ອິດສະຣາເອວ ເປີດໂຄງການໂຄງລ່າງພື້ນຖານການຂົນສົ່ງສາທາລະນະທີ່ໃຊ້ໄຟຟ້າ

ຂ່າວຕ່າງປະເທດລາຍງານ,ໂດຍອ້າງອີງແຈ້ງການຂອງລັດຖະມົນຕີກະຊວງຄວາມປອດໄພທາງຫຼວງ ແລະ ການຂົນສົ່ງອິດສະຣາເອວ ລາຍງານວ່າ: ອິດສະຣາ ໄດ້ເປີດໂຄງການວ່າດ້ວຍໂຄງລ່າງພື້ນຖານດ້ານການຂົນສົ່ງສາທາລະນະທີ່ໃຊ້ໄຟຟ້າແຫ່ງຊາດໃນທົ່ວປະເທດ ທີ່ມີມູນຄ່າ 273,66 ລ້ານໂດລາ ຊຶ່ງໄດ້ຮັບການເຫັນດີອະນຸມັດຈາກຄະນະກຳມະການໂຄງລ່າງພື້ນຖານແຫ່ງຊາດຂອງອິດສະຣາເອວ, ໃນນັ້ນລວມມີອາຄານລົດເມ, ບ່ອນຈອດລົດ ແລະ ບ່ອນອຳນວຍຄວາມສະດວກໃນການສາກໄຟຟ້າສຳລັບລົດເມຫຼາຍຮ້ອຍຄັນ.

ທ່ານລັດຖະມົນຕີກ່າວວ່າ: ການນຳໃຊ້ການຂົນສົ່ງສາທາລະນະທີ່ໃຊ້ໄຟຟ້າມີຄ່າໃຊ້ຈ່າຍໃນການສ້ອມແປງຕ່ຳ, ທັງສາມາດຫຼຸດສຽງເນືອງນັນ ແລະ ມົນລະພິດທາງອາກາດ, ການຕິດຕັ້ງສິ່ງອຳນວຍຄວາມສະດວກໃນການສາກໄຟຟ້າແມ່ນມີເປົ້າໝາຍເພື່ອເຮັດໃຫ້ການຂົນສົ່ງສາທາລະນະມີຄວາມສະອາດ ແລະ ເປັນມິດກັບສິ່ງແວດລ້ອມ.

ໂຄງການນີ້ຈະມີຄວາມສາມາດຂະຫຍາຍຕົວໄດ້ຢ່າງວ່ອງໄວຈາກລົດເມໄຟຟ້າສາທາລະນະທີ່ໃຫ້ບໍລິການໃນປະເທດອິດສະຣາເອວ ໃນປັດຈຸບັນ 600 ຄັນ ຈະເພີ່ມເປັນ 3.000 ຫາກອິດສະຣາເອວ ຫັນໄປໃຊ້ລົດເມໄຟຟ້າຢ່າງເຕັມສ່ວນ.