ນະຄອນຫລວງວຽງຈັນ-ນະຄອນດານັງ ສສ ຫວຽດນາມ ເສີມຂະຫຍາຍສາຍພົວພັນຮ່ວມມືແບບພິເສດ

ວັນທີ 28 ເມສາ 2023 ທີ່ຫ້ອງວ່າການນະຄອນຫລວງວຽງຈັນ (ນວ), ທ່ານ ອານຸພາບ ຕຸນາລົມ ປະທານສະພາປະຊາຊົນ ນວ ພ້ອມຄະນະ ໄດ້ຕ້ອນຮັບການເຂົ້າຢ້ຽມຄໍານັບຄະນະຜູ້ແທນສານປະຊາຊົນຂັ້ນສູງ ປະຈໍານະຄອນ ດານັງ ສສ ຫວຽດນາມ, ນໍາໂດຍ ທ່ານ ຫງວຽນ ວັນ ເບື່ອງ ປະທານສະພາ ປະຊາຊົນຂັ້ນສູງ ປະຈໍານະຄອນດານັງ, ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ນວ ວັນທີ 23-29 ເມສາ 2023 ນີ້.

ທ່ານ ປະທານສະພາປະຊາຊົນ ນວ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ນວ ຂອງຄະນະຜູ້ແທນສານປະຊາຊົນຂັ້ນສູງ ປະຈໍານະຄອນດານັງ ສສ ຫວຽດນາມ ຄັ້ງນີ້, ເຊິ່ງເປັນການຮັດແໜ້ນຄວາມສາມັກຄີ ແລະ ເສີມຂະຫຍາຍສາຍພົວພັນພິເສດລະຫວ່າງປະຊາຊົນ ນວ ແລະ ນະຄອນດານັງ ໃຫ້ນັບມື້ແໜ້ນແຟ້ນຍິ່ງໆຂຶ້ນ ພ້ອມນັ້ນຍັງໄດ້ຕີລາຄາຄືນການຊ່ວຍເຫລືອຂອງສານປະຊາຊົນຂັ້ນສູງ ປະຈໍານະຄອນດານັງໃຫ້ແກ່ສານປະຊາຊົນພາກກາງໃນໄລຍະຜ່ານມາ. ພ້ອມທັງສະເໜີສານປະຊາຊົນຂັ້ນສູງປະຈໍານະຄອນດານັງແລກປ່ຽນບົດຮຽນ ແລະ ໃຫ້ການຊ່ວຍເຫລືອກ່ຽວກັບການຈັດຕັ້ງປະຕິບັດໜ້າ ທີ່ວຽກງານຂອງສານປະຊາຊົນພາກກາງເປັນຕົ້ນການກໍ່ສ້າງບຸກຄະລາກອນສານປະຊາຊົນພາກກາງການສ້າງກົດໝາຍ ແລະ ນິຕິກໍາ ອື່ນໆກ່ຽວຂ້ອງ, ເພື່ອເຮັດໃຫ້ການປະຕິບັດໜ້າທີ່ຂອງສານປະຊາຊົນພາກ ກາງມີຄວາມສະດວກ, ວ່ອງໄວ ແລະ ມີປະສິດທິຜົນ.

ໂອກາດນີ້ ທ່ານ ຫງວຽນ ວັນ ເບື່ອງ ສະແດງຄວາມຂອບໃຈຕໍ່ ທ່ານ ອານຸພາບ ຕຸນາລົມ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງ ແລະ ຜົນສໍາເລັດຂອງການມາຢ້ຽມຢາມ ແລະ ເຮັດວຽກຢູ່ນະຄອນຫລວງວຽງຈັນຄັ້ງນີ້. ພ້ອມນັ້ນ, ຍັງໃຫ້ຄໍາໝັ້ນສັນຍາວ່າຈະສືບຕໍ່ເພີ່ມທະວີສາຍພົວພັນພິເສດຫວຽດນາມ-ລາວ ລາວ-ຫວຽດນາມໃຫ້ນັບມື້ແຕກດອກອອກ ຜົນຍິ່ງໆຂຶ້ນ ແລະ ຈະສືບຕໍ່ໃຫ້ການຊ່ວຍເຫລືອແກ່ສານປະຊາຊົນພາກກາງ ໂດຍສະເພາະວຽກງານການກໍ່ສ້າງບຸກຄະລາກອນສານປະຊາຊົນພາກກາງ ເຊ່ັ່ນ: ວຽກງານແກ້ໄຂ ແລະ ຈັດສິນຄະດີການປົກຄອງ ການກໍ່ສ້າງທິດສະດີ ການ ເມືອງ ແລະ ອື່ນໆ.