກົດໝາຍ, ດຳລັດ, ລະບຽບການ ແລະ ນະໂຍບາຍຕ່າງໆທີ່ພົວພັນເຖິງສິດ ແລະ ຜົນປະໂຫຍດອັນຊອບທຳ, ການເຈລະຈາຕໍ່ລອງ, ສ້າງ ສັນຍາແຮງງານລວມໝູ່ ລະຫວ່າງຜູ້ອອກແຮງງານ ແລະ ຜູ້ໃຊ້ແຮງງານ, ເຄື່ອນໄຫວໂຄສະນາຄວາມປອດໄພແຮງງານຢູ່ສະຖານ ທີ່ເຮັດວຽກ, ເຂົ້າຮ່ວມປຶກສາຫາລືກອງປະຊຸມຄະນະກຳມະການ 3 ຝ່າຍໂດຍສະເໜີຂຶ້ນຄ່າແຮງງານຂັ້ນຕ່ຳໃຫ້ຜູ້ອອກແຮງງານຄື ປີ 2009 ປັບປຸງຄ່າແຮງງານຂັ້ນຕ່ຳໃນຂົງເຂດວິສາຫະກິດຈາກ 290.000 ກີບເປັນ 348.000 ກີບ; ປີ 2011 ຈາກ 348.000 ກີບ ເປັນ 626.000 ກີບ; ປີ 2015 ຈາກ 626.000 ກີບເປັນ 900.000 ກີບ; ປີ 2018 ຂຶ້ນເປັນ 1.100.000 ກີບ,  ປັບເປັນ 1200.000 ກີບ ໃນເດືອນສິງຫາ 2022 ແລະ ຈະເລີ່ມປັບເປັນ 1.300.000 ໃນວັນທີ 1 ພຶດສະພາ 2023 ນີ້ເອງ. ເພື່ອເຮັດໃຫ້ຊີວິດການເປັນຢູ່ຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງນັບມື້ດີຂຶ້ນເລື້ອຍໆ, ສະຫະກຳມະບານແຕ່ລະຂັ້ນໄດ້ນຳພາສ້າງສັນຍາແຮງງານລວມໝູ່; ສ້າງສັນຍາບຸກຄົນ, ໂຄສະນາປູກຈິດສຳນຶກໃຫ້ກຳມະກອນ ແລະ ແຮງງານເຄື່ອນຍ້າຍ, ກວດສຸຂະພາບແຮງງານໃຫ້ກຳມະກອນ ຢູ່ຫົວໜ່ວຍແຮງງານ; ສ້າງສູນໃຫ້ຄຳປຶກ ສາແຮງງານເຄື່ອນຍ້າຍຢູ່ຫລາຍ ແຂວງ, ຫ້ອງການໂຄສະນາໃຫ້ຄຳປຶກສາດ້ານກົດໝາຍຢູ່ 9 ແຂວງ, ສູນຮັບຕ້ອນແຮງງານລາວເຄື່ອນຍ້າຍຢູ່ ຫລາຍຈຸດ.

ຈາກຜົນສຳເລັດອັນໃຫຍ່ຫລວງດັ່ງກ່າວ, ພວກເຮົາພາກພູມໃຈ ທີ່ເຫັນຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ໄດ້ເປັນເຈົ້າການຈັດຕັ້ງປະຕິບັດມະຕິກອງປະຊຸມໃຫຍ່, ແຜນພັດທະນາເສດຖະກິດ-ສັງຄົມ 5 ປີແຫ່ງຊາດ, ມະຕິກອງປະຊຸມໃຫຍ່ຜູ້ແທນສະຫະພັນກຳມະບານລາວ ທົ່ວປະເທດ ແລະ ແຜນພັດທະນາກຳມະບານໃຫ້ປາກົດຜົນເປັນຈິງ.