ເຜົ່າລາວເອີຍ ! ຈົ່ງຮັກກັນເຊື່ອມສໍາພັນໂຮມເຕົ້າດັ່ງລູກແຄນແດນເຂົ້າໜຽວ

ໂດຍ: ທິດກໍ່າ

ຈາກແຫລ່ງຂ່າວຄາວທີ່ເຮົາໄດ້ຮັບຮູ້ ແລະ ໄດ້ເຫັນໃນຍຸກປັດຈຸບັນຄືມີຄົນເຊື້ອຊາດລາວທີ່ດໍາລົງຊີວິດ ແລະ ທໍາມາຫາກິນຢູ່ຕ່າງປະເທດເລີ່ມທະຍອຍກັນອວ່າຍໜ້າມາຫາບ້ານເກີດເມືອງນອນອັນເປັນມາຕຸພູມທີ່ແສນຮັກ ແລະ ຫວງແຫນຂອງຕົນນັບມື້ນັບຫລາຍຂຶ້ນ. ໃນການອວ່າຍໜ້າມາຫາປະເທດຊາດບ້ານເກີດເມືອງນອນມັນກໍມີຢູ່ຫລາຍຮູບແບບທີ່ແຕກຕ່າງກັນໄປເຊັ່ນ: ມາທໍາມາຫາກິນເຮັດທຸລະກິດການງານ, ມາທ່ອງທ່ຽວ, ມາຢ້ຽມຢາມຍາດຕິພີ່ນ້ອງ ແລະ ເຮັດບຸນສິນກິນທານ, ມີບາງຈໍານວນກໍຕັດສິນໃຈມາຢູ່ລາວໃນບັ້ນທ້າຍຂອງຊີວິດ. ນອກຈາກນັ້ນ ກໍມີຈໍານວນບໍ່ໜ້ອຍທີ່ສະໝັກມາປະກອບສ່ວນຊ່ວຍເຫລືອສ້າງສາພັດທະນາປະເທດຊາດເຊັ່ນ: ສ້າງໂຮງໝໍ, ໂຮງຮຽນ, ຊ່ວຍເຫລືອບັນເທົາທຸກໃຫ້ປະຊາຊົນທີ່ຍັງມີຄວາມທຸກຍາກດ້ອຍໂອກາດໃນເຂດຫ່າງໄກສອກຫລີກ ແລະ ພິເສດກໍແມ່ນມີລູກຫລານທີ່ມີເຊື້ອສາຍລາວຢູ່ຕ່າງປະເທດມາສະໝັກເຂົ້າເປັນນັກກິລາທີມຊາດໃນປະເພດຕ່າງໆເຖິງ 18 ຄົນແລ້ວ.

ໃນຄວາມເປັນຈິງແລ້ວ, ນັບແຕ່ພັກ ແລະ ລັດຖະບານເຮົາມີນະໂຍບາຍເປີດກວ້າງໃຫ້ຄົນເຊື້ອຊາດລາວທີ່ດໍາລົງຊີວິດ ແລະ ທໍາມາຫາກິນຢູ່ຕ່າງປະເທດ ເຊິ່່ງສ່ວນຫລາຍເຂົາເຈົ້າເຫລົ່ານັ້ນກໍໄດ້ກັບກາຍເປັນສັນຊາດອື່ນໄປແລ້ວ, ແຕ່ໃນຈິດໃຈຍັງບໍ່ລືມບ້ານເກີດເມືອງນອນ ແລະ ອີກປະການໜຶ່ງ ພັກ ແລະ ລັດຖະບານເຮົາກໍຍັງຖືວ່າຄົນລາວທີ່ຢູ່ຕ່າງແດນເຖິງຈະເປັນສັນຊາດອື່ນໄປແລ້ວກໍຕາມ, ແຕ່ກໍຍັງຖືວ່າເປັນວົງສາຄະນາຍາດແຫ່ງຊາດທີ່ຕັດຂາດກັນບໍ່ໄດ້.

ສ່ວນຄົນລາວທີ່ຢູ່ໃນ ສປປ ລາວເຮົາເອງ ມາຮອດຍຸກນີ້ກໍໄດ້ເປີດກວ້າງອອກສູ່ພາຍນອກນັບມື້ນັບຫລາຍ ໂດຍສະເພາະອອກໄປຄ້າຂາຍ, ໄປທໍາທຸລະກິດການງານ, ໄປທ່ອງທ່ຽວ, ໄປສຶກສາຮໍ່າຮຽນ, ໄປແລກປ່ຽນດ້ານສິລະປະວັດທະນະທໍາ ແລະ ດ້ານວິຊາການຕ່າງໆ ເພື່ອເຊື່ອມໂຍງ ແລະ ເຊື່ອມສໍາພັນທະໄມຕີກັບພາຍນອກ. ດັ່ງເຫດການເດັ່ນໆກໍຄືໃນປີ 2023 ນີ້ເອງ ກໍມີນາງສາວລາວຊື່ ປາເຢັງຊາລໍ ໄດ້ໄປຮ່ວມແຂ່ງຂັນນາງງາມຈັກກະວານ ສາມາດເຂົ້າຮອບ 16 ຄົນ ແລະ ຍັງມີນັກຮ້ອງ-ນັກສິລະປິນລາວໄປຮ່ວມສະແດງໃນລາຍການ Sabaidee Fest 2023 ຢູ່ສະຫະລັດອາເມລິກາ ອັນໄດ້ສ້າງກຽດຊື່ສຽງມາໃຫ້ຕົນເອງ ແລະ ປະເທດຊາດ. ອີກຍັງເປັນການສ້າງຄວາມສຸກສັນຫັນສາ ແລະ ເຊື່ອມສໍາພັນທະໄມຕີກັບຄົນເຊື້ອຊາດລາວທີ່ດໍາລົງຊີວິດຢູ່ສະຫະລັດອາເມລິກາໃຫ້ຫຍັບເຂົ້າໃກ້ກັນ ແລະ ເຂົ້າໃຈກັນຢ່າງໜັກແໜ້ນກວ້າງຂວາງ. ນອກຈາກນັ້ນ ກໍຍັງມີລາຍການອື່ນໆຢູ່ປະເທດອື່ນຢ່າງຫລວງຫລາຍພາຍມາກ.

ໃນຍຸກປັດຈຸບັນ, ສປປ ລາວຂອງພວກເຮົາ ພວມໄດ້ຮັບການສ້າງສາພັດທະນາຢ່າງກ້າວໄກ, ພິເສດມີສາຍທາງລົດໄຟຄວາມໄວສູງ ລາວ-ຈີນ, ມີເສັ້ນທາງຄົມມະນາຄົມໄປມາສະດວກສະບາຍ, ໂຄງການກິດຈະການຕ່າງໆພວມອອກໜໍ່ຈໍ່ແນວຂຶ້ນຕິກໆ, ຈາກປະເທດທີ່ບໍ່ມີທາງອອກສູ່ທະເລກາຍເປັນປະເທດເຊື່ອມໂຍງ ແລະ ເຊື່ອມຈອດ. ຖ້າສົມທຽບໃສ່ຍຸກປະຫວັດສາດ ກ່ອນໜ້າບໍ່ທັນເປັນ ສປປ ລາວ ແມ່ນແຕກຕ່າງກັນປານຟ້າກັບດິນ ຈົນພີ່ນ້ອງຊາວລາວທີ່ຈາກບ້ານເມືອງໄປຢູ່ຕ່າງປະເທດຫລາຍປີຫລາຍຄົນກັບມາຢ້ຽມຢາມບ້ານເກີດຈົນເອີ່ຍປາກຊື່ນຊົມດ້ວຍຄວາມຊາບຊຶ້ງດີໃຈ.

ເຖິງຄາວແລ້ວ, ຊາດລາວ ຄົນລາວ ເຊື້ອຊາດລາວ ບໍ່ວ່າຢູ່ແຫ່ງຫົນຕໍາບົນໃດກໍຕາມ ຕ້ອງຫັນໜ້າມາສາມັກຄີຮັກແພງປຸ້ມລຸ້ມຫຸ້ມຫໍ່ເຊື່ອມໂຍງເຊື້ອຊາດເຜົ່າພັນ, ຮັກແພງກັນເໝືອນດັ່ງລູກແຄນ ແລະ ປັ້ນເຂົ້າໜຽວຈໍ້າປາແດກ. ບ້າງເຈົ້າບ້າງປາງລາດຊະວົງຂົງເມືອງລາວຄົນລາວຕ້ອງເປັນເຈົ້າໃຜວ່າເມືອງລາວເສົ້າເຊົາເດີ້ຢ່າຟ້າວວ່າມັນຊິໂປ້ບາດຫລ້າໝາກແຕງຊ້າງໜ່ວຍປາຍ ວ່ານາ.