ການຝຶກເວົ້າພາສາລາວ ຈະທົດລອງສອນຢູ່ໂຮງຮຽນເປົ້າໝາຍ ຂອບເຂດ 21 ເມືອງ ໃນ 10 ແຂວງ ເລີ່ມຕົ້ນເດືອນກັນຍາ 2023
ໃນລະຫວ່າງວັນທີ 20-21 ເມສາ 2023 ຜ່ານມາ, ກອງປະຊຸມຮັບຮອງ ສື່ການຮຽນການສອນຂອງໂຄງການຝຶກເວົ້າພາສາລາວ ໂດຍໃຫ້ກຽດເປັນປະທານຂອງ ທ່ານ ປອ ອ່ອນແກ້ວ ນວນນະວົງ, ຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ (ສວສ) ມີຕາງໜ້າຈາກ, ກົມ, ຂະແໜງ,ມະຫາວິທະຍາໄລແຫ່ງຊາດ, ພະນັກງານວິຊາການ, ຄະນະກໍາມະການ, ຊ່ຽວຊານ ແລະ ຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.
ໃນປີ 2019, ກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນການສຶກສາຂັ້ນພື້ນຖານໃນ ສປປ ລາວ (ແຜນງານບີຄວາ) ໄດ້ເລີ່ມຕົ້ນໂຄງການຝຶກເວົ້າພາສາລາວ ໄລຍະທົດລອງ ເພື່ອທົດສອບວິທີການໃໝ່ເພື່ອໃຫ້ການຊ່ວຍເຫຼືອນັກຮຽນທີ່ເວົ້າພາສາລາວບໍ່ເກັ່ງ. ສື່ການຮຽນການສອນດັ່ງກ່າວໄດ້ຖືກທົດລອງຢູ່ໃນ 7 ເມືອງໃນ 4 ແຂວງເປົ້າໝາຍໃນໄລຍະທີ 1 ຂອງແຜນງານບີຄວາ.
ໄລຍະທົດລອງຂອງໂຄງການໄດ້ສິ້ນສຸດລົງໃນເດືອນມິຖຸນາ 2021 ແລະ ໄດ້ຮັບການປະເມີນຜົນຜ່ານການທົດສອບລະດັບພື້ນຖານ ແລະ ການທົດສອບພາຍຫຼັງການທົດລອງສຳເລັດໃນໂຮງຮຽນເປົ້າໝາຍ ແລະ ໂຮງຮຽນສົມທຽບທົງໝົດ. ນອກຈາກນີ້, ກໍຍັງມີການສຳຫຼວດຄູ, ຜູ້ອຳນວຍການທີ່ເຂົ້າຮ່ວມນຳອີກ ແລະ ທົບທວນຄືນບັນດາສື່ການຮຽນການສອນ. ຜົນການປະເມີນສະແດງໃຫ້ເຫັນວ່າ ການທົດລອງໂຄງການຝຶກເວົ້າພາສາລາວແມ່ນມີປະສິດທິພາບສູງເປັນພິເສດຢູ່ແຂວງຜົ້ງສາລີ. ກໍລະນີສຶກສາ ດ້ວຍການສໍາພາດ ແລະ ການສົນທະນາເປັນກຸ່ມກັບຜູ້ອໍານວຍການ, ຄູສອນ ແລະ ພໍ່ແມ່ຜູ້ປົກຄອງ ໄດ້ຈັດຂຶ້ນທີ່ແຂວງຜົ້ງສາລີໃນເດືອນກຸມພາ 2022 ເພື່ອເຂົ້າໃຈເຫດຜົນ ແລະ ທີ່ມາຂອງຜົນສໍາເລັດທີ່ດີຂຶ້ນນີ້.
ໂຄງການຝຶກເວົ້າພາສາລາວທີ່ໄດ້ຖືກທົບທວນ ຈະໄດ້ທົດລອງສອນ ໃນໂຮງຮຽນເປົ້າໝາຍ ແລະ ໂຮງຮຽນສົມທຽບ ໃນຂອບເຂດ 21 ເມືອງ ທີ່ໄດ້ຮັບຄັດເລືອກ ເຊັ່ນ: ແຂວງຜົ້ງສາລີ, ຫຼວງນ້ຳທາ, ບໍ່ແກ້ວ, ຫົວພັນ, ຊຽງຂວາງ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ ແລະ ອື່ນໆ. ການທົດລອງຈະເລີ່ມຕົ້ນໃນເດືອນກັນຍາ 2023. ນັກຮຽນຂັ້ນ ປ.1 ທີ່ມາຈາກພື້ນຖານການເວົ້າພາສາອື່ນທີ່ບໍ່ແມ່ນພາສາລາວເປັນຫຼັກໃນຄອບຄົວ ຈະໄດ້ຮັບການສອນພາສາລາວເພີ່ມຕື່ມອີກ 3-4 ຊົ່ວໂມງຕໍ່ອາທິດ ເພື່ອປັບປຸງຄວາມສາມາດໃນການເວົ້າພາສາລາວ. ການປັບປຸງທັກສະການເວົ້າຈະສ້າງພື້ນຖານພາສາທີ່ເຂັ້ມແຂງ, ເຊິ່ງຍັງຊ່ວຍປັບປຸງທັກສະການອ່ານ ແລະ ການຂຽນຂອງນັກຮຽນ. ຄູສອນທີ່ເຂົ້າຮ່ວມ ແລະ ຜູ້ເຮັດວຽກສຶກສານິເທດຂັ້ນເມືອງຈະໄດ້ຮັບປຶ້ມແບບຮຽນ ແລະ ຄູ່ມືຄູທີ່ປັບປຸງໂດຍ ສວສ ໂດຍໄດ້ຮັບການສະໜັບສະໜູນຈາກ ແຜນງານບີຄວາ, ແລະ ການຝຶກອົບຮົມວິທີການສອນວິຊາພາສາລາວ.
