ໂຄວິດ-19 ສາຍພັນໃໝ່ Arcturus ແພ່ລະບາດໃນອາເມລິກາ

ວັນທີ 21 ເມສາ, ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ເປີດເຜີຍວ່າ: ພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຊະນິດກາຍພັນ ສາຍພັນໂອໄມຄຣອນ ສາຍພັນຍ່ອຍໃໝ່ກໍາລັງແພ່ລະບາດຢູ່ອາເມລິກາ ແລະ ກວມອັດຕາເກືອບ 10% ຂອງຈໍານວນຜູ້ຕິດເຊື້ອປະຈໍາອາທິດທີ່ໄດ້ຮັບລາຍງານທົ່ວປະເທດ.

ເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຊະນິດກາຍພັນ ສາຍພັນໂອໄມຄຣອນ ສາຍພັນຍ່ອຍ XBB.1.16 ຫລື ເອີ້ນວ່າ Arcturus ຖືກບັນຈຸລົງໃນບັນຊີເຝົ້າຕິດຕາມຂອງສູນຄວບຄຸມ ແລະ ປ້ອງກັນພະຍາດອາເມລິກາ. ຂະນະທີ່ຜູ້ຊ່ຽວຊານເຕືອນວ່າ: ອັດຕາຜູ້ຕິດເຊື້ອໄວຣັສໂຄວິດ-19 ສາຍພັນນີ້ຈະເພີ່ມຂຶ້ນໃນມໍ່ໆນີ້ ແລະ ອາດກາຍເປັນເຊື້ອໄວຣັສສາຍພັນຫລັກໂຕຕໍ່ໄປໃນປະເທດ.

ລາຍງານລະບຸວ່າ: ເຊື້ອໄວຣັສໂຄວິດ-19 ສາຍພັນຍ່ອຍ XBB.1.5 ທີ່ຕິດຕໍ່ໄດ້ສູງຍັງເປັນເຊື້ອໄວຣັສສາຍພັນຫລັກໃນອາເມລິກາ ແລະ ກວມອັດຕາປະມານ 73,6% ຂອງຈໍານວນຜູ້ຕິດເຊື້ອໂຄວິດ-19 ໃນອາທິດນີ້.

ອົງການອະນາໄມໂລກ (WHO) ກໍາລັງເຝົ້າຕິດຕາມເຊື້ອໄວຣັສໂຄວິດ-19 ສາຍພັນ XBB.1.16 ເຊິ່ງມີສ່ວນເຮັດໃຫ້ຈໍານວນຜູ້ຕິດເຊື້ອໂຄວິດ-19 ເພີ່ມຂຶ້ນຢ່າງວ່ອງໄວໃນອິນເດຍ.