ສປປ ລາວ ມີພົນລະເມືອງ ທີ່ມີເກນອາຍຸອອກແຮງງານ 5,3 ລ້ານຄົນ

ຜົນສຳຫຼວດກຳລັງແຮງງານປີ ຄັ້ງທີ III 2022 ລະບຸວ່າ: ພົນລະເມືອງລາວ ມີປະມານ 7,4 ລ້ານຄົນ, ໃນນີ້ ຜູ້ທີ່ມີເກນອາຍຸອອກແຮງງານ 15 ປີຂຶ້ນໄປ ມີປະມານ 5,3 ລ້ານຄົນ. ປັດຈຸບັນລັດຖະບານ ໄດ້ສຸມໃສ່ແກ້ໄຂຊ່ອງວ່າງ ລະຫວ່າງ ຄວາມຕ້ອງການຂອງຕະຫຼາດແຮງງານ ກັບ ຜູ້ອອກແຮງງານ ເພື່ອໃຫ້ເກີດປະໂຫຍດ 3 ຢ່າງ ກໍຄື ຜົນປະໂຫຍດແກ່ຜູ້ອອກແຮງງານ; ແກ່ການຈັດຕັ້ງ ຫຼື ຜູ້ໃຊ້ແຮງງານ ແລະ ແກ່ປະເທດຊາດ.

ໂຕເລກ 5.382.000 ຄົນ ແມ່ນພົນລະເມືອງລາວໃນເກນອາຍຸອອກແຮງງານ ຊຶ່ງໃນນີ້ມີຜູ້ທີ່ເປັນກຳລັງແຮງງານ 2.536.000 ຄົນ ປະມານ 34,1% ຂອງພົນລະເມືອງທັງໝົດ ແລະ ເທົ່າກັບ 47,1% ຂອງພົນລະເມືອງໃນເກນອາຍຸອອກແຮງງານທັງໝົດ. ໃນນັ້ນ, ແມ່ຍິງມີ 1,1 ລ້ານຄົນ ກວມເອົາ 45,4%. ກຳລັງແຮງງານສ່ວນໃຫຍ່ມີອາຍຸໃນລະຫວ່າງ 25-64 ປີ ກວມເອົາປະມານ 78,7% ສ່ວນຜູ້ທີ່ມີອາຍຸ 65 ປີຂຶ້ນໄປມີພຽງ 3,1%. ໃນຈໍານວນພົນລະເມືອງ ທີ່ເປັນກຳລັງແຮງງານ ມີຜູ້ທີ່ມີວຽກເຮັດງານທໍາແມ່ນ 2.475.000 ຄົນ ກວມເອົາ 97,6%; ຂະນະທີ່ ມີຜູ້ວ່າງງານ 61.000 ຄົນ ເທົ່າກັບ 2,4%.

ສ່ວນຈໍານວນທີ່ເປັນຜູ້ຢູ່ນອກກຳລັງແຮງງານ ເປັນຕົ້ນ ນັກຮຽນ-ນັກສຶກສາ, ພະນັກງານບໍານານ, ຜູ້ເຈັບປ່ວຍ, ນັກໂທດ….. ຊຶ່ງມີ 2,8 ລ້ານກວ່າຄົນ ກວມເອົາ 52,9% ຂອງພົນລະເມືອງໃນເກນອາຍຸອອກແຮງງານ ມີແມ່ຍິງ 1,6 ລ້ານຄົນ ກວມເອົາ 58,1%. ໃນຈໍານວນທີ່ເປັນຜູ້ຢູ່ນອກກຳລັງແຮງງານນັ້ນ, ມີຜູ້ທີ່ມີໂອກາດເປັນກຳລັງແຮງງານພຽງ 5% ຄື 143.000 ຄົນ.

ອັດຕາການມີສ່ວນຮ່ວມຂອງກຳລັງແຮງງານ ຖ້າສົມທຽບລະຫວ່າງເພດຍິງ ແລະ ເພດຊາຍ ເຫັນວ່າເພດຊາຍມີອັດຕາການມີສ່ວນຮ່ວມສູງກວ່າ ໃນລະດັບ 52,6% ສ່ວນເພດຍິງ 41,9% ຊຶ່ງອັດຕາການມີສ່ວນຮ່ວມຂອງຜູ້ອາໄສຢູ່ເຂດຕົວເມືອງ ມີເຖິງ 55%.

ຜົນສຳຫຼວດຍັງລະບຸວ່າ: ຜູ້ວ່າງງານທີ່ເປັນແມ່ຍິງມີ 21,9 ພັນຄົນ ກວມເອົາ 34,4% ຂອງຜູ້ວ່າງງານທັງໝົດ. ຂະນະທີ່ຜູ້ວ່າງງານສ່ວນໃຫຍ່ແມ່ນອາໄສຢູ່ເຂດຊົນນະບົດ ມີ 33,1 ພັນຄົນ ກວມເອົາ 54%, ຜູ້ວ່າງງານ ທີ່ມີອາຍຸ 25 ປີ ຂຶ້ນໄປໃນທົ່ວປະເທດ ມີ 37,1 ພັນຄົນ, ສ່ວນຜູ້ວ່າງງານ ຢູ່ໃນອາຍຸ 15-25 ປີ ມີທັງໝົດ 24,1 ພັນຄົນ. ໂດຍລວມແລ້ວ, ອັດຕາການວ່າງງານໃນປີ 2022 ແມ່ນຢູ່ທີ່ 2,4%.

ເຖິງຢ່າງໃດກໍຕາມ, ປັດຈຸບັນ ລັດຖະບານ ພວມສຸມໃສ່ແກ້ໄຂໄພວ່າງງານ ໂດຍສະເພາະບັນຫາແຮງງານທີ່ໄດ້ຮັບຜົບກະທົບຈາກການແຜ່ລະບາດຂອງພະຍາດໂຄວິດ-19 ແລະ ການພັດທະນາສີມືແຮງງານ ໃຫ້ມີຄຸນນະພາບເຂົ້າສູ່ຕະຫຼາດແຮງງານ ເພື່ອຕອບສະໜອງຕາມຮຽກຮ້ອງຕ້ອງການປະເພດແຮງງານທີ່ຕະຫຼາດແຮງງານຕ້ອງການພາຍໃນ ໂດຍສະເພາະແມ່ນການຈັດງານ ທີ່ເປີດໂອກາດໃຫ້ຜູ້ໃຊ້ແຮງງານ ແລະ ຜູ້ອອກແຮງງານ ໄດ້ພົບປະແລກປ່ຽນຂໍ້ມູນ, ຮັບຮູ້ນະໂຍບາຍແຮງງານ ເພື່ອໃຫ້ສັງຄົມຮູ້ວ່າອາຊີບໃດ? ວຽກໃດ? ທີ່ຕະຫຼາດແຮງງານຕ້ອງການ ຊຶ່ງເປັນການກະຕຸກຊຸກຍູ້ໃຫ້ມີການພັດທະນາດ້ານການຮຽນ, ການຝຶກອົບຮົມ ຕອບສະໜອງໄດ້ຕາມຄວາມຕ້ອງການໃນຍຸກປັດຈຸບັນ. ນອກນີ້, ລັດຖະບານ ຍັງໄດ້ສ້າງສີມືແຮງງານທີ່ມີຄຸນນະພາບ ເພື່ອສົ່ງອອກໃຫ້ບາງປະເທດ ທີ່ມີຄວາມຕ້ອງການ ແລະ ເໝາະສົມກັບສີມືຂອງແຮງງານລາວ ຊຶ່ງໃນປີຜ່ານມາ ສາມາດສົ່ງອອກແຮງງານລາວໄປຕ່າງປະເທດເຖິງ 49.504 ຄົນ.