ເຈົ້າຂອງທີມເຊລຊີ ເຈລະຈາສັນຍາໃຫມ່ກັບ ເມົ້າ ຫວັງໃຫ້ຢູ່ຕໍ່ກັບທີມຕໍ່ໄປ

ທັອດ ໂບລີ ເຈົ້າຂອງທີມສະໂມສອນ ເຊລຊີ ເຂົ້າມາເຈລະຈາກັບ ເມສັນ ເມົ້າ ກອງກາງທີມຊາດອັງກິດດ້ວຍຕົນເອງ ເພື່ອໂນ້ມນ້າວໃຫ້ນັກເຕະຍອມຕົກລົງເຊັນສັນຍາສະບັບໃຫມ່ຢູ່ໃນຖິ່ນ ສະແຕມຟອດ ບຣິດ ຕໍ່ໄປ.

ອະນາຄົດຂອງ ເມົ້າ ຢູ່ໃນການຈັບຕາເບິ່ງຂອງວົງກວ້າງ ຈາກການທີ່ສັນຍາຂອງລາວຈະຫມົດລົງໃນອີກ 1 ປີ ແລະການທີ່ຜ່ານມາຍັງຄົງບໍ່ອາດຕົກລົງສັນຍາໃຫມ່ ກໍເຮັດໃຫ້ມີການເບິ່ງວ່າ ເຊລຊີ ຈະຕ້ອງຮີບຂາຍນັກເຕະອອກໄປໃນໄລຍະລະດູການທີ່ຈະເຖິງ ເພື່ອຫລີກເວັ້ນການເສຍນັກເຕະໄປລ້າໆໃນລະດູການໜ້າ.

ດ້ວຍສະຖານະການນີ້ເຮັດໃຫ້ກອງກາງອາຍຸ 24 ປີ ຖືກເຊື່ອມໂຍງກັບຫລາຍທີມຊັ້ນນຳເຊ່ັນ : ລີເວີພູລ, ແມນເຊສເຕີ ຊິຕີ ແລະ ບາເຢິນ ມິວນິກ.

ຫລ້າສຸດສື່ລາຍງານວ່າ : ໂບລີ ລົງມາຈັດການປະເດັນນີ້ດ້ວຍຕົນເອງແລ້ວ ໂດຍເປີດຫ້ອງເຈລະຈາກັບ ເມົ້າ ແລະ ມີບົດສົນທະນາທີ່ເປັນໄປໃນທາງບວກ ສຳລັບການທີ່ນັກເຕະຈະຕໍ່ສັນຍາ ບໍ່ໃຫ້ຍ້າຍອອກໄປໃນລະດູການນີ້.

ລາຍງານເພີ່ມອີກວ່າ ການເຈລະຈາຂອງ ໂບລີ ກັບນັກເຕະ ສະແດງໃຫ້ເຫັນຈະແຈ້ງວ່າລາວ ຕ້ອງການເກັບນັກເຕະເອົາໄວ້ໃນຖິ່ນຕໍ່ໄປ ຫລັງຈາກ ເມົ້າ ເຂົ້າມາຮ່ວມສະໂມສອນເຊລຊີ ຕັ້ງແຕ່ 6 ປີ ແລະ ລົງຫລິ້ນໃຫ້ທີມຊຸດໃຫຍ່ໃກ້ຈະຄົບ 200 ນັດແລ້ວໃນຕອນນີ້.