ອຢ ແຈ້ງຫ້າມບໍລິໂພກ ແລະ ຈໍາໜ່າຍ ຜະລິດຕະພັນອາຫານເຝີເຮືອເຄິ່ງສໍາເລັດຮູບ (ກາເລີຣົດ) ທີ່ມີການປົນເປື້ອນອັນຕະລາຍຕໍ່ສຸຂະພາບ

ວັນທີ 19 ເມສາ 2023 ນີ້, ກົມອາຫານ ແລະ ຢາ (ອຢ) ກະຊວງສາທາລະນະສຸກ ໄດ້ອອກແຈ້ງການ ສະບັບເລກທີ 3865/ກອຢ  ກຽ່ວກັບການ ຫ້າມບໍລິໂພກ ແລະ ຈໍາໜ່າຍ ຜະລິດຕະພັນອາຫານ ເຝີເຮືອເຄິ່ງສໍາເລັດຮູບ (ກາເລີຣົດ) “Lerros Instant Boat Noodle” ເພາະມີການປົນເປື້ອນເຊື້ອຈຸລີນຊີເກີນມາດຕະຖານກຳນົດ ຊຶ່ງຈະເຮັດເກີດພະຍາດຖອກທ້ອງ ອາຫານເປັນພິດ ແລະ ເປັນອັນຕະລາຍຕໍ່ສຸຂະພາບ.

ແຈ້ງການຊີ້ອອກວ່າ: ຄະນະກໍາມະການຄຸ້ມຄອງອາຫານ ແລະ ຢາ ແຫ່ງຣາຊະອານາຈັກໄທ ກວດພົບຜະລິດຕະພັນອາຫານບັນຈຸຖົງພາສຕິກສີແດງ ສະຫລາກລະບຸ ເຝີເຮືອເຄິ່ງສໍາເລັດຮູບ (ກາເລີຣົດ) “Lerros Instant Boat Noodle” ເລກ ອ.ຢ ໄທ 12-2-01765-6-0002 ວັນທີຜະລິດ 01.02.2023 ວັນໝົດອາຍຸ 01.05.2023, ຜະລິດໂດຍ: ກ້ວຍຕຽວເລີຣົດ ເລກທີ 9/10 ຕໍາບົນບ້ານໃໝ່ ຈັງຫວັດນົນທະບູລີ, ຈັດຈໍາໜ່າຍໂດຍ: ບໍລິສັດ ເລີຣົດ ອິນເຕີຟຸດ ຈໍາກັດ ເລກທີ408/6 ໝູ່ 7 ຕໍາບົນ ບາງປູໃໝ່ ອໍາເພີ ເມືອງສະມຸດປາການ ປະເທດໄທ (ຕາມຮູບພາບທີ່ໄດ້ຕິດຄັດ) ມີການປົນເປື້ອນເຊື້ອຈຸລິນຊີ Bacillus cereus 6,600CFU/ກຣາມ ເກີນມາດຕະຖານກໍານົດ ຊຶ່ງສາມາດເຮັດໃຫ້ເກີດພະຍາດຖອກທ້ອງ, ອາຫານເປັນພິດ ແລະ ມີຄວາມອັນຕະລາຍຕໍ່ສຸຂະພາບ.