ສປປ ລາວ ຕັ້ງເປົ້າໝາຍການລຶບລ້າງພະຍາດໄຂ້ມາລາເຣຍ ຊະນິດທີ່ຮ້າຍແຮງທີ່ສຸດ ພາຍໃນທ້າຍປີ 2023 ນີ້
ສູນຂ່າວສານການແພດ ສຸຂະສຶກສາ ກະຊວງສາທາລະນະສຸກ ໃຫ້ຮູ້ວ່າ: 25 ປີກ່ອນ, ພະຍາດໄຂ້ມາລາເຣຍ ໄດ້ສົ່ງຜົນກະທົບແກ່ສັງຄົມຢ່າງໜັກໜ່ວງ ໂດຍສະເພາະ ການຈ້າງງານ ແລະ ການສຶກສາ. ພະຍາດດັ່ງກ່າວ ໄດ້ສົ່ງຜົນໃຫ້ມີຄົນຫລາຍພັນຄົນເສຍຊີວິດ ແລະ ເຮັດໃຫ້ປະຊາຊົນອີກຫລາຍໝື່ນຄົນຕ້ອງປະເຊີນກັບຜົນກະທົບໄລຍະຍາວ. ແຕ່ໃນປັດຈຸບັນ, ກໍລະນີຜູ້ຕິດເຊື້ອພະຍາດໄຂ້ມາລາເຣຍ ໄດ້ຫລຸດລົງຢ່າງຫລວງຫລາຍ ຈາກປະມານ 462.000 ກໍລະນີໃນປີ 1997 ເຫລືອພຽງ 2.305 ເຊິ່ງເປັນຜົນມາຈາກຄວາມເອົາໃຈໃສ່ຂອງອ້າຍນ້ອງກະຊວງສາທາລະນະສຸກ, ພະນັກງານແພດໝໍ, ອາສາສະໝັກມາລາເຣຍຂັ້ນບ້ານ ພ້ອມທັງການຊ່ວຍເຫລືອຈາກບັນດາຄູ່ຮ່ວມພັດທະນາ ແລະ ທຸກພາກສ່ວນຂອງສັງຄົມ.
ໃນທ້າຍປີ 2023, ສປປ ລາວ ຕັ້ງເປົ້າໝາຍໃນການລຶບລ້າງພະຍາດໄຂ້ມາລາເຣຍ ຊະນິດຟານຊີປາຣອມ ເຊິ່ງເປັນສ່ວນໜຶ່ງຂອງວຽກງານທີ່ພວກເຮົາຕັ້ງໜ້າປະຕິບັດເພື່ອໃຫ້ບັນລຸເປົ້າໝາຍການລຶບລ້າງພະຍາດໄຂ້ມາລາເຣຍທົ່ວປະເທດ.
ສປປ ລາວ ໄດ້ຕັ້ງເປົ້າໝາຍໃນການລຶບລ້າງພະຍາດໄຂ້ມາລາເຣຍ ຊະນິດທີ່ຮ້າຍແຮງທີ່ສຸດ ພາຍໃນທ້າຍປີນີ້ ເຊິ່ງຈະເປັນຂີດໝາຍໜຶ່ງໃນການກ້າວໄປສູ່ການລຶບລ້າງພະຍາດໄຂ້ມາລາເຣຍທົ່ວປະເທດ.
ສິ່ງທີ່ເຮັດໃຫ້ວຽກງານດັ່ງກ່າວ ມີຄວາມຄືບໜ້າຢ່າງໃຫຍ່ຫລວງ ແມ່ນມາຈາກຄວາມເອົາໃຈໃສ່ຂອງອາສາສະໝັກມາລາເຣຍຂັ້ນບ້ານ ເພື່ອນຳເອົາຄວາມຮູ້, ເຄື່ອງກວດເລືອດ, ຢາປິ່ນປົວ, ການເຝົ້າລະວັງພະຍາດ ແລະ ມຸ້ງ ໄປໃຫ້ເຖິງປະຊາຊົນທີ່ອາໄສຢູ່ຢ່າງກະແຈກກະຈາຍ ແລະ ຜູ້ທີ່ມີຄວາມສ່ຽງຕິດພະຍາດທີ່ສຸດ.
