ເຊລຊີ ສ້າງສະຖິຕິຜົນງານຕົກຕຳ່ທີ່ສຸດໃນຮອບເກືອບ 30 ປີ
ເຊລຊີ ພວມຈະມີລະດູການທີ່ຕົກຕຳ່ທີ່ສຸດຂອງສະໂມສອນໃນຮອບເກືອບ 30 ປີ ຫາກບໍ່ສາມາດເຮັດອັນດັບຂຶ້ນໄປໄດ້ສູງກວ່ານີ້ໃນ ພຣີເມຍລີກ ພາຍຫລັງຕົກຮອບ 8 ທີມສຸດທ້າຍ ຢູຟາ ແຊ໊ມປຽນ ລີກ ດ້ວຍການເສຍໃຫ້ ຣຽວ ມາດຣິດ ປະຕູລວມ 0-4 ວັນອັງຄານທີ່ຜ່ານມາ.
ທັງທີ່ມີ ທັອດ ໂບລີ ເຂົ້າມາເປັນເຈົ້າຂອງສະໂມສອນລາຍໃຫມ່ແທນທີ່ ໂຣມັນ ອະບຣາໂມວິດ ແລະ ເກີດການລົງທຶນໃນຕະຫລາດນັກເຕະໄປຫລາຍກວ່າ 500 ລ້ານປອນໃນ 2 ຕະຫລາດທັງລະດູຮ້ອນ ແລະ ລະດູໜາວ ແຕ່ຜົນງານຂອງ ເຊລຊີ ໃນລະດູການນີ້ພັດອອກມາຢ່າງໜ້າຜິດຫວັງ.
ການຕົກຮອບ 8 ທີມ ຢູຟາແຊ໊ມປຽນ ລີກ ເມື່ອວັນອັງຄານເຮັດໃຫ້ເຊລຊີ ຫລຸດອອກຈາກການຫວັງແຊ໊ມທຸກລາຍການແລ້ວ ເຊ່ັນ: ຕົກຮອບ 3 ຄາຣາບາວ ຄັພ ແລະ ຮອບ 3 ເອຟເອ ຄັບ ດ້ວຍການເສຍ ແມນເຊສເຕີ ຊິຕີ ທັງສອງລາຍການ ໃນປະຕູ 0-2 ແລະ 0-4 ຕາມລຳດັບ.
ປະເດັນສຳຄັນສຸດຄືຜົນງານໃນ ພຣີເມຍລີກ ທີ່ ເຊລຊີ ບໍ່ອາດຈະເອົາຊະນະໃຜໄດ້ 5 ເກມຊ້ອນແລ້ວໃນການໃຊ້ງານ 3 ຜູ້ຈັດການ ເກຣແຮມ ພັອດເຕີ, ບຣູໂນ ຊັລດໍ ແລະ ແຟຣັງ ແລມພາດ.
ເວລານີ້ ເຊລຊີ ຢູ່ອັນດັບທີ 11 ດ້ວຍການມີ 39 ປະຕູ ຈາກການລົງສະໜາມ 31 ນັດ ເຊິ່ງຫາກໃນທ້າຍທີ່ສຸດແລ້ວ ພວກເຂົາບໍ່ອາດພາຕົນເອງໄດ້ອັນດັບຂຶ້ນໄປໄດ້ ການຈົບລະດູການດ້ວຍອັນດັບ 11 ຈະນັບເປັນຜົນງານທີ່ຕົກຕຳ່ທີ່ສຸດນັບຕັ້ງແຕ່ລະດູການ 1995/96 ຫລື ຮອບ 27 ປີກໍວ່າໄດ້.
