ກຸ່ມຕາລີບັນ ກ່າວວ່າ: ເຫດລະເບີດໃຫຍ່ສະໜາມບິນນະຄອນຫລວງກາບູນ ປີ 2021 ຂ້າຊີວິດຜູ້ນໍາລະດັບສູງຂອງກຸ່ມ IS
ກຸ່ມຕາລີບັນເປີດເຜີຍວ່າ: ເຫດລະເບີດຄັ້ງໃຫຍ່ທີ່ເກີດຂຶ້ນຢູ່ສະໜາມບິນຮາມິດ ກາໄຊ ໃນນະຄອນຫລວງກາບູນ ຂອງອັບການິດສະຖານ ປີ 2021 ຂະນະທີ່ກອງທັບອາເມລິກາກໍາລັງເຄື່ອນຍ້າຍຖອຍທັບກັບປະເທດນັ້ນ ຂ້າຊີວິດປະຊາຊົນ 180 ກວ່າຄົນ ໜຶ່ງໃນນັ້ນຄືຜູ້ນໍາລະດັບສູງຂອງກຸ່ມລັດອິສລາມ ຫລື ກຸ່ມ IS.
ທາງການອາເມລິກາໄດ້ຮັບລາຍງານເຖິງກໍລະນີດັ່ງກ່າວໃນອາທິດຜ່ານມາ, ເບື້ອງຕົ້ນຍັງບໍ່ມີການເປີດເຜີຍລາຍລະອຽດທີ່ແນ່ນອນວ່າຜູ້ນໍາລະດັບອາວຸໂສຄົນດັ່ງກ່າວເປັນໃຜ ໂດຍທາງການອາເມລິກາຈະຍັງເດີນໜ້າຮວບຮວມຂໍ້ມູນ ແລະ ພິສູດຂໍ້ມູນວ່າສິ່ງທີ່ກຸ່ມຕາລີບັນເປີດເຜີຍນັ້ນເປັນຄວາມຈິງ ຫລື ບໍ່.
ນອກຈາກນີ້, ທາງການອາເມລິກາເປີດເຜີຍວ່າ: ໜ່ວຍຂ່າວອາເມລິກາຮູ້ຂ່າວການເສຍຊີວິດຂອງຜູ້ນໍາກຸ່ມ IS ນັບແຕ່ຕົ້ນເດືອນເມສາຜ່ານມາ, ແຕ່ຍັງບໍ່ແນ່ນອນວ່າລາວຕົກເປັນເປົ້າໝາຍຂອງກຸ່ມຕາລີບັນ ຫລື ຖືກສັງຫານລະຫວ່າງການຕໍ່ສູ້ ຫລັງຈາກກຸ່ມຕາລີບັນ ແລະ ກຸ່ມ IS ມີບັນຫາຂັດແຍ່ງລະຫວ່າງກັນໃນຫລາຍປີຜ່ານມາ.
ການຖອນທະຫານອາເມລິກາອອກຈາກອັບການິດສະຖານໃນປີ 2021 ຖືເປັນການສິ້ນສຸດສົງຄາມທີ່ຍາວນານທີ່ສຸດຂອງອາເມລິກາ ນໍາໄປສູ່ການລົ້ມສະຫລາຍຂອງລັດຖະບານອັບການິດສະຖານ ແລະ ກຸ່ມກອງກໍາລັງທີ່ລັດຖະບານອາເມລິກາສະໜັບສະໜູນມາກວ່າສອງທົດສະວັດ. ທັງຍັງເປີດທາງໃຫ້ກຸ່ມຕາລີບັນກັບຂຶ້ນມາມີອໍານາດທາງການເມືອງຂອງອັບການິດສະຖານອີກ ເຊິ່ງຫລາຍຝ່າຍສະແດງຄວາມກັງວົນກ່ຽວກັບການຫລຸດສິດຂອງເດັກ ແລະ ຜູ້ຍິງໃນສັງຄົມອັບການິດສະຖານ ພາຍໃຕ້ການບໍລິຫານຂອງກຸ່ມຕາລີບັນ.
ອ້າງອີງ:
https://www.aljazeera.com/…/isil-leader-behind-kabul…
https://edition.cnn.com/…/isis-k-leader…/index.html
https://www.bbc.com/news/world-us-canada-65382277
