ຈຳປາສັກເປີດປະມູນຂາຍໄມ້ 58.295 ແມັດກ້ອນ ເລີ່ມ 24 ເມສາ -11 ພຶດສະພາ 1.000.000 ກີບ/ຊອງ

ວັນທີ 21 ເມສາ 2023 ນີ້ ຄະນະກໍາມະການຮັບຜິດຊອບປະມູນໄມ້ຢຶດຂັ້ນແຂວງ (ພະແນກອຸດສາຫະກໍາ ແລະ ການຄ້າແຂວງຈໍາປາສັກ) ອອກແຈ້ງເຊີນມາຍັງບັນດາສະມາຊິກຂອງສະມາຄົມອຸດສາຫະກໍາປຸງແຕ່ງໄມ້ແຫ່ງຊາດ, ບັນດາສະມາຊິກຂອງ ສະມາຄົມອຸດສາຫະກໍາປຸງແຕ່ງໄມ້ພາຍໃນແຂວງ, ສະມາຄົມເຟີນີເຈີ, ໂຮງງານປຸງແຕ່ງໄມ້, ໂຮງງານເຟີນີເຈີ ແລະ ທຸລະ ກິດໄມ້ ໃນຂອບເຂດທົ່ວປະເທດ ເພື່ອເຂົ້າປະມູນຊື້-ຂາຍໄມ້ຂອງກາງໃນຄະດີທີ່ສານບໍ່ທັນຕັດສິນ ຈໍານວນ 463 ຕັບ/ເສັ້ນ/ທ່ອນ, ບໍລິມາດ 58.295 ແມັດກ້ອນ (ຫ້າສິບແປດຈຸດສອງຮ້ອຍເກົ້າສິບຫ້າແມັດກ້ອນ) ຕາມຕາຕະລາງສັງລວມ ບັນຊີໄມ້ຕົວຈິງ ແລະ ຄ່າຊີ້ນເປືອງຕ່າງໆ (ລາຍລະອຽດມີຕາຕະລາງຄິດໄລ່ລາຄາພັນທະຕ່າງໆຄັດຕິດມາພ້ອມ) ປະກອບມີດັ່ງລຸ່ມນີ້:

– ໄມ້ດູ່ ຈໍານວນ 164 ຕັບ/ເສັ້ນ/ທ່ອນ, ບໍລິມາດ 1.060 ແມັດກ້ອນ

– ໄມ້ແຕ້ຮໍ ຈໍານວນ 205 ຕັບ/ເສັ້ນ/ທ່ອນ, ບໍລິມາດ 31.034 ແມັດກ້ອນ

– ໄມ້ຍົມຜາ ຈໍານວນ 34 ຕັບ, ບໍລິມາດ 13.943 ແມັດກ້ອນ

– ໄມ້ແດງ ຈໍານວນ 60 ຕັບ/ເສັ້ນ/ທ່ອນ, ບໍລິມາດ 12,258 ແມັດກ້ອນ

➢ ໃຫ້ບັນດາທ່ານເຂົ້າມາພົວພັນຊື້ຊອງປະມູນ ທີ່ພະແນກອຸດສາຫະກໍາ ແລະ ການຄ້າແຂວງຈໍາປາສັກ( ຂະແຫນງ ການຄ້າພາຍໃນ) ໃນໂມງລັດຖະການກໍານົດ 15 ວັນ(ນັບແຕ່ວັນທີ 24 ເມສາ – 11 ພຶດສະພາ 2023 )ສໍາລັບມື້ເປີດຊອງປະມູນ ແມ່ນວັນທີ 12 ພຶດສະພາ 2023, ເວລາ 09:00 ໂມງ ສະຖານທີ່ຫ້ອງປະຊຸມຂອງ ພະແນກອຸດສາຫະກໍາ ແລະ ການຄ້າແຂວງຈໍາປາສັກ.

➢ ກະລຸນາຖືຊອງປະມູນໄວ້ກັບຕົນເອງ ຈົນຮອດເວລາ 09:00 ໂມງ ຂອງວັນທີ 12 ພຶດສະພາ 2023 ຈິ່ງໃຫ້ມາ ມອບ-ສົ່ງ(ດ້ວຍຕົນເອງ ຫຼື ຜູ້ຕາງຫນ້າ ທີ່ມີການມອບສິດຈາກຜູ້ອໍານວຍການໂຮງງານ/ບໍລິສັດ) ນໍາຄະນະກໍາ ມະການຮັບຜິດຊອບປະມູນໄມ້ຂັ້ນແຂວງ ທີ່ພະແນກອຸດສາຫະກໍາ ແລະ ການຄ້າແຂວງຈໍາປາສັກ, ຖ້າກາຍ ເວລາທີ່ກໍານົດໄວ້ຖືວ່າສະຫຼະສິດ.

➢ ລາຄາຊອງປະມູນ: 1.000.000 ກີບ/ຊອງ (ສໍາລັບຄ່າຊອງປະມູນນັ້ນແມ່ນບໍ່ສົ່ງຄືນ) ດັ່ງນັ້ນ, ຈິ່ງແຈ້ງມາຍັງທ່ານເພື່ອເຂົ້າຮ່ວມການປະມູນຊື້-ຂາຍໄມ້ ຕາມກໍານົດເວລາຂ້າງເທິງດ້ວຍ.