ຄະດີລັກພຣະພຸດທະຮູບເກົ່າ 2 ອົງຢູ່ວັດເກົ້າຍອດມີຄວາມຄືບໜ້າດີ.
ເມື່ອທ້າຍອາທິດຜ່ານມານີ້, ເຈົ້າໜ້າທີ່ໄດ້ຈັບສິກພຣະອົງໜຶ່ງຢູ່ວັດເກົ້າຍອດ ພາຍຫລັງກວດພົບວ່າຜູ້ກ່ຽວໄດ້ມີສ່ວນພົວພັນກັບສິ່ງເສບຕິດ ແລະ ເປັນຜູ້ຕ້ອງສົງໄສອາດຈະຮ່ວມໃນຂະບວນການລັກພຣະພຸດທະຮູບທອງຈຳນວນ 2 ອົງຢູ່ວັດດັ່ງກ່າວໃນວັນທີ 23 ສິງຫາຜ່ານມານີ້, ຊຶ່ງເປັນພະທອງສຳລິດປາງຊະນະມານ, ອົງທີ 1 ມີຄວາມສູງ 78 ຊັງຕີແມັດ, ກວ້າງ 35 ຊັງຕີແມັດ, ອົງທີ 2 ມີຄວາມສູງ 23,5 ຊັງຕີແມັດ, ກວ້າງ 8 ຊັງຕີແມັດ.
+ເກີດເຫດຄົນຮ້າຍລັກພະພຸດທະຮູບເກົ່າແກ່ 2 ອົງຢູ່ວັດເກົ້າຍອດ
ເຈົ້າໜ້າທີ່ໃຫ້ຮູ້ວ່າ: ຜ່ານການສືບສວນ-ສອບສວນຄະດີດັ່ງກ່າວແມ່ນມີຄວາມຄືບໜ້າດີ ແລະ ກຳລັງເລັ່ງຕິດຕາມຄົນຮ້າຍມາດຳເນີນຄະດີ, ເນື່ອງຈາກວ່າ ພຣະພຸດທະຮູບດັ່ງກ່າວເປັນພຣະທີ່ເກົ່າແກ່ ແລະ ໄດ້ຮັບການຂຶ້ນທະບຽນຈາກກົມມໍລະດົກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວແລ້ວ. ໂດຍຄາດວ່າອີກບໍ່ດົນຈະສາມາດຈັບຕົວຄົນຮ້າຍ ແລະ ເກັບກູ້ພຣະພຸດທະຮູບກັບຄືນມາໄດ້ໂດຍໄວ.
