UN ຄາດວ່າ ອິນເດຍກຽມແຊງຈີນ ກາຍເປັນປະເທດທີ່ມີປະຊາກອນຫລາຍທີ່ສຸດໃນໂລກພາຍໃນອາທິດນີ້

ໜ່ວຍງານພາຍໃຕ້ອົງການສະຫະປະຊາຊາດ (UN) ຄືສໍານັກງານກິດຈະການເສດຖະກິດ ແລະ ສັງຄົມແຫ່ງສະຫະປະຊາຊາດ (DESA) ຄາດຄະເນວ່າ: ອິນເດຍກຽມຈະແຊງຈີນ ກາຍເປັນປະເທດທີ່ມີປະຊາກອນຫລາຍທີ່ສຸດໃນໂລກໃນອາທິດນີ້ ໂດຍຈະມີປະຊາກອນອິນເດຍສູງກວ່າ 1.425.775.850 ຄົນ.

DESA ລະບຸວ່າ: ອີກບໍ່ດົນຈີນຈະສະຫລະສະຖານະທີ່ຄອບຄອງມາດົນໃນຖານະປະເທດທີ່ມີປະຊາກອນຫລາຍທີ່ສຸດໃນໂລກ”. ແຕ່ຢ່າງໃດກໍຕາມ, ຄວາມບໍ່ແນ່ນອນຂອງຂໍ້ມູນດ້ານປະຊາກອນຂອງອິນເດຍ ແລະ ຈີນ ໂດຍສະເພາະຂໍ້ມູນການສໍາຫລວດສໍາມະໂນຄົວຄັ້ງສຸດທ້າຍຂອງອິນເດຍທີ່ເຄີຍສໍາຫລວດໄວ້ໃນປີ 2011 ເຊິ່ງຄັ້ງຕໍ່ໄປຄືປີ 2021 ແຕ່ພັດຕ້ອງຊັກຊ້າອອກໄປ ເນື່ອງຈາກວິກິດການແພ່ລະບາດຂອງໂຄວິດອາດເຮັດໃຫ້ຂໍ້ມູນມີການຄາດເຄື່ອນໄດ້.

ໂດຍກ່ອນໜ້ານີ້ອີກໜຶ່ງໜ່ວຍງານພາຍໃຕ້ UN ຄືກອງທຶນປະຊາກອນແຫ່ງສະຫະປະຊາຊາດ (UNFPA) ໄດ້ເຜີຍແພ່ລາຍງານສະບັບຫລ້າສຸດໃນອາທິດຜ່ານມາ. ພ້ອມຄາດຄະເນວ່າ: ອິນເດຍກຽມຈະເປັນປະເທດທີ່ມີຈໍານວນປະຊາກອນຫລາຍທີ່ສຸດໃນໂລກແຊງຈີນເກືອບ 3 ລ້ານຄົນ ໃນກາງປີ 2023.

ປັດຈຸບັນ ຈີນກໍາລັງປະສົບບັນຫາອັດຕາການເກີດຕໍ່າ ຈໍານວນປະຊາກອນຈີນຫລຸດລົງຫລາຍໃນປີ 2022 ຖືເປັນຄັ້ງທໍາອິດນັບແຕ່ປີ 1961.

ອ້າງອີງ:

https://www.bbc.com/news/world-asia-india-65380148

https://www.voanews.com/…/india-to-surpass…/7064806.html

https://www.un.org/…/un-desa-policy-brief-no-153-india…