ຢ່າງເປັນທາງການ ມາໂກ ຣອຍສ໌ ຂະຫຍາຍສັນຍາ ດັອດມຸນ ເຖິງ 2024
April 28, 2023 - 12:40 PM
ຖືເປັນຂ່າວທີ່ດີທີ່ສຸດສຳລັບ “ເສືອເຫລືອງ” ເພາະລ່າສຸດ ມາໂກ ຣອຍສ໌ ຂະຫຍາຍສັນຍາກັບ ໂບຣຸສເຊຍ ດັອດມຸນ ອອກໄປຈົນຮອດລະດູຮ້ອນປີໜ້າຮຽບຮ້ອຍ. ພ້ອມປະກາດຊັດເຈນລະດູການນີ້ “ເສືອເຫລືອງ” ຫວັງຄວ້າແຊ້ມ ບຸນເດສລີກາ.
ໂບຣຸສເຊຍ ດັອດມຸນ ສະໂມສອນຈ່າຝູງໃນ ບຸນເດສລີກາ ເຢຍລະມັນ ຢືນຢັນຢ່າງເປັນທາງການ ໃນວັນພະຫັດທີ 27 ເມສານີ້, ວ່າ ມາໂກ ຣອຍສ໌ ກອງກາງຕົວບຸກຫົວໜ້າທີມ. ໄດ້ຈັບປາກກາຂະຫຍາຍສັນຍາໃນຖິ່ນ Signal Iduna Park ອອກໄປຈົນເຖິງເດືອນມິຖຸນາ ປີ 2024 ຮຽບຮ້ອຍ.
ຖືວ່າເປັນການຂະຫຍາຍສັນຍາກັບ “ເສືອເຫລືອງ” ຈາກເດີມທີ່ກຳລັງຈະໝົດໃນລະດູຮ້ອນນີ້, ສຳລັບດາວເຕະອາຍຸ 33 ປີ ແລະ ຈະເຮັດໃຫ້ເຂົາລົງຫລິ້ນໃຫ້ກັບ ດັອດມຸນ ເປັນລະດູການທີ 12 ອີກດ້ວຍ.
