ຮອງນາຍົກ ເນັ້ນການອະໄພຍະໂທດ ຕ້ອງຮັບປະກັນຄວາມຖືກຕ້ອງ, ໂປ່ງໃສ, ຍຸຕິທໍາ, ຄັດເລືອກເອົານັກໂທດຜູ້ທີ່ປະພຶດດີ ແລະ ຮູ້ສຶກກິນແໜງຕໍ່ການກະທໍາຜິດຂອງຕົນແທ້

ໃນກອງປະຊຸມສະຫລຸບບວຽກງານອະໄພຍະໂທດ ປະຈຳປີ 2022 ແລະ ທິດທາງແຜນການ ປະຈຳປີ 2023, ວັນທີ 26 ເມສາ 2023 ທີ່ອົງການໄອຍະການປະຊາຊົນສູງສຸດ. ທ່ານ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ທັງເປັນປະທານຄະນະກໍາມະການອະໄພຍະໂທດລະດັບຊາດ ໄດ້ມີຄຳເຫັນໂອ້ລົມ ແລະ ເນັ້ນໃຫ້ຄະນະກຳມະການອະໄພຍະໂທດແຕ່ລະຂັ້ນ ຕ້ອງໄດ້ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ວຽກງານຂອງຕົນ ໃຫ້ທັນຕາມກໍານົດເວລາ, ເຫັນໄດ້ເຖິງຄວາມສໍາຄັນຂອງການປະຕິບັດນະໂຍບາຍອະໄພຍະໂທດໃຫ້ແກ່ນັກໂທດ; ເອົາໃຈໃສ່ຄົ້ນຄວ້າກໍາແໜ້ນເນື້ອໃນຂອງກົດໝາຍ, ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ນິຕິກໍາຕ່າງໆທີ່ກ່ຽວຂ້ອງ ກັບວຽກງານອະໄພຍະໂທດໃຫ້ເລິກເຊິ່ງ, ຈັດຕັ້ງປະຕິບັດໃຫ້ຖືກຕ້ອງ ແລະ ຄົບຖ້ວນ; ຍົກສູງຄວາມຮັບຜິດຊອບໃນການຄົ້ນຄວ້າພິຈາລະນາ ນັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດ ຕ້ອງຮັບປະກັນຄວາມຖືກຕ້ອງ, ໂປ່ງໃສ, ຍຸຕິທໍາ, ຄັດເລືອກເອົານັກໂທດຜູ້ທີ່ປະພຶດດີ ແລະ ຮູ້ສຶກກິນແໜງຕໍ່ການກະທໍາຜິດຂອງຕົນແທ້ ເພື່ອສະເໜີຂໍອະໄພຍະໂທດຈາກປະທານປະເທດ.

ພ້ອມກັນນັ້ນ ຄະນະພັກ, ອໍານາດການປົກຄອງຂັ້ນຕ່າງໆ ຕ້ອງເພີ່ມທະວີການນໍາພາ-ຊີ້ນໍາ ຕໍ່ວຽກງານອະໄພຍະໂທດ, ໃຫ້ໄດ້ຮັບຜົນສໍາເລັດ ໂດຍຮັບປະກັນຄວາມຖືກຕ້ອງ, ຊັດເຈນ ແລະ ທັນເວລາ; ຄະນະກຳມະການອະໄພຍະໂທດ ລະດັບຊາດ ເອົາໃຈໃສ່ລົງຕິດຕາມຊຸກຍູ້, ສະຫລຸບຖອດຖອນບົດຮຽນ, ສ່ອງແສງລາຍງານແຕ່ລະໄລຍະຢ່າງເປັນປົກກະຕິ ແລະ ແກ້ໄຂກໍລະນີທີ່ເກີດຂຶ້ນຢ່າງທັນການ ເພື່ອຮັບປະກັນໃຫ້ວຽກງານອະໄພຍະໂທດດຳເນີນໄປຢ່າງຖືກຕ້ອງ, ຄົບຖ້ວນ, ໂປ່ງໃສ, ຍຸຕິທຳ ແລະ ທັນເວລາ ເພື່ອປະກອບສ່ວນຈັດຕັ້ງປະຕິບັດນະໂຍບາຍຂອງລັດຖະບານໃຫ້ຖຶກຕ້ອງ ແລະ ເປັນທຳ.