ໂຄວິດ-19 ສາຍພັນ XBB.1.16 ກຳລັງແພ່ລະບາດໃນອັງກິດ ມີຄົນເສຍຊີວິດແລ້ວ 5 ຄົນ

ສຳນັກຂ່າວເດລີ່ເມວລາຍງານ: ວັນທີ 24 ເມສາ 2023 ຜ່ານມາ, ປະຊາຊົນອັງກິດເສຍຊີວິດຈາກການຕິດເຊື້ອໂຄວິດສາຍພັນໃໝ່ XBB.1.16 ເຊິ່ງມີຊື່ຫລິ້ນວ່າ ອາດທູຣັສ ແລ້ວ 5 ຄົນ, ໃນຂະນະທີ່ເຊື້ອໂຄວິດສາຍພັນນີ້ສາມາດແພ່ເຊື້ອໄດ້ໄວກວ່າສາຍພັນອື່ນ ເຊິ່ງກຳລັງແພ່ລະບາດໜັກໃນອິນເດຍ.

ສຳນັກງານຄວາມໝັ້ນຄົງທາງສຸຂະພາບຂອງອັງກິດ (UKHSA) ກວດພົບຜູ້ຕິດເຊື້ອໂຄວິດສາຍພັນ XBB.1.16 ໃນອັງກິດແລ້ວ 135 ຄົນ ນັບຕັ້ງແຕ່ກວດພົບຜູ້ຕິດເຊື້ອສາຍພັນໃໝ່ຄັ້ງທຳອິດ ບໍລິເວນພາກຕາເວັນອອກສຽງເໜືອຂອງອັງກິດເມື່ອກາງເດືອນກຸມພາຜ່ານມາ, ສ່ວນຄວາມຮຸນແຮງຂອງເຊື້ອໂຄວິດສາຍພັນດັ່ງກ່າວ ທາງບັນດາຜູ້ຊ່ຽວຊານຍັງບໍ່ມີຂໍ້ພິສູດວ່າເປັນສາຍພັນທີ່ເຮັດໃຫ້ມີອາການຮຸນແຮງກວ່າສາຍພັນອື່ນໆທີ່ລະບາດກ່ອນໜ້ານີ້ຫລືບໍ. ເຊິ່ງອາການຂອງການຕິດເຊື້ອສາຍພັນ XBB.1.16 ແມ່ນມີໄຂ້, ຕາແດງ, ຄັນຕາ, ມີຂີ້ຕາ. , ຂະນະທີ່ອິນເດຍກຳລັງປະເຊີນກັບການພົບຜູ້ຕິດເຊື້ອເພີ່ມຂຶ້ນມາຢູ່ທີ່ 10,000 ຄົນ/ວັນ.